ءوندىرىستى اشقان ازاماتتار اۋەلى سالانى ەكى جىلداي اسىقپاي زەرتتەپتى. تۇركياعا بارىپ, ماماندارمەن تاجىريبە الماسقان. ەڭ ءبىر ءتيىمدى تۇسى – قاجەتتى شيكىزاتتىڭ 60%-دان استامى وسى ارالدان تابىلعانى. اۋدانداعى تۇز كەن ورنىنداعى ناتري ءحلوريدى قوسپاسى قاجەتتەرىنە جارادى. قالعان 40% شيكىزاتتى تۇركيادان جەتكىزىپ وتىر. بىلتىر «دامۋ» قورىنىڭ قولداۋىمەن جەڭىلدەتىلگەن سۋبسيديا الىپ, كوپتەن جوسپارلاعان جوباسىن ىسكە اسىرۋعا كىرىستى. زاۋىت ديرەكتورى جۇبانىش امانجولوۆ بۇرىن فارماتسەۆتيكا سالاسىندا جۇمىس ىستەپ, كوممەرتسيالىق نىسانداردى جالعا بەرۋمەن دە اينالىسىپتى.
«دەگەنمەن وتاندىق ءوندىرىستىڭ ورنى بولەك قوي. ونى ومىرشەڭ قىلۋ وزىمىزگە بايلانىستى. وسى ءىستى باستاماس بۇرىن تۇركياعا تاپسىرىس بەرىپ, گيگيەنالىق زاتتار شىعاردىق. ءبىراز تاجىريبە تولىستىرىپ, مەملەكەت قولداۋىمەن ءىس باستاپ جاتىرمىز. الدا ىلعال مايلىقتار شىعاراتىن تاعى ءبىر قوندىرعى ورناتۋ جوسپاردا بار. تمد ەلدەرىندە تولىق اۆتوماتتاندىرىلعان ونداي جەلىنىڭ بالاماسى جوق. قاراجاتىن تولەپ, قوندىرعىنىڭ كەلۋىن كۇتىپ وتىرمىز. قازىر 10 ادامدى جۇمىسپەن قامتىپ, تاۋلىگىنە 22 تونناعا دەيىن ءونىم شىعارامىز. ءار اۋدانعا كەدەرگىسىز جەتكىزىلىپ جاتىر. ءبىزدىڭ ءونىمدى تۇتىناتىندار قاتارىندا الماتى مەن استانا دا بار», دەيدى جۇبانىش امانجولوۆ.
تۇرمىستىق حيميا نارىعىندا وتاندىق وندىرۋشىلەر از. مىسالى, وسى زاۋىت – بۇل باعىتتاعى ەلىمىزدەگى ءۇشىنشى زاۋىت.
ارالداعى ءوندىرىس ورنى وكىلدەرى استانادا كورمەگە بارعاندا بۇرىن جۇمىس ىستەپ تۇرعانداردىڭ ءوزى سۇيىق ءتۇرىن عانا شىعاراتىنىن بايقاپتى.
زاۋىت ديرەكتورى قۇرعاق ۇنتاقتىڭ تەحنولوگيالىق ۇدەرىسى كۇردەلى ەكەنىن ايتادى. سوندىقتان ءبىزدىڭ تۇتىنۋشىلار قولداناتىن وسى ءونىمنىڭ 97%-ى سىرت مەملەكەتتەردەن كەلەدى.
ء«بىزدىڭ باستاما – يمپورتتى الماستىراتىن جوبا. وسى ارقىلى رەسەيدەن كەلىپ جاتقان ونىمدەر ۇلەسىن ازايتقىمىز كەلەدى. تاعى ءبىر ايتا كەتەرلىگى, ءبىز وكتان سانى بويىنشا 15 اكتيۆكە دەيىن ءونىم شىعارا الامىز. سىرتتان وسىنداي ساپاداعى تاۋار كەلسە كەدەندىك باج سالىعىنان ونىڭ قۇنى اسپانداپ, ەشكىم الماي قويادى. سوندىقتان ولار وكتان سانى بار بولعانى 5 اكتيۆتىك ءونىمىن كىرگىزىپ وتىر. سونىڭ وزىندە باعاسى ولاردان 3 ەسە ساپالى ءبىزدىڭ تاۋارمەن بىردەي. «Easy Life» جانە «Aral» برەندتەرىمەن شىعاتىن ءبىزدىڭ ءونىم باسەكەگە قابىلەتتى دەپ سەنىممەن ايتا الامىز. استانا قالاسىندا وتكەن كورمەگە اپارعان 3 توننا تەز ءوتىپ كەتتى. الدا وتاندىق وندىرۋشىلەردىڭ بىرىڭعاي رەەسترى قالىپتاسسا, جۇمىسىمىز جاندانا تۇسەدى دەگەن ءۇمىت بار», دەيدى كاسىپكەر.
وڭىردە 2022–2024 جىلدارى كاسىپكەرلىكتى قولداۋعا ءتۇرلى كوزدەردەن 206 ملرد تەڭگە ينۆەستيتسيا تارتىلىپ, 16 700 جوبا قارجىلاندىرىلعان. «Ase Invest» – وسىنداي قولداۋ ناتيجەسىندە جۇمىسىن باستاعان جوبالاردىڭ ءبىرى. جەرگىلىكتى شيكىزاتتى پايدالانىپ, وڭدەۋ ونەركاسىبىنىڭ دامۋىنا ۇلەس قوساتىن ءوندىرىس ورنى جەرگىلىكتى ازاماتتاردى تۇراقتى جۇمىسپەن قامتاماسىز ەتەدى. ىلعال مايلىق شىعاراتىن قوندىرعى ىسكە قوسىلعاندا, زاۋىت جۇمىسشىلارىنىڭ قاتارى 30 ادامعا جەتەدى.
قىزىلوردا وبلىسى,
ارال اۋدانى
