فوتو: egemen.kz/ەرلان ومار
«ادال ازامات» ءبىرتۇتاس باعدارلاماسى «بىرتۇتاس تاربيە» تۇجىرىمداماسىنىڭ جالعاسى. تەك مازمۇنى جاڭارتىلىپ, مەملەكەت باسشىسىنىڭ «ادال ازامات – ادال ەڭبەك – ادال تابىس» يدەولوگيالىق قاعيداسىمەن ۇندەستىرىلگەن.
باعدارلاما ادال, ەڭبەكقور, ەلجاندى ازاماتتار تاربيەلەۋدى كوزدەيدى. تاربيە جۇيەسى جالپىۇلتتىق قۇندىلىقتارعا نەگىزدەلىپ, مەكتەپ, اتا-انا جانە قوعام اراسىنداعى بايلانىستى نىعايتۋعا باعىتتالادى.
«ادال ازامات» اياسىندا بارلىق مەكتەپ ءۇشىن بىرىڭعاي ۆيزۋالدى ستاندارت – برەندبۋك ازىرلەنەدى. مەكتەپتىڭ ىشكى جانە سىرتقى كەلبەتى ۇلتتىق تاربيەلىك قۇندىلىقتار مەن مادەنيەتتى بەينەلەيتىن ورتاعا اينالادى.
مەكتەپتەردەگى تاربيە ءىسى مەملەكەتتىك ورگاندارمەن, قۇقىق قورعاۋ, دەنساۋلىق ساقتاۋ, ىشكى ساياسات سالاسىنداعى قۇرىلىمدارمەن تىعىز جۇرگىزىلەدى.
ى. التىنسارين اتىنداعى ۇبا مالىمەتىنشە, اي سايىن بەلگىلەنگەن تاقىرىپتار ساباق پەن سىنىپتان تىس ءىس-شارالاردى ءبىر-بىرىمەن ساباقتاستىرادى. مىسالى: ادىلدىك, ەڭبەكقورلىق, پاتريوتيزم سىندى قۇندىلىقتاردى وقۋ پروتسەسىنىڭ وزەگىنە اينالدىرۋ جوسپارلانعان. وسى باعىتتا مەكتەپ ومىرىنە «ونەگەلى 15 مينۋت», كۇي اۋەنىمەن قوڭىراۋ سوعۋ, ۇلتتىق ويىندار سەكىلدى جاڭا فورماتتار ەنگىزىلەدى. سونىمەن قاتار, وقۋشىنىڭ مەكتەپ قابىرعاسىنان تىس ومىرلىك تاجىريبەسىن بايىتۋعا دا ەرەكشە كوڭىل بولىنەدى.
سونىمەن قاتار, بۋللينگتىڭ, قۇقىقبۇزۋشىلىق پەن بالالار اراسىنداعى قاۋىپتىڭ الدىن الۋعا باعىتتالعان «تسيفرلىق الەمدە قاۋىپسىز قادام», «بۋللينگتەن قورعان!», «قاۋىپسىز قوعام» جوبالارى جالعاسىن تابادى.
