قاراعاندى وبلىسى بيىلعى تۋريستىك ماۋسىمدا 500 مىڭعا جۋىق ءتۋريستى قابىلداۋعا دايىن. بالقاش قالاسىنىڭ اكىمى ساپار ساتاەۆتىڭ مالىمدەۋىنشە, وتكەن جىلدىڭ قورىتىندىسى بويىنشا تۋريزم سالاسىنداعى نەگىزگى كورسەتكىشتەر تۇراقتى ءوسىم كورسەتىپ وتىر.
تۋريستەرگە قولايلى جاعداي جاساۋ ماقساتىندا ءموبيلدى قوسىمشالار, QR-گيدتەر, باعىتتاۋشى, اقپاراتتىق بەلگىلەر ەنگىزىلىپ جاتىر. ينفراقۇرىلىم مەن قىزمەت ساپاسىنىڭ ارتۋى ناتيجەسىندە وڭىرگە كەلەتىن تۋريستەر سانى جىل سايىن 10-15%-عا ءوسىپ كەلەدى. تۋريزم سالاسىنداعى شاعىن جانە ورتا بيزنەس سۋبەكتىلەرى دە 10%-دان استامعا ارتقان.
فەستيۆال اياسىندا ەكى كۇن بويى ينفوتۋر ءوتتى. وعان رەسپۋبليكالىق, وڭىرلىك بۇقارالىق اقپارات قۇرالدارىنىڭ وكىلدەرى, تانىمال ترەۆەل-بلوگەرلەر مەن تۋروپەراتورلار قاتىستى. ينفوتۋردىڭ مۇنداعى ماقساتى – ءوڭىردىڭ تۋريستىك الەۋەتىن ىلگەرىلەتۋ, فەستيۆالدىڭ تانىمالدىلىعىن ارتتىرۋ. تۋرعا قاتىسۋشىلار ەلىمىزدەگى العاشقى «QAZ ELI» ونلاين برونداۋ جۇيەسىمەن تانىستى. بۇل پلاتفورما قوناقۇي, پاتەر, دەمالىس ورىندارى, پانسيونات, ەكسكۋرسيا, كولىك قىزمەتتەرىن ونلاين تۇردە برونداۋعا مۇمكىندىك بەرەدى.
باعدارلاما اياسىندا قاتىسۋشىلار «Balkhash Tour Fest» اۋماعىنا, بەكتاۋاتاداعى كوركەم ەتنواۋىلعا, سونداي-اق بالقاش ءوڭىرىنىڭ مادەني, تابيعي مۇراسىن تانىتاتىن, تانىستىراتىن نەگىزگى تۋريستىك نىساندارعا باردى.
«تۋريزمدەگى يننوۆاتسيالار» اتتى سەميناردا ىشكى ءتۋريزمدى دامىتۋ جولدارى, تسيفرلىق شەشىمدەر مەن كاسىپكەرلىكتى قولداۋ تەتىكتەرى قارالدى. بالقاش قالاسىنىڭ اكىمى س.ساتاەۆ جىل سايىن ەلىمىزدە شاعىن جانە ورتا بيزنەستى قولداۋعا باعىتتالعان جۇمىس جۇيەلى تۇردە جۇرگىزىلىپ, مەملەكەت باسشىسىنىڭ تاپسىرماسى اياسىندا بالقاش قالاسىندا دا كاسىپكەرلىك سالاسىن دامىتۋعا ەرەكشە كوڭىل ءبولىنىپ وتىرعاندىعىن باياندادى.
– ءىس-شارا بارىسىندا وتكەن جىلى 25 ساۋدا ورنى جۇمىس ىستەسە, بيىل ولاردىڭ سانى 90-عا جەتتى. بۇل – قالاداعى ىسكەر ازاماتتاردىڭ بەلسەندىلىگى مەن مەملەكەت تاراپىنان جاسالىپ جاتقان قولداۋدىڭ ناقتى كورىنىسى. «Tوur Fest» اياسىندا جەرگىلىكتى كاسىپكەرلەردىڭ 40-تان استام پاۆيلونى اشىلىپ, حالىققا ونىمدەرىن ۇسىندى. بۇل – بيزنەستىڭ تۋريزممەن تىعىز بايلانىسىنىڭ ناقتى مىسالى. قالا اكىمدىگى تاراپىنان فەستيۆال وتكىزۋگە بارىنشا قولداۋ كورسەتىلىپ, لوگيستيكا, قاۋىپسىزدىك شارالارى, سانيتارلىق تالاپتار تولىق قامتاماسىز ەتىلىپ وتىر, – دەدى شاھار باسشىسى.
فەستيۆال «تازا قازاقستان» ۇلتتىق جوباسى اياسىنداعى ءتۇرلى ەكولوگيالىق باستامالارمەن ەرەكشەلەندى. اتاپ وتسەك, قاراعاندى وبلىسى جاستار رەسۋرستىق ورتالىعىنىڭ باستاماسىمەن 60 ەرىكتى بالقاش وڭىرىندە «ROAD-ەستافەتا» وتكىزدى. ولار «قاراعاندى-الماتى» اۆتوجولىنىڭ بويىن تۇرمىستىق قالدىقتان تازارتىپ, ەسكەرتۋ تاقتايشالارىن ورناتتى. سونىمەن قاتار بەكتاۋاتا جارتاسىنداعى جازۋلاردى ءوشىرىپ, تابيعي, مادەني مۇراعا قۇرمەت كورسەتۋدىڭ ۇلگىسىن كورسەتتى. «ەكىنشى ءومىر» جوباسى دا ەرەكشە نازار اۋدارتتى. ارنايى ورناتىلعان الىپ بالىق-ينستاللياتسيانىڭ ىشىنە قاتىسۋشىلار پلاستيك بوتەلكەلەر تاستاپ, قوقىستى سۇرىپتاۋعا قاتىستى.
