«بۇل قادام مەملەكەت قاراجاتىن پايدالانۋ تيىمدىلىگىن ارتتىرۋعا مۇمكىندىك بەرەدى. ۇلتتىق كومپانيالاردىڭ شوتتارىندا «قاجەتسىز بوس جاتۋدىڭ» ورنىنا قارجى بيۋدجەتكە قايتارىلادى. ناتيجەسىندە, قاراجات اناعۇرلىم ماڭىزدى جانە شۇعىل مىندەتتەرگە, مىسالى, ۇزاقمەرزىمدى ينۆەستيتسيالىق جوبالاردى ىسكە اسىرۋعا باعىتتالۋى مۇمكىن. مۇنداي ءتاسىل بيۋدجەت قاراجاتىن ماقساتسىز نەمەسە ءتيىمسىز پايدالانۋ تاۋەكەلىن ازايتۋعا, اشىقتىق پەن ەسەپتىلىكتى كۇشەيتۋگە مۇمكىندىك بەرەدى. كۆازيمەملەكەتتىك سەكتور ۇيىمدارى بولىنگەن رەسۋرستاردى جوسپارلاۋ مەن جۇمساۋعا جاۋاپتىلىقپەن قارايتىن بولادى, سەبەبى پايدالانىلماعان قالدىق ەندى جىل سوڭىندا مىندەتتى تۇردە قايتارىلۋعا ءتيىس», دەلىنگەن پالاتا مالىمدەمەسىندە.
ەكونوميست رۋسلان سۇلتانوۆتىڭ ايتۋىنشا, بۇرىن ۇلتتىق كومپانيالار «ۇلگەرمەي قالدىق», «جوبا ءالى باستالمادى», «باعىت وزگەرىپ كەتتى» دەپ سان ءتۇرلى سىلتاۋدى العا تارتىپ, اقشانى قايتارماي كەلسە, ەندى ونداي تۇلكى بۇلاڭعا سالۋعا جول بەرىلمەيدى.
«بيۋدجەت الدەقايدا ء«تىرى» قۇرالعا اينالاتىن بولدى. رەسۋرستار ءارى-ءسارى كۇي كەشپەي, قاجەت جەرگە باعىتتالادى. ماسەلەن, ينفراقۇرىلىمعا, بىلىمگە, دەنساۋلىق ساقتاۋعا نەمەسە شوك جاعدايىنداعى ەكونوميكانى قولداۋعا. كۆازيمەملەكەتتىك سەكتوردىڭ جاۋاپكەرشىلىگى دە ارتادى. «بولاشاقتا ءوسۋدى كوزدەپ» نەمەسە «ساقتىق ءۇشىن» جوسپارلاۋ ەندى بولمايدى: جۇمسامادىڭىز با, ەندەشە قازىناعا قايتارىڭىز. بۇل جالعان سمەتالاردى ازايتىپ, شىنايى بيۋدجەت جۇمىسىنا ىنتالاندىرادى», دەيدى ساراپشى.
بىراق ەسكەرمەي كەتۋگە بولاتىن تاعى ءبىر جايت بار. ول – ۋاقىتشا بوس تۇرعان بيۋدجەت قاراجاتىن ورنالاستىرۋدان تۇسكەن سىياقىنىڭ (پايىزدىق تابىس) ەندى ۇلتتىق كومپانيالارعا ەمەس, مەملەكەتكە وتەتىنى.
«جاڭا بيۋدجەت كودەكسىنىڭ 113-بابىنا سايكەس ۇلتتىق پوشتا وپەراتورى, ەكىنشى دەڭگەيلى بانكتەر نەمەسە وزگە قۇرالدارداعى ۋاقىتشا بوس بيۋدجەت قاراجاتىن دەپوزيتكە ورنالاستىرۋ جانە ينۆەستيتسيالاۋ ارقىلى الىنعان بارلىق كىرىستەر ەندى ۇلتتىق كومپانيالاردىڭ تابىسى بولىپ سانالمايدى جانە ديۆيدەند رەتىندە ەسەپتەلمەيدى. ولار رەسپۋبليكالىق بيۋدجەت كىرىسىنە اۋدارىلادى. بۇرىن مۇنداي قاراجات كوبىنە سول كومپانيالاردىڭ وزىندە قالىپ, بيۋدجەت قاراجاتىنىڭ قالدىعى مەن دەپوزيتتەردەن تۇسكەن سىياقى ەسەبىنەن ء«پاسسيۆتى» تابىس اكەلەتىن. ەندى مۇنداي مۇمكىندىك الىنىپ تاستالدى. مەملەكەت ءىس جۇزىندە ديۆيدەندتىك ساياساتتى اينالىپ ءوتىپ, قارجىلىق ايلا-ارەكەت جاساۋعا مۇمكىندىك بەرەتىن «جولدى» جاۋىپ وتىر. كۆازيمەمسەكتور ءۇشىن قاتاڭ بيۋدجەت ەرەجەسى جۇمىس ىستەيدى. مەملەكەت قارجىسى بوستان-بوسقا ولاردىڭ شوتىندا جاتا بەرمەي, نە ناقتى باعىت نەگىزىندە جۇمسالادى, نە كەرى قايتارىلىپ الىنادى», دەيدى ر.سۇلتانوۆ.
