«كوپ ادام بۇل جازۋلاردى جاي گراففيتي دەپ قابىلدايدى. ال شىن مانىندە, ولار جاستاردى Telegram ارقىلى ەسىرتكىگە تارتاتىن ارنالاردىڭ سىلتەمەسى ەكەنىن بىلە بەرمەيدى. ءبىز كەيىنگى ءبىر ايدا وبلىس اۋماعىنان 500-دەن اسا وسىنداي جارنامانى وشىردىك. ونىڭ ىشىندە مەكتەپ ماڭىندا ورنالاسقاندارى دا بولدى», دەيدى جوبانىڭ ۇيلەستىرۋشىسى ادىلەت ايتقازى.
ۇيىمداستىرۋشىلاردىڭ ايتۋىنشا, بۇگىندە «Saqtan» جوباسى اياسىندا جاستارمەن تىكەلەي جۇمىس ىستەيتىن 50-گە جۋىق ەرىكتى مەن بىلىكتى مامان تارتىلعان. ولار كۇن سايىن الەۋمەتتىك جەلىلەردى باقىلاپ, جاسىرىن ەسىرتكى جارناماسىن انىقتاپ, جەرگىلىكتى جاستارمەن ءتۇسىندىرۋ جۇمىسىن جۇرگىزىپ كەلەدى.
ء«بىز كۇنىنە كەمىندە 10–15 كۇماندى سىلتەمەنى انىقتايمىز. كوپ جاعدايدا ولار Telegram-ارنالار ارقىلى تاراتىلىپ, جاستاردى قىزىقتىراتىن اتاۋلارمەن بۇركەمەلەنەدى. جارنامالار مەكتەپ قابىرعاسىنا, ايالداماعا نەمەسە جاتاقحانا ماڭىنا جازىلادى. سول ءۇشىن الەۋمەتتىك جەلىنى دە, كوشەنى دە قاتار باقىلاۋعا تۋرا كەلەدى», دەيدى ەرىكتىلەر توبىنىڭ ۇيلەستىرۋشىسى ارايلىم بەكوۆا.
سونىمەن قاتار كامەلەتكە تولماعانداردىڭ تۇنگى ۋاقىتتا باقىلاۋسىز ءجۇرۋىنىڭ الدىن الۋ ماقساتىندا ەرىكتىلەر قۇقىق قورعاۋ ورگاندارىمەن بىرگە تۇنگى رەيدتەرگە قاتىسۋدى جولعا قويعان. بۇل شارالار دا جوبانىڭ ماڭىزدى باعىتى رەتىندە جالعاسىپ جاتىر.
جوبا اياسىندا قاراساي, تالعار, ىلە, جامبىل, ەڭبەكشىقازاق اۋداندارى مەن قوناەۆ قالاسىندا 7 سەمينار وتكىزىلىپ, 1 مىڭعا جۋىق جاس پەن اتا-انا قامتىلدى. كەزدەسۋلەردە ەسىرتكى قىلمىسىنا قارسى كۇرەس جۇرگىزىپ جۇرگەن پوليتسەيلەر, پسيحياتر-ناركولوگتەر, دەپۋتاتتار, سپورت چەمپيوندارى مەن ەسىرتكىگە تاۋەلدىلىكتەن ارىلعان ازاماتتار قيسىق جولعا ءتۇسۋدىڭ قيىندىعىن مىسالعا كەلتىرىپ, زياندى ادەتتەردىڭ الدىن الۋ جولدارىن ءتۇسىندىرىپ, جاستارمەن اشىق پىكىر الماستى.
الماتى وبلىستىق جاستار ساياساتى ماسەلەلەرى جونىندەگى باسقارماسىنىڭ قولداۋىمەن جۇزەگە اسىرىلىپ جاتقان بۇل جوبانىڭ باستى ماقساتى – جاستار اراسىندا ناشاقورلىق, سۋيتسيد, ۆەيپينگ جانە قۇمار ويىندار سىندى زياندى ادەتتەردىڭ تارالۋىنا قارسى تۇرۋ جانە ولاردىڭ الدىن الۋ.
الماتى وبلىسى
