جۋالى اۋدانىنا قاراستى شاقپاقاتا اۋىلىندا زاماناۋي ۇلگىدەگى شاعىن فۋتبول الاڭى پايدالانۋعا بەرىلدى, دەپ حابارلايدى Egemen.kz
اۋىلدىڭ ورتالىق كوشەسىندە ورنالاسقان بۇل سپورت نىسانى جاساندى توسەنىشپەن جابدىقتالىپ, تۇنگى ۋاقىتتا دا سپورتپەن شۇعىلدانۋعا مۇمكىندىك بەرەتىن جارىق شامدارىمەن قامتاماسىز ەتىلگەن.
الاڭنىڭ اشىلۋى – اۋىلدىق جەرلەردە بۇقارالىق سپورتتى دامىتۋعا باعىتتالعان ناقتى قادامداردىڭ ءبىرى. جەرگىلىكتى تۇرعىنداردىڭ ايتۋىنشا, بۇل نىسان اۋىل بالالارى مەن جاستار ءۇشىن پايدالى ءارى قاۋىپسىز ورتا قالىپتاستىرىپ, بوس ۋاقىتتى ءتيىمدى وتكىزۋگە جول اشىپ وتىر.
«وسىنداي زاماناۋي ۇلگىدە فۋتبول الاڭشاسى سالىنعانىنا قۋانىشتىمىز. جاستار بوس ۋاقىتىن ءتيىمدى پايدالانىپ, سپورتپەن ءجيى شۇعىلداناتىن بولدى. جالپى, اۋىلىمىزدا حالىققا پايداسى تيەتىن الەۋمەتتىك نىساندار كوپتەپ سالىنۋدا» – دەيدى اۋىل تۇرعىنى پەرنەبەك بەردىمبەتوۆ.
فۋتبول الاڭىنىڭ قۇرىلىسىن «سيتي قۇرىلىس» جشس جۇرگىزگەن. جاڭا الاڭنىڭ اشىلۋ سالتاناتىنا وراي اۋىل جاستارى اراسىندا شاعىن فۋتبولدان تۋرنير ۇيىمداستىرىلىپ, جەڭىمپاز كوماندالارعا سىيلىقتار تابىس ەتىلدى.
جامبىل وبلىسى
