رەكوردتى تىركەۋ بارىسىندا اقتوبە فەرروقورىتپا زاۋىتىنىڭ №43 پەشىندە ءبىر تەحنولوگيالىق تسيكلدا 177 توننا جوعارى كومىرتەكتى فەرروحروم ءوندىرىلدى. №4 تسەحتىڭ پەشتەرى – ءوز ساناتىنداعى الەمدەگى ەڭ قۋاتتى پەشتەردىڭ ءبىرى. زاۋىت ماماندارىنىڭ جۇزەگە اسىرعان بىرەگەي تەحنيكالىق شەشىمدەرىنىڭ ارقاسىندا جابدىق بۇگىنگى كۇنى جوبالىق كورسەتكىشتەردەن جوعارى كۇشپەن جۇمىس ىستەيدى. ەگەر ورتاشا العاندا ءبىر وسىنداي پەش شىعارىلىمدا 50-60 توننا فەرروقورىتپا بەرسە, قازىرگى جاعدايدا ايتارلىقتاي ۇلكەن كولەم جيناقتالدى. بۇل الەمدىك رەكورد رەتىندە بەكىتىلگەن تەڭدەسسىز ناتيجەگە نەگىز بولدى.
رەكورد ورناتۋعا ارنالعان سالتاناتتى راسىمگە اقتوبە وبلىسىنىڭ اكىمى اسحات شاحاروۆ قاتىستى. ول زاۋىت ۇجىمىن جەتىستىكپەن قۇتتىقتاپ, بۇل رەكورد وتاندىق مامانداردىڭ جوعارى بىلىكتىلىگىنىڭ جانە ءوڭىر مەن ەلىمىزدىڭ زور يندۋستريالىق الەۋەتىنىڭ ايقىن دالەلى ەكەنىن اتاپ ءوتتى.
«بۇگىن ءبىز تاريحي وقيعانىڭ كۋاسى بولدىق. اقتوبە فەرروقورىتپا زاۋىتى ءونىم ءوندىرۋ كولەمى بويىنشا الەمدىك رەكورد ورناتتى. العاش رەت № 43 پەشتە ءبىر تەحنولوگيالىق تسيكل بارىسىندا 150 توننادان استام جوعارى كومىرتەكتى فەرروحروم ءوندىرىلدى. تاماشا جەتىستىكپەن زاۋىت ۇجىمىن شىن جۇرەكتەن قۇتتىقتايمىن. بۇل – ناعىز ەڭبەك ادامدارىنا ءتان كاسىبيلىكتىڭ, تاباندىلىقتىڭ, بىرلىكتىڭ جانە رۋحتىڭ جارقىن ۇلگىسى. زاۋىت جۇمىسشىلارى ىستىقتا دا, سۋىقتا دا كۇنى-ءتۇنى ايانباي ەڭبەك ەتىپ, ءوندىرىس كولەمىن الەمدىك دەڭگەيگە جەتكىزدى. كاسىپورىن وتاندىق ونەركاسىپتىڭ حالىقارالىق ستاندارتتارعا ساي عانا ەمەس, سونىمەن قاتار سول ستاندارتتاردى قالىپتاستىرا الاتىن قابىلەتى بار ەكەنىن دالەلدەدى. رەكورد – تەك زاۋىت پەن اقتوبە ءوڭىرىنىڭ جەڭىسى عانا ەمەس, وتاندىق ونەركاسىپتىڭ الەۋەتىنىڭ ايقىن دالەلى», دەدى وبلىس اكىمى.
ايتۋىنشا, بيىلعى جىلدىڭ جۇمىسشى ماماندىقتار جىلى دەپ جاريالانۋى دا بۇگىنگى وقيعانىڭ ماڭىزىن ارتتىرا تۇسەدى. ۇلتتىق قۇرىلتاي وتىرىسىندا پرەزيدەنت قوعامدا ادال ازامات, ياعني ءادىل, جاۋاپتى ءارى ەڭبەكقور ازامات بەينەسىن قالىپتاستىرۋدىڭ ماڭىزىن ەرەكشە اتاپ وتكەن ەدى. اسحات شاحاروۆتىڭ سوزىنشە, وسىنداي جەتىستىكتەر ەڭبەك ادامىنىڭ قوعامداعى قۇرمەتىن ارتتىرۋعا سەپتىگىن تيگىزەدى. بۇل – ناقتى سەكتور مەن مامانداردىڭ جانكەشتى ەڭبەگى ەلىمىزدىڭ ورنىقتى دامۋىنىڭ سەنىمدى تىرەگىنە اينالعانىنىڭ بەلگىسى.
رەكوردتى تىركەۋ تاۋەلسىز ساراپشىلاردىڭ باقىلاۋىمەن, WORLD BOOK OF RECORDS (WBR) وكىلدەرىنىڭ, مەترولوگيالىق قىزمەتتىڭ جانە تەحنيكالىق كوميسسيانىڭ قاتىسۋىمەن ءوتتى. مەتالل شىعارىلىمىنان ونىڭ سالقىنداۋىنا, ولشەۋىنە جانە قۇجاتتالۋىنا دەيىنگى ءاربىر كەزەڭ قاتاڭ تۇردە بەكىتىلدى جانە سەرتيفيكاتتالعان ولشەۋ قۇرالدارىمەن راستالدى.
