ەلباسى استانادا وتكەن اسكەري پارادقا قاتىستى

استانا. 7 مامىر. ەلباسى وتان قورعاۋشىلار كۇنى مەن ۇلى وتان سوعىسىنداعى جەڭىستىڭ 70 جىلدىعىنا ارنالعان اسكەري پارادقا قاتىستى. بۇل تۋرالى akorda.kz حابارلادى. ءىس-شارا بارىسىندا مەملەكەت باسشىسى – قارۋلى كۇشتەردىڭ جوعارعى باس قولباسشىسى پاراد اۆتوكولىگىمەن اسكەري قىزمەتشىلەر ساپىن ارالاپ, پارادتىق ەسەپتوپتارعا امانداستى. نۇرسۇلتان نازارباەۆ بارشا قازاقستاندىقتاردى جانە اسكەري شەرۋگە قاتىسۋشىلاردى وتان قورعاۋشىلار كۇنى جانە ۇلى جەڭىستىڭ 70 جىلدىعىمەن قۇتتىقتادى. «ەكى مەرەكەنىڭ قاتار كەلۋىنىڭ سيمۆولدىق ءمانى بار. بۇل ۇلى وتان سوعىسىنداعى جەڭىمپازدار مەن وتان قورعاۋشىلارىمىزدىڭ بۇگىنگى بۋىنىنىڭ اسكەري داستۇرلەرىنىڭ ساباقتاستىعىن بىلدىرەدى. مايدانداعى اسكەري ەرلىك پەن تىلداعى قاجىرلى ەڭبەك جەڭىستىڭ باستى نەگىزىنە اينالدى. ءبىزدىڭ حالقىمىز ادامزات تاريحىنداعى ەڭ سۇراپىل سوعىستاعى ۇلى جەڭىسكە وشپەس ۇلەس قوستى. سوعىسقا اتتانعان 1 ميلليون 200 مىڭ جەرلەسىمىزدىڭ جارتىسى شايقاس الاڭىندا قازا تاپتى. 500-دەن استام قازاقستاندىق كەڭەس وداعىنىڭ باتىرى اتاندى. سوعىس جىلدارى بۇكىل حالقىمىز تىلداعى ەڭبەككە جۇمىلدى. جاۋعا اتىلعان 10 وقتىڭ توعىزى ءبىزدىڭ ەلىمىزدە جاسالدى. اكەلەرىمىزدىڭ ەرلىگى مەن انالارىمىزدىڭ ەڭبەگى حالقىمىزدىڭ جادىندا ماڭگى ساقتالادى. ءبىزدىڭ جەڭىستەرىمىزدىڭ تاريحى – پاتريوتيزم مەن ەل بىرلىگىنىڭ ناعىز ۇلگىسى», – دەدى قازاقستان پرەزيدەنتى. مەملەكەت باسشىسى سوعىس جانە ەڭبەك ارداگەرلەرىن ۇلى جەڭىس مەرەيتويىمەن قۇتتىقتاپ, ولاردىڭ جاۋىنگەرلىك جانە ەڭبەكتەگى ەرلىگى حالقىمىزدىڭ بارلىق بۋىنى ءۇشىن ماڭگىلىك ەكەنىن, ال ەرلىك ءاردايىم قاسيەتتى بولىپ قالا بەرەتىنىن اتاپ ءوتتى. سونىمەن قاتار, قازاقستان پرەزيدەنتى بەس حالىقتىق رەفورمانى جۇزەگە اسىرۋ جاڭا ۇرپاق ءۇشىن بولاشاقتاعى كوپ جىلدارعا ىلگەرى جول اشاتىنىن ايتتى. «ءبىزدىڭ بارلىق جەتىستىكتەرىمىز – جاڭا بيىكتەرگە باستايتىن ىنتالاندىرۋ. بيىل 20 جىلدىعىن اتاپ ءوتىپ جاتقان كونستيتۋتسيانىڭ ءبىرىنشى ءسوزى: «ءبىز, قازاقستان حالقى» دەپ باستالادى. بۇل – كوپۇلتتى حالىق بىرلىگىنىڭ مىزعىماس فورمۋلاسى. ءبىز ەڭ باستى قۇندىلىقتارىمىزدى – تاۋەلسىزدىكتى, تاتۋلىق پەن تۇراقتىلىقتى عاسىردان-عاسىرلارعا ساقتاۋعا ءتيىسپىز. بارلىق مەملەكەتتىك ينستيتۋتتاردىڭ جانە ءاربىر قازاقستاندىقتىڭ پارىزى – وسى قۇندىلىقتاردى قورعاۋ. وتان قورعاۋشىلاردىڭ الدىڭعى قاتارىندا ءبىزدىڭ ايبارلى قارۋلى كۇشتەرىمىز تۇر», – دەدى نۇرسۇلتان نازارباەۆ. مەملەكەت باسشىسى جوعارعى باس قولباسشى رەتىندە ەلىمىزدىڭ اسكەري قىزمەتشىلەرىنە ءسوز ارنادى. «سىزدەرگە بيىك مىندەت – قازاقستان ەگەمەندىگى مەن ازاماتتاردىڭ تىنىشتىعىن قورعاۋ جۇكتەلگەن. وسى قاسيەتتى پارىزدى ادال ورىنداڭىزدار. بۇگىن ءبىزدىڭ ايبىندى جاۋىنگەرلەرىمىز وسى الاڭنان سالتاناتتى شەرۋ تارتىپ وتەدى. بۇل – ۇلى جەڭىسكە جانە وتان قورعاۋشىلار كۇنىنە كورسەتىلگەن قۇرمەت», – دەدى قازاقستان پرەزيدەنتى. سوڭىندا نۇرسۇلتان نازارباەۆ قازاقستاندىقتاردى تاعى دا مەرەكەمەن قۇتتىقتاپ, ەلىمىزگە تاتۋلىق پەن تىنىشتىق تىلەدى. بۇگىنگى پاراد بۇرىنعىلارعا قاراعاندا كورنەكى, قاتىسۋشىلار سانى جاعىنان ەڭ اۋقىمدىسى بولدى. وعان ەلىمىز قارۋلى كۇشتەرىنىڭ اسكەري قىزمەتشىلەرى مەن اسكەري تەحنيكا سانىنىڭ رەكوردتىق مولشەرى تارتىلعان. اتاپ ايتقاندا, پارادقا 5 000-عا جۋىق اسكەري قىزمەتشى, 200 بىرلىك شاماسىندا قارۋ-جاراق پەن اسكەري تەحنيكا, اسكەري اۆياتسيانىڭ 70 ۇشاعى مەن تىكۇشاعى قاتىستى. قازىرگى زامانعى قازاقستان رەسپۋبليكاسى قارۋلى كۇشتەرىمەن قاتار ۇلى وتان سوعىسى ۋاقىتىنداعى ارميا مەن قارۋ-جاراق تۇرلەرى كورسەتىلدى. وسى ورايدا تۋ ۇستاۋشى توپتاردىڭ قازاقستان رەسپۋبليكاسى مەملەكەتتىك تۋى مەن وسىدان 70 جىل بۇرىن وتانداسىمىز راقىمجان قوشقارباەۆ جانە ونىڭ جاۋىنگەر دوسى گريگوري بۋلاتوۆتىڭ رەيحستاگقا تىككەن تۋىنىڭ ءدال كوشىرمەسى – جەڭىستىڭ قىزىل تۋىن الاڭعا الىپ شىعۋ ەرەكشە ءراسىم تۇرىندە ۇسىنىلدى. جاۋىنگەرلىك تۋ قازاقستانعا ماسكەۋدەگى تاعزىم تاۋىنان اكەلىندى. پاراد بارىسىندا جاياۋ اسكەرلەر مەن اسكەري تەحنيكا شەرۋى ءوتتى. اۆيا-شوۋ ەرەكشە ماڭىزعا يە بولدى. اسكەري ۇشقىشتار جەكە جانە پيلوتاجدى توپ قۇرامىندا جوعارعى پيلوتاج فيگۋرالارىن ورىنداپ, ءوز شەبەرلىكتەرىن كورسەتتى, سونداي-اق, اۋەدە ۇلى جەڭىستىڭ مەرەيتويىن بىلدىرەتىن «70» سانىن جازدى. ەلامان قوڭىر. دەرەك, سۋرەت: akorda.kz.