ەلىمىزدە ءتورتىنشى رەت وتكىزىلگەن تۋرنيرگە قىزىعۋشىلىق جىلدان-جىلعا ارتىپ كەلەدى. بۇل بۇقارالىق سپورت پەن سالاماتتى ءومىر سالتىنا دەگەن حالىقتىڭ ەرەكشە ىنتاسىن كورسەتەدى. بيىلعى جارىستىڭ باستى جاڭالىعى – ەرەكشە قاجەتتىلىگى بار 15 بالانىڭ قاتىسۋى بولدى. ءار بالاعا تاجىريبەلى جۇزگىشتەن ارنايى سەرىك بەكىتىلدى. سولاردىڭ ءبىرى – تانىمال زاڭگەر, 2019 جىلى لا-مانش بۇعازىن جالعىز ءجۇزىپ وتكەن العاشقى وتانداسىمىز
ەرجان ەسىمحانوۆ.
«بۇگىن مەن تۇمار مۇراتقىزىن الىپ ءجۇردىم. ول – ناعىز قايسار قىز, 500 مەتردى ءساتتى ءجۇزىپ شىقتى. الەمنىڭ تۇكپىر-تۇكپىرىنەن كەلگەن ءارتۇرلى جاستاعى ادامداردى بىرىكتىرگەن بۇل بىرىنشىلىكتىڭ باستى قۇندىلىعى – اشىقتىعى مەن قولجەