ادىلەت مينيسترلىگى ازاماتتاردىڭ قارجىلىق شىعىنىن جانە ۋاقىتىن ۇنەمدەۋ, قىزمەتتەردىڭ ساپاسى مەن قول جەتىمدىلىگىن ارتتىرۋ ماقساتىندا بىرقاتار قىزمەتتى تسيفرلاندىرعان. ماسەلەن, مينيسترلىكتىڭ رەسمي وكىلى تالعات ءۋاليدىڭ ايتۋىنشا, بۇرىن نوتاريۋستار اتقارۋشى جازبالاردى قاعاز تۇرىندە بەرىپ كەلسە, قازىرگى ۋاقىتتا اتقارۋشىلىق جازبالار ەلەكتروندىق فورماتتا رەسىمدەلەدى. نوتاريۋستىڭ ەلەكتروندىق تسيفرلىق قولتاڭباسى قويىلعان بۇل قۇجاتتاردىڭ زاڭدى كۇشى بار.
«نوتارياتتىق جازبالاردى ورىنداۋدىڭ تسيفرلىق جوباسى اشىقتىقتى, بارلىق ءىس-ارەكەتتى تىركەۋدى جانە تاراپتاردىڭ قۇقىقتارىن قورعاۋدى قامتاماسىز ەتەدى. جەكە كابينەت قۇرىلىپ, سول ارقىلى بورىشكەردىڭ حابارلاما جانە قارسىلىق جولداماسىن الۋ مۇمكىندىگى بار. ازاماتتار تاراپىنان نەگىزدى قارسىلىق بولعان جاعدايدا نوتاريۋس اتقارۋشىلىق جازبانىڭ كۇشىن جويۋعا مىندەتتى», دەدى ت.ءۋالي.
مينيسترلىكتىڭ «Digital Justice» جوبالار پورتفەلى اياسىندا قولدانىسقا ەنگىزگەن بۇل جوباسىن ازاماتتار وڭ باعالاپ جاتىر. ماسەلەن, وسى جىلدىڭ 31 ناۋرىزىنان باستاپ قازىرگى كەزگە دەيىن 32 مىڭنان اسا اتقارۋشىلىق جازبانىڭ كۇشى جويىلعان.
سونداي-اق ادىلەت مينيسترلىگىنىڭ رەسمي وكىلى اۆتورلار قۇقىقتارىنىڭ اشىقتىعى مەن قورعالۋىن قامتاماسىز ەتۋ, اۆتورلىق جانە ساباقتاس قۇقىقتاردى ۇجىمدىق باسقارۋ ماقساتىندا تسيفرلىق پلاتفورما ەنگىزىلەتىنىن مالىمدەدى.
«بۇل پلاتفورما جۇزەگە اسقاندا اۆتورلار جەكە كابينەتتەرىنە كىرىپ, تۋىندىلارىنىڭ قاي جەردە قانشالىقتى ورىندالىپ جاتقانىن, قانداي تولەماقى تيەسىلى ەكەنىن جانە جىل سوڭىندا قانشا قاراجات الاتىنىن ونلاين رەجىمدە باقىلاۋعا مۇمكىندىك الادى», دەدى سپيكەر ءوز سوزىندە.
وسى جارتىجىلدىقتا ادىلەت مينيسترلىگىنە قاراستى ادىلەت ورگاندارى زياتكەرلىك مەنشىك قۇقىعىن قورعاۋ ماقساتىندا بىرنەشە تەكسەرۋ جۇرگىزگەن. سونىڭ ناتيجەسىندە 138 زاڭ بۇزۋشىلىق انىقتالىپ, اقبتك-ءنىڭ 158-بابىمەن 142 ءىس قوزعالعان. زاڭسىز اينالىمنان 78 711 كونترافاكتىلىك ءونىم تاركىلەنگەن. مينيسترلىك الداعى ۋاقىتتا وسى باعىتتاعى جۇمىسىن جالعاستىرا بەرمەك.
سونداي-اق مينيسترلىك وكىلدەرى وتاندىق كاسىپكەرلەر 150-گە جۋىق گەوگرافيالىق نۇسقامانى تىركەگەنىن مالىمدەدى. ەلىمىزدىڭ ءار ايماعى ءوزىنىڭ بىرەگەي ونىمدەرىمەن ەرەكشەلەنەدى. ماسەلەن, الماتى وبلىسى باقاناس كۇرىشى, تالعار المۇرتى, نارىنقول كارتوبى سياقتى ونىمدەردى ماقتانىش تۇتادى. اتىراۋ وبلىسى ءوزىنىڭ كەپتىرىلگەن تورتا بالىعىمەن تانىمال.
«بۇگىندە قازاقستاندا «سارىارقا ساۋمالى», «اتىراۋ دومبىراسى», «قارعالى تارىسى», «قاراعاندى بالمۇزداعى» جانە ت.ب اتاۋلارمەن جاڭا گەوگرافيالىق نۇسقامالار تىركەلدى. گەوگرافيالىق نۇسقامالاردىڭ ودان ءارى قازاقستاننىڭ ۇلتتىق برەندىن قالىپتاستىرۋعا جانە ەلىمىزگە تۋريستەردى تارتۋعا ىقپالى زور», دەدى ادىلەت مينيسترلىگىنىڭ رەسمي وكىلى.
ادىلەت مينيسترلىگىنىڭ قوعامدىق ءتارتىپ سالاسىنداعى زاڭناما دەپارتامەنتىنىڭ ديرەكتورى دۋمان سۇلەيمەنوۆ اۋە كەمەسىن باسقارۋعا كەدەرگى جاساۋ, ستالكينگ جانە ەركىنەن تىس نەكە قيدىرۋ سەكىلدى جاعداياتتارعا قاتىستى قىلمىستىق زاڭناماعا بىرقاتار وزگەرىس ەنگىزىلەتىنىن حابارلادى. بۇل قادامدار ازاماتتار مەن كاسىپكەرلەردىڭ قۇقىقتارىن قورعاۋدى كۇشەيتۋگە, قىلمىستىق پروتسەستەگى ۇيلەسىمدىلىكتى نىعايتۋعا, سونداي-اق قىلمىستىق پروتسەستى وڭتايلاندىرۋ مەن بيۋروكراتيانى ازايتۋعا باعىتتالماق.
سونىمەن قاتار ادىلەت مينيسترلىگى اليمەنت ءوندىرۋ سالاسىنا دا تۇراقتى باقىلاۋ جۇرگىزەدى. سپيكەرلەردىڭ مالىمەتىنە قاراعاندا, قازىرگى ۋاقىتتا اليمەنت ءوندىرۋ بويىنشا 319 مىڭ ءىس قارالىپ جاتىر. بورىشكەرلەردىڭ 310 مىڭنان استامى – ەر-ازاماتتار, ال 8 مىڭنان استامى – ايەلدەر. مينيسترلىك وكىلى اليمەنتتىك تولەمدەر كوپ جاعدايدا جۇمىس بەرۋشىلەردىڭ ەسەپ بولىمدەرى ارقىلى اي سايىن وندىرىلەتىنىن, بانك شوتتارىنا, مۇلكىنە تىيىم سالۋ جانە ەلدەن شىعۋعا ۋاقىتشا شەكتەۋ قويۋ سياقتى شارالار قولدانىلاتىنىن تىلگە تيەك ەتتى. مينيسترلىكتىڭ رەسمي وكىلى تالعات ءۋاليدىڭ ايتۋىنشا, ادىلەت ورگاندارى بورىشكەرلەردى جۇمىسقا ورنالاستىرۋ جۇمىسىن دا جۇرگىزەدى. ماسەلەن, 2025 جىلدىڭ ءبىرىنشى جارتىجىلدىعىندا ادىلەت ورگاندارى مەن اكىمدىكتەردىڭ بىرلەسكەن جۇمىسىنىڭ ارقاسىندا 3 077 بورىشكەر جۇمىسقا ورنالاسقان.
