اقىنىن ارداقتاپ, قارا ولەڭىن قاستەر تۇتاتىن اۋىل تۇرعىندارىنىڭ وسى ءبىر ەرەكشەلىگى ات باسىن بۇرعان جۇرتتىڭ تاڭدايىن قاقتىرىپ, باسىن شايقاتارى حاق. جاس-كارىسىنە قاراماي ولەڭ سۇراساڭىز, ىركىلمەستەن جىر تيەگىن اعىتادى. بۇل قاسيەتتىڭ نەگىزى نەدە دەگەن ساۋال تۋعان ەدى. ءتۇيىنىن ا.بارمانبەك ۇلى اتىنداعى قاراساز ورتا مەكتەبى جانىنداعى شاعىن ورتالىق بۇلدىرشىندەرى تارقاتىپ بەرگەندەي.
مۇنداعى 3 پەن 5 جاس ارالىعىنداعى 35 بالانىڭ ءاربىرى مۇقاعالي اتالارىنىڭ كەمىندە 2-3 ولەڭىن جاتقا ايتادى. «بالا ءتىلى – بال» دەمەكشى, ءبىرى اسىقپاي, انىقتاپ ايتۋعا تىرىسسا, ەندى ءبىرى تاقىلداپ تۇر. قولىنا كىتاپ ۇستاپ, ءارىپ تانىپ ۇلگەرمەگەن قۇيماقۇلاق بوتاقانداردىڭ بۇل تالاپتارى شىن مانىندە ءتانتى ەتتى. ولاردىڭ اراسىندا جىل سايىن وتەتىن رەسپۋبليكالىق «مۇقاعالي» وقۋلارىنا قاتىسىپ, باس جۇلدە العاندارى دا بار. اقىن ولەڭدەرىن جاتقا ايتاتىن بۇلدىرشىندەردىڭ تالابىن كوزبەن كورىپ, قۇلاقپەن ەستىدىك تە, ءتىل-كوزدەن امان بولۋىن تىلەدىك.
«بالاباقشانىڭ ماقساتى – ءار بالانىڭ قىزىعۋشىلىعىن, ەرەكشەلىگى مەن قاجەتتىلىگىن ەسكەرە وتىرىپ, ولاردى ادامي جانە ۇلتتىق قۇندىلىقتار نەگىزىندە دامىتۋ. بالالاردىڭ تانىمدىق, زياتكەرلىك, شىعارماشىلىق داعدىلارىن قالىپتاستىرۋ جانە تاربيەلەۋ مىندەتىن الدىڭعى ورىنعا قويامىز. شاعىن ورتالىقتاعى
35 بالانىڭ باسىم بولىگى مۇقاعالي ماقاتاەۆتىڭ «قاراساز», «پاي-پاي, ءومىر!», «وتان», «قايران قاراسازىم-اي», «شەشە», «مەن تۋعان جەر قاراساز باۋرايداعى» سياقتى ولەڭ جولدارىن جاتقا بىلەدى. اقىننىڭ بۇل ولەڭدەرى بالالاردىڭ جاتتاۋىنا الدەقايدا جەڭىلىرەك. توپتاعى دارا نۇربول, ءامىر كەمەلبەك, ياساۋي مولدىرامان, ايسۇلتان ورازعالي, ەگىزدەر ايىم مەن اسىلىم ءتۇرسىنالى, ءايبيبى قوجانبەردى, حاسان بولاتجان ۇلى سىندى العىر بالاپاندار بولاشاعىنان ۇلكەن ءۇمىت كۇتتىرەدى. تارىداي بالاپانداردىڭ تاۋداي تالابىن جانىپ, قاناتتاندىرۋدا اتا-انالاردىڭ دا ەڭبەگى زور», دەيدى شاعىن ورتالىقتىڭ اعا تاربيەشىسى قارلىعاش قىدىرباەۆا.
شاعىن ورتالىقتا ورتا جانە ەرەسەك توپتاردا 3 تاربيەشى مەن 1 كومەكشى تاربيەشى جۇمىس ىستەيدى. بالدىرعاندارعا تاقپاق جاتتاتىپ, شىعارماشىلىعىن دامىتۋدا ساندۋعاش يسلاموۆا, گۇلزيرا ءبىرىمتاي, گۇلبادان قۇرمانباەۆالاردىڭ ەڭبەگى زور.
الماتى وبلىسى