سونىمەن قاتار ءىس-شارا اياسىندا فۋد-كورت جانە قولونەر جارمەڭكەسى ۇيىمداستىرىلىپ, بالقاشتىڭ قولونەرشىلەرى ءوز بۇيىمدارىن تانىستىردى. اسىرەسە ۆەرا حاركەۆيچ پەن ۇلى تيموتەنىڭ قيىرشىق تاستان قۇرالعان Tic-Tac ويىنىن كوپشىلىك قىزىعا وينادى.
ەكولوگيالىق كروسس-جارىستار (ەكوكروسستار) – تابيعاتتى قورعاۋ مەن سالاماتتى ءومىر سالتىن ناسيحاتتاۋدىڭ جارقىن ۇلگىسى. زۋمبا مەن يوگا جاتتىعۋلارىنا قاتىسقانداردىڭ دا قاراسى قالىڭ بولدى. بالالار قۇمنان ساراي تۇرعىزدى. باتپىراۋىق ۇشىرۋ سايىسى اسپانداعى ءتۇرلى-ءتۇستى بەينەلەرمەن بالقاشتىڭ كوگىن كوركەمدەدى.
قوناقتار بەكتاۋاتاعا دا بارىپ, اتقا ءمىنۋ, سيىر ساۋ, ساداق اتۋ سياقتى اۋىل تىرشىلىگىمەن تانىستى. سونىمەن قاتار كەشكى ۋاقىتتا ۇيىمداستىرىلعان اشىق اسپان استىنداعى كينوسەانس پەن مۋزىكالىق قويىلىمدار جاعالاۋداعى كەشتىڭ ءسانىن كەلتىردى.
فەستيۆالدىڭ گالا-كونتسەرتىندە نازيما, Qanay, «كيليماندجارو» توبى, «اراي» توبى, جانبولات ۇزاقباەۆ, «توقىراۋىن تولقىندارى» ءانسامبلى ونەر كورسەتتى. «بالقاش كولىنىڭ اڭىزى» اتتى سۋ ەكرانىنا نەگىزدەلگەن مۋلتيمەديالىق سۋبۇرقاق شوۋ فەستيۆالدىڭ جاڭالىعى بولدى.
سۋ قويىلىمى مۋزىكانى, جارىقتى, انيماتسيانى بىرىكتىرىپ, قوناقتارعا ەرەكشە كوڭىل-كۇي سىيلادى.
فەستيۆالدە ەرەكشە تاعامدار ازىرلەنىپ, اسپازدار سايىسقا ءتۇستى. سالماعى 53 كيلو قازىبۋرگەر كوپشىلىكتىڭ قىزىعۋشىلىعىن تۋدىردى. بۇل ەرەكشە جوبانى بالقاش نان زاۋىتى مەن «باۋىرداق» مەيرامحاناسى بىرلەسىپ ازىرلەدى. ۇلتتىق تاعام مەن زاماناۋي فورماتتى ۇيلەستىرگەن بۇل بۋرگەردىڭ قۇرامىنا ءداستۇرلى قازى, ارنايى پىسىرىلگەن الىپ بۋرگەر نانى, كوكونىستەر, دامدەۋىشتەر قوسىلدى. مەيماندار ەرەكشە تاعامنىڭ ءدامىن تاتىپ كوردى. ءدامى مەن كورىنىسىنە جوعارى باعا بەرىپ, الەۋمەتتىك جەلىلەردە اسەرلەرىمەن ءبولىستى.
ەكى كۇنگە سوزىلعان تۋريزم تويىنىڭ سوڭى بالقاش اسپانىنداعى ءتۇرلى-ءتۇستى وتشاشۋمەن اياقتالدى. ۇيىمداستىرۋشىلار كەلەسى جىلى فەستيۆال اياسىن كەڭەيتىپ, بۇدان دا اسەرلى باعدارلامالارمەن تاڭقالدىرۋدى جوسپارلاپ وتىر.
بالقاش قالاسىنا العاش رەت كەلگەن ءماجىلىس دەپۋتاتى داۋلەت مۇقاەۆ مۇنداي باستامالاردىڭ ەلىمىزدىڭ وڭىرلەرىن تانىمال ەتۋگە, جاس بۋىننىڭ ەلگە دەگەن قىزىعۋشىلىعىن ارتتىرۋعا قوسار ۇلەسىن ەرەكشە اتاپ ءوتتى.
– بالقاش قالاسىنا ءبىرىنشى رەت كەلىپ وتىرمىن. «Balkhash Tour Fest» سىندى جوبالار – ەلىمىزدىڭ ىشكى ءتۋريزمىن دامىتۋدىڭ ناقتى مىسالى, جاستارعا تۋعان جەردىڭ كيەسىن, سۇلۋلىعىن تانىتۋ, ولاردىڭ بويىندا تۋريزم مادەنيەتىن قالىپتاستىرۋ جولىنداعى ماڭىزدى قادام. وسىنداي ءىس-شارالار ارقىلى وڭىرلەردىڭ الەۋەتى ارتىپ, ۇلتتىق بىرەگەيلىك نىعايادى, – دەدى د.مۇقاەۆ.
قاراعاندى وبلىسى,
بالقاش قالاسى
