استانا. 7 مامىر. استانادا كەڭەس وداعىنىڭ باتىرى يۆان پانفيلوۆتىڭ ەسكەرتكىشى اشىلدى. وعان مەملەكەت باسشىسى قاتىستى. بۇل تۋرالى akorda.kz حابارلادى.
سالتاناتتى ءراسىم بارىسىندا ەلباسى بارشا ارداگەرلەر مەن ەل تۇرعىندارىن وتان قورعاۋشىلار كۇنىمەن جانە ۇلى جەڭىستىڭ 70 جىلدىق مەرەيتويىمەن قۇتتىقتادى.
«بۇل – كەڭەس وداعىنىڭ باتىرى يۆان پانفيلوۆقا عانا ارنالعان ەسكەرتكىش ەمەس, فاشيزمگە قارسى كۇرەسكە قاتىسقان بارلىق قازاقستاندىقتارعا, ۇرىس دالاسىندا قازا تاپقاندارعا جانە امان-ەسەن ورالىپ, ەلدى دامىتۋعا وراسان ەڭبەك سىڭىرگەن ارداگەرلەرگە دەگەن تاعزىم», – دەدى قازاقستان پرەزيدەنتى.
نۇرسۇلتان نازارباەۆ گەنەرال-مايور پانفيلوۆتىڭ باسشىلىعىندا بولعان 316-ديۆيزيا الماتى وبلىسىندا قۇرىلعانىن ەسكە سالدى.
«وسى ديۆيزيانىڭ 28 پانفيلوۆشى جاۋىنگەرى ماسكەۋ تۇبىندەگى ەڭ سۇراپىل شايقاسقا قاتىستى. سولاردىڭ قاتارىندا كەڭەس وداعىنىڭ باتىرى باۋىرجان مومىش ۇلى بولدى. ولار فاشيستەردىڭ تانكىلەرمەن جاساعان شابۋىلىنا بىرگە تويتارىس بەردى. سول سەبەپتى دە گەنەرال پانفيلوۆتىڭ ەسىمى ۇلى وتان سوعىسى تاريحىندا قالدى. بىزدەر, قازاقستاندىقتار, ولاردى وزگە باتىرلارمەن بىرگە قاستەر تۇتىپ, جادىمىزدا ساقتايمىز», – دەدى مەملەكەت باسشىسى.
قازاقستان پرەزيدەنتى بۇگىن بار سىي-قۇرمەت پەن تىلەك سوعىس ارداگەرلەرىنە ارنالاتىنىن اتاپ ءوتتى.
«ەلىمىز قاجەتتى قولداۋى مەن جاردەمىن كورسەتۋدە. ارقايسىڭىز مەملەكەتتىڭ قامقورلىعىنداسىزدار. مەن ارقايسىڭىزدى دا جاڭا جىلمەن قۇتتىقتاۋعا تىرىستىم. ءبىز ارداگەرلەردى مەرەكەلەردە عانا ەمەس, بارلىق ۋاقىتتا ارداقتايتىن بولامىز. ويتكەنى, سىزدەر بۇعان لايىقسىزدار. بۇگىنگى ۇرپاقتىڭ تۇراقتى, تاۋەلسىز ءارى تاتۋ قازاقستاندى قۇرۋى – سىزدەردىڭ ەرلىكتەرىڭىزدىڭ وتەۋى. ەلىمىز قالاي وركەندەپ كەلە جاتقانىن كورىپ وتىرسىزدار, سوندىقتان بەكەرگە سوعىسىپ, قان توكپەگەن ەكەنبىز دەپ ويلاۋلارىڭىزعا تولىق نەگىز بار. ارامىزدا امان-ساۋ ءجۇرىپ, جاستاردى پاتريوتتىق پەن وتانعا ادالدىق رۋحىندا تاربيەلەي بەرىڭىزدەر!», – دەدى نۇرسۇلتان نازارباەۆ.
كەڭەس وداعىنىڭ باتىرى, گەنەرال-مايور يۆان پانفيلوۆتىڭ 2,5 مەترلىك ەسكەرتكىشى قولادان قۇيىلعان. ەسكەرتكىشتىڭ ورتا تۇسىندا گۇل قوياتىن ارناۋلى تاقتا بار. مونۋمەنتتىڭ شىعىس جاعىندا اللەيا بويىمەن ماسكەۋدى قورعاۋ كەزىندە شەيىت بولعان 28 پانفيلوۆشى-جاۋىنگەردىڭ تۋعان كۇندەرى مەن قازا تاپقان كۇنى جازىلعان, تابيعي گرانيتتەن جاسالعان پليتالار قويىلعان. سونىمەن قاتار, «كەڭەس وداعى باتىرىنىڭ التىن جۇلدىزى» مەدالى بەدەرلەنگەن 28 ستەللا ورنالاستىرىلعان.
ەلامان قوڭىر.
دەرەك: akorda.kz.
سۋرەت: «قازاقپارات».