«بۇل رەكورد – ناعىز تەحنولوگيالىق جەڭىس. بۇل – جاھاندىق سىن-قاتەرلەرگە قاراماستان, ERG ءوز كوشباسشىلىعىن, تۇراقتىلىعىن جانە ءوسۋ الەۋەتىن كورسەتىپ وتىرعانىنىڭ جارقىن بەلگىسى. بۇل جەتىستىكتىڭ ارتىندا تەك مەتالل, ساندار مەن جابدىق قانا تۇرعان جوق, ەڭ الدىمەن, بۇل – ءبىزدىڭ ادامدار. «قازحروم» مەتاللۋرگتەرىنىڭ كاسىبيلىگى, جانكەشتىلىگى مەن ءوز ىسىنە دەگەن سەنىمى مۇمكىن ەمەس دۇنيەنى مۇمكىن ەتتى. ەڭبەك ادامدارىنىڭ جىلى اياسىندا بۇل رەكورد – ەلدىڭ ەكونوميكالىق قۋاتىن كۇن سايىن قالىپتاستىرىپ جۇرگەن جاندارعا دەگەن قۇرمەتتىڭ سيمۆولى», دەدى ERG ديرەكتورلار كەڭەسىنىڭ توراعاسى, باس اتقارۋشى ديرەكتور شۋحرات يبراگيموۆ.
WORLD BOOK OF RECORDS ۇيىمىنىڭ ازيا مەن افريكا ەلدەرى بويىنشا باسشىسى قۋاندىق قۇدايبەرگەنوۆتىڭ ايتۋىنشا, اۋىر ونەركاسىپ سالاسىندا رەكوردتار ءجيى تىركەلە بەرمەيدى, بۇل جولعى جەتىستىك سونىسىمەن ەرەكشە. «بۇل وقيعا ءبىر كاسىپورىننىڭ شەڭبەرىنەن شىعىپ, قازاقستاننىڭ تەحنولوگيالىق بەدەلىن جانە تۇگەل ونەركاسىپ سالاسىنىڭ الەۋەتىن مويىنداۋ» دەيدى ول.
ماراپاتتاۋ ءراسىمى مەتاللۋرگتەر كۇنىنە ارنالعان مەرەكەلىك ءىس-شارالار اياسىندا ءوتتى. رەكوردتى تىركەۋدى راستايتىن قۇجاتتى قابىلداي وتىرىپ, «قازحروم» تۇك اق باس ديرەكتورى سەرگەي پروكوپەۆ زاۋىت كومانداسىنىڭ ۇلكەن جۇمىسىن اتاپ ءوتتى.
«بۇل – باتىل ينجەنەرلىك شەشىمدەر مەن شىنايى كوماندالىق جۇمىستىڭ ناتيجەسى. «قازحرومنىڭ» 30 جىلدىعى مەن قازاقستانداعى جۇمىسشى ماماندىقتار جىلىندا وسىناۋ جاڭالىق ەل ونەركاسىبىنىڭ الەمدىك دەڭگەيدە بولۋى مۇمكىن جانە مىندەتتى ەكەنىن بىلدىرەدى. اقتوبە زاۋىتىنىڭ كومانداسىمەن ماقتانامىن – سىزدەر تەك ماكسيمالدى كولەمدى ءوندىرىپ قانا قويعان جوقسىزدار, سىزدەر تاريحتى جاسادىڭىزدار», دەدى سەرگەي پروكوپەۆ.
ءوز كەزەگىندە №43 رەكوردتىق پەشتىڭ بريگاديرى گەننادي كۋحار ءار شىعارىلىمىمىز – كوماندالىق جۇمىس پەن جوعارى جاۋاپكەرشىلىك. بىراق وسى كۇنى شىن مانىندە ۇلكەن نارسە ىستەپ جاتقانىمىزدى تۇسىندىك. بۇل رەكورد – بارلىق اۋىسىم ءۇشىن, زاۋىت ءۇشىن دەپ پىكىر ءبىلدىردى.
رەكورد ورناتۋ ەلدەگى جۇمىسشى ماماندىقتار جىلى مەن «قازحروم» تۇك اق 30 جىلدىعىنا ورايلاستىرىلعان.
2024 جىلى «قازحروم» 2023 جىلمەن سالىستىرعاندا ءوندىرىس كولەمىن 14%-عا ارتتىرىپ, 1,85 ملن توننادان استام فەرروقورىتپا ءوندىرىپ, كومپانيا تاريحىنداعى ەڭ جوعارى كورسەتكىشكە قول جەتكىزدى.
مەرەكەلىك جيىن سوڭىندا شۋحرات يبراگيموۆ ەل مەتاللۋرگتەرىن ءتول مەرەكەلەرىمەن قۇتتىقتاپ, زور دەنساۋلىق, بەرەكەلى ەڭبەك پەن جارقىن جەڭىستەر تىلەدى.
