فوتو: gov.kz
20 مىڭعا جۋىق تۇرعىنى بار ەلدى مەكەندە ورتالىقتاندىرىلعان سۋ جۇيەسى بار بولعانىمەن, تەحنيكالىق جاعدايى سىن كوتەرمەيدى. قۇبىرلارداعى قىسىم تىم ءالسىز. كەيبىر كوشەلەرگە مۇلدە سۋ جەتپەيدى. تۇرعىندار تىرشىلىككە قاجەتتى سۋدى تۇنگى ۋاقىتتا ىدىسپەن جيناپ, كۇندەلىكتى شارۋالارىن سوعان بەيىمدەۋگە ءماجبۇر. ماسەلەنى كوزبەن كورىپ, تۇرعىندارمەن اشىق پىكىرلەسۋ ماقساتىندا ءماجىلىس دەپۋتاتتارى ماكسيم روجين مەن دانيار قاسقاراۋوۆ كەمەرتوعانعا ارنايى كەلدى.
«قالا ىرگەسىندە وتىرساق تا, سۋدى شەلەكتەپ تاسيتىنىمىزعا بىرەۋ سەنسە, بىرەۋ سەنبەس. كوبىمىز ءالى كۇنگە قۇدىقتىڭ سۋىن ىشەمىز. تەرەڭدىگى 13–14 مەتر جەردەن الىنعان سۋدىڭ ساپاسى وتە ناشار. تۇنباسى, ءيىسى بار. مۇنداي سۋ ءىشۋ تۇگىلى, كىر جۋعا دا جارامايدى. قۇبىر تارتىلعانىمەن, قىسىم جوق. سۋ تۇندە عانا سىزدىقتاپ اعادى. اۋىلدىڭ تەك 20%-ى عانا ورتالىقتاندىرىلعان سۋمەن قامتىلعان. ءبىز قاسكەلەڭ توپتىق سۋ قۇبىرى جوباسىنا دا كىرمەيمىز. قازىر سۋدى «BeyAzhTrans» جشس مەن «تاۋسامالى-قىزمەت» مكك جەتكىزىپ وتىر. بىراق ولاردىڭ ۇڭعىمالارى ءالسىز ءارى توزعان. ماسەلەنىڭ شەشىمىن تابۋ ماقساتىندا «Amanat» پارتياسىنىڭ ءماجىلىس دەپۋتاتتارىن ارنايى شاقىرتتىق», دەيدى اۋىل تۇرعىنى, ارداگەر ەگىنبەك ەگەۋبەكوۆ.
ماسەلە سۋمەن قامتىلۋدا عانا ەمەس, ونىڭ ساپاسىنا دا اسا ءمان بەرۋ كەرەكتىگىن العا تارتقان اۋىل تۇرعىنى راۋشان جۇماتاەۆا كوپتەگەن جەكە سكۆاجينا رۇقساتسىز قازىلعانىن, سانيتارلىق تالاپتار ساقتالمايتىندىعىن اشىپ ايتتى.
«سۋدىڭ ساپاسى وتە ناشار. تەحنيكالار بۇزىلادى. باتارەيالار بىتەلىپ, مۇلدە جارامسىز بولىپ قالدى. ەڭ باستىسى – بۇل تۇرعىنداردىڭ دەنساۋلىعىنا قاۋىپ توندىرەدى. وسى ماسەلەنى بىرنەشە رەت ماجىلىستە كوتەردىك. ەندى جوبانى قارجىلاندىرۋ قاجەت. قۇجاتتار دايىن, ساراپتامادان ءوتتى.
600 ملن تەڭگە جەرگىلىكتى دەڭگەيدە قاراستىرىلعان. بىراق قالعان قاراجات رەسپۋبليكالىق بيۋدجەتتەن بولىنبەسە, بۇل ماسەلە تاعى ۇزاققا سوزىلىپ كەتۋى مۇمكىن», دەدى ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى م.روجين.
م.ءروجيننىڭ ايتۋىنشا, ماسەلە ءبىر جارىم جىل بۇرىن قاسكەلەڭدەگى قوعامدىق قابىلداۋدا العاش رەت كوتەرىلگەن. سول جولى 20-دان استام تۇيتكىل تىركەلىپ, سونىڭ كوبى شەشىمىن تاپقان. قازىر كەمەرتوعانداعى ەڭ وزەكتى ماسەلە – تازا اۋىزسۋعا قول جەتكىزۋ.
«اۋىلدا 4500-دەن استام ءۇي ورتالىق سۋ جۇيەسىنە قوسىلماعان. تۇرعىندار ءارتۇرلى تاريفپەن, ساپاسى كۇمان تۋدىراتىن جەكە ۇڭعىمالاردان سۋ تۇتىنىپ وتىر. قاجەتتى قۇجاتتار مەن جەر تەلىمى دايىن. باستى ماقسات – رەسپۋبليكالىق بيۋدجەتتەن قارجى تارتۋ. ۇكىمەت قاراۋىنا ۇسىنىلدى, پرەمەر-مينيستر تاراپىنان باقىلاۋعا الىندى – بيۋدجەت ناقتىلانعاندا قارجى بولىنۋگە ءتيىس. بۇل ماسەلە «Amanat» پارتياسىنىڭ تىكەلەي باقىلاۋىندا, پارتيانىڭ «حالىقپەن بىرگە!» سايلاۋالدى باعدارلاماسىندا ينفراقۇرىلىمدى جاڭعىرتۋ نەگىزگى باسىمدىقتاردىڭ ءبىرى رەتىندە بەلگىلەنگەن», دەدى دەپۋتات.
جوبالىق-سمەتالىق قۇجاتتاما اياسىندا جالپى ۇزىندىعى 184,8 شاقىرىم بولاتىن سۋ قۇبىرى, ەكى رەزەرۆۋار, ءۇش سورعى ستانساسى, ديزەل گەنەراتورى, ترانسفورماتورلىق قوسالقى ستانسا سالۋ جوسپارلانعان. كەمەرتوعان اۋىلىنىڭ ينفراقۇرىلىمىن جاڭعىرتۋعا 4,8 ملرد تەڭگە قاجەت. قۇرىلىس اياقتالعان جاعدايدا 20 مىڭعا جۋىق تۇرعىن ساپالى اۋىزسۋمەن قامتىلادى.
ايتا كەتەلىك, قاراساي اۋدانىندا وسى باعىتتاعى جوبالار كەزەڭ-كەزەڭىمەن جۇزەگە اسىپ كەلەدى. قازىردە جاڭاتۇرمىس, قاراتوبە اۋىلدارىندا سۋ جۇيەسىنىڭ قۇرىلىسى ءجۇرىپ جاتىر. ەلتاي, جارمۇحامبەت, شالقار, قايرات اۋىلدارىندا دا جۇمىستار باستالعان. بۇل جوبالارعا 1,7 ملرد تەڭگە بولىنگەن.
