بۇقارالىق شاراعا ەلىمىزدىڭ بارلىق ايماقتارىنان جۇگىرۋدى اينىماس ادەتكە اينالدىرعان 300-دەن استام سپورتشى قاتىستى. سونىمەن قاتار بولگاريا, رەسەي, بەلارۋس, ۋكراينا, وزبەكستان, قىرعىزستان مەملەكەتتەرىنەن كەلگەن جەلاياقتار دا جارىس جولىنا شىقتى.
ءۇش كۇندىك باسەكەدە 18 بەن 85 جاس ارالىعىنداعى جەڭىل اتلەتتەر بايقاۋ باعدارلاماسىنا سايكەس ونەر كورسەتتى. 18 بەن 34 جاس ارالىعىندا اۋەسقويلار جارىسى, WMA حالىقارالىق ستاندارتتارىنا سايكەس Masters چەمپيوناتى (35+), ءتۇرلى قاشىقتىقتارعا جۇگىرۋ, ەستافەتالار, سەكىرۋلەر, لاقتىرۋلار سىندى سپورت تۇرلەرى بويىنشا جارىس كورىگى قىزدى.
ء«تۋرنيردى ۇيىمداستىرۋداعى ماقساتىمىز – ەلىمىزدىڭ باستى قۇندىلىعى قارتتارعا قۇرمەت, قالىڭ بۇقارانىڭ سپورتپەن اينالىسۋىنا مۇرىندىق بولۋ», دەيدى «قازاقستاندىق Masters Athletic فەدەراتسياسى» رەسپۋبليكالىق قوعامدىق بىرلەستىگىنىڭ باسشىسى تۇرار ابۋتاليەۆ.
جارىسقا الەم, ازيا چەمپيونى سەرگەي پوليكارپوۆ, حالىقارالىق دارەجەدەگى سپورت شەبەرى, 70+ مارافون مارشرۋتىنىڭ قاتىسۋشىسى مارات بالتاباەۆ, كۇلاش تولەباەۆا, ريمما ۆوەۆودينا, ۆالەري ءجۇمادىلوۆ, ليۋبوۆ اسانوۆا سىندى تانىمال سپورتشىلار قاتىستى.
ءتۋرنيردىڭ اشىلۋ سالتاناتىنا الماتى وبلىسى ىشكى ساياسات باسقارماسىنىڭ باسشىسى ەرىك ءابيتوۆ ارنايى قاتىسىپ, قاتىسۋشىلاردى قۇتتىقتادى.
«حالىقارالىق اشىق تۋرنير – سپورتتىق دودا عانا ەمەس, ەلىمىزدەگى بىرلىك پەن كەلىسىمنىڭ, جاستار مەن اعا بۋىننىڭ ساباقتاستىعىنىڭ, سالاماتتى ءومىر سالتى مەن بەلسەندى ۇزاق عۇمىردىڭ ناقتى كورىنىسى, ەلىمىزدىڭ اشىقتىعىنىڭ, دوستىققا, بەيبىتشىلىككە, سپورت ارقىلى بىرىگۋگە دەگەن ۇمتىلىسىنىڭ ايقىن دالەلى. قازاقستان حالقى اسسامبلەياسىنىڭ 30 جىلدىعىنا وراي ۇيىمداستىرىلىپ وتىرعان شارا – ەتنوسارالىق تاتۋلىقتى, قوعامدىق كەلىسىمدى نىعايتۋدىڭ ۇلگىسى. الماتى وبلىسى – ءاردايىم قوعامدىق باستامالارعا, ازاماتتىق قوعام ينستيتۋتتارىنا, ەرىكتىلەر قوزعالىسىنا قولداۋ كورسەتىپ كەلە جاتقان ءوڭىر. ءبىز مۇنداي سپورتتىق-مادەني ءىس-شارالاردى جالعاستىرىپ, جاس بۋىنعا ۇلگى ەتۋگە ارقاشان دايىنبىز», دەدى ەرىك ءازىلجان ۇلى.
سونىمەن قاتار قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆتىڭ قۇتتىقتاۋىن جەتكىزدى. وندا: «قازاقستان حالقى اسسامبلەياسىنىڭ قولداۋىمەن جەڭىل اتلەتيكا, «Master Athletics Kazakhstan» فەدەراتسيالارى بىرلەسىپ وتكىزىپ وتىرعان سپورتتىق شارا – ەتنوستار اراسىنداعى دوستىقتىڭ, بىرلىكتىڭ, ءوزارا قۇرمەتتىڭ جارقىن كورىنىسى. اسسامبلەيا بۇل ءتۋرنيردىڭ قوعامدىق سەرىكتەسى بولا وتىرىپ, سپورت ارقىلى ەلدىك قۇندىلىقتاردى ىلگەرىلەتۋدى ماقسات ەتەدى. «Alatau 2025» ءتۋرنيرى – سپورتتىڭ ءوزارا سەنىم مەن قولداۋعا نەگىز بولا الاتىنىنىڭ ايقىن دالەلى», دەپ جازىلعان.
«اشىق چەمپيوناتتىڭ باعدارلاماسى كاسىپقوي جارىسقا ۇقساس. ءتۋرنيردىڭ ارتىقشىلىعى – باسەكەگە كەز كەلگەن ازامات قاتىسىپ, قازاقستان چەمپيونى اتانا الادى. بۇل جەڭىل اتلەتيكا ەرەجەسىنە ساي جانە رەسمي اتاق بولىپ ەسەپتەلەدى», دەيدى تانىمال سپورتشى ۆالەري ءجۇمادىلوۆ.
اشىق چەمپيوناتتىڭ ەڭ جاسى ۇلكەن قاتىسۋشىسى 84 جاستاعى ۇلان حاسەنوۆ اقساقال. «سپورت – ادامنىڭ دەنساۋلىعىن جاقسارتىپ, ءومىرىن ۇزارتادى. سول سەبەپتى ءبىر مەزگىل جۇگىرىپ, شىنىعىپ تۇرۋدىڭ پايداسى زور. باسكەتبولدان ارنايى كوماندا جاساقتادىم. ويىنشىلاردىڭ ەڭ جاسى 60-تا بولسا, ەڭ ۇلكەنى ءوزىم. وسىعان دەيىن 10 شاقىرىمدىق 10 مارافونعا قاتىستىم», دەيدى ارداگەر-سپورتشى.
العاش رەت 12 ادامنان باستاۋ العان «Alatau 2025» چەمپيوناتىنا قاتىسۋشىلار سانى بيىل 300-دەن اسقان. ەلىمىزدە ءتورتىنشى مارتە ءوتىپ وتىرعانىمەن, سالاماتتى ءومىر سالتىن ناسيحاتتايتىن بۇل جارىس ءتۇرى الەم ەلدەرىندە جارتى عاسىردان بەرى تۇراقتى تۇردە ۇيىمداستىرىلىپ كەلەدى ەكەن.
الماتى وبلىسى
