ەلىمىزدىڭ ۇسىنىسىمەن ەۋرازيالىق ەكونوميكالىق كوميسسيا (ەەك) اۋىل شارۋاشىلىعى ونىمدەرىن وڭدەۋدى دامىتۋعا باعىتتالعان مەملەكەتتىك قولداۋعا تالداۋ جۇرگىزدى. ساۋدا جانە ينتەگراتسيا مينيسترلىگىنىڭ مالىمەتىنشە, قۇجات ەاەو-عا مۇشە مەملەكەتتەردىڭ, باقىلاۋشى ەلدەردىڭ جانە بىرقاتار شەت مەملەكەتتەردىڭ اگرووڭدەۋدى ىنتالاندىرۋ تاجىريبەسىن قامتيدى. شولۋدا ەاەو ەلدەرىندە ۇلتتىق اگرارلىق ساياسات اياسىندا ءتيىمدى قولداۋ شارالارىن قالىپتاستىرۋدا پايدالى حالىقارالىق تاجىريبەگە ەرەكشە نازار اۋدارىلعان. مىسالى, ۇلىبريتانيادا تاماق ونەركاسىبىندەگى ينۆەستيتسيالىق جوبالارعا تىكەلەي قولداۋ باعدارلامالارى ىسكە اسىرىلعان, وعان جابدىقتار مەن ينفراقۇرىلىمعا 40%-عا دەيىنگى گرانتتار مەن وڭدەۋشىلەرگە ارنالعان ەكسپورتتىق قارجىلاندىرۋ كىرەدى. ال گەرمانيا ەت, ءسۇت جانە ناۋبايحانالىق ونەركاسىپتەردى سالىقتىق جەڭىلدىكتەر, ينۆەستيتسيالىق باعدارلامالار مەن ەكسپورتتى ىلگەرىلەتۋ ارقىلى اۋقىمدى قولدايدى. كانادا مەن اقش شاعىن جانە ورتا بيزنەستى قولداۋ شارالارىن: نەسيەلەۋ, جاڭعىرتۋدى سۋبسيديالاۋ جانە فەرمادان دۇكەن سورەسىنە دەيىن قوسىلعان قۇن تىزبەكتەرىن قۇرۋدى قولدانادى. قىتاي اگروونەركاسىپتىك پاركتەر قۇرۋعا جانە اگرووڭدەۋ سالاسىنا يننوۆاتسيالىق تەحنولوگيالاردى ەنگىزۋگە, ونىڭ ىشىندە تسيفرلاندىرۋ مەن وندىرىستىك پروتسەستەردى اۆتوماتتاندىرۋ ەلەمەنتتەرىنە باسىمدىق بەرەدى. مالايزيا مەن تۇركيا ەكسپورتقا باعىتتالعان اگرووڭدەۋدى قولداۋ مىسالدارىن كورسەتىپ, وراۋ, سەرتيفيكاتتاۋ جانە لوگيستيكاعا ارنالعان سۋبسيديالاۋ باعدارلامالارىن ەنگىزگەن.
شولۋدا اۋىل شارۋاشىلىعى ونىمدەرىن وڭدەۋ سالاسىنداعى ەلىمىزدىڭ تاجىريبەسى ۇسىنىلعان. اتاپ ايتقاندا, اۋىل شارۋاشىلىعى ونىمدەرىن وڭدەۋدى دامىتۋ ماقساتىندا بىلتىر 2024-2028 جىلدارعا ارنالعان اوك ونىمدەرىن وڭدەۋدى دامىتۋ جونىندەگى كەشەندى جوسپار بەكىتىلدى. جوسپاردا:
- وڭدەۋگە تاپسىرىلعان اۋىل شارۋاشىلىعى ونىمدەرىنە سۋبسيديا بەرۋ جانە شيكىزات ەكسپورتىن شەكتەۋ ارقىلى قولجەتىمدى شيكىزاتتى قامتاماسىز ەتۋ;
- نەگىزگى جانە اينالىم قاراجاتىن تولىقتىرۋعا ارنالعان نەسيەلەر بويىنشا سىياقى مولشەرلەمەسىن سۋبسيديالاۋ جانە جەڭىلدەتىلگەن نەسيەلەر بەرۋ ارقىلى ءوندىرىستىڭ رەنتابەلدىگىن ارتتىرۋ;
- وڭدەلگەن ءونىمنىڭ ەكسپورتتىق الەۋەتىن جاڭا نارىقتاردى اشۋ ارقىلى ارتتىرۋ سەكىلدى شارالار كوزدەلگەن.
ناتيجەسىندە ەلدەگى اۋىل شارۋاشىلىعى ونىمدەرىن وڭدەۋ ۇلەسى 70%-عا جەتەدى دەپ كۇتىلىپ وتىر. ەلىمىزدىڭ ەكونوميكاسى ءۇشىن اگروازىق-ت ۇلىك سەكتورىنىڭ ماڭىزدىلىعىن ەسكەرە وتىرىپ, شولۋ جوباسى تاراپتارمەن تۇتاستاي ماقۇلدانىپ, ونىڭ نەگىزىندە مۇددەلى مۇشە مەملەكەتتەر ءۇشىن ەەك كوللەگياسىنىڭ ۇسىنىسىنا ءتيىستى جوبا ازىرلەنگەن. قۇجات ەەك-ءتىڭ اگروونەركاسىپتىك كەشەن جونىندەگى كونسۋلتاتيۆتىك كوميتەتىنىڭ وتىرىسىندا ماقۇلدانعان, ەندى اعىمداعى جىلدىڭ ەكىنشى جارتىجىلدىعىندا ەەك كوللەگياسىنىڭ وتىرىسىندا بەلگىلەنگەن تارتىپپەن قابىلداناتىن بولادى.
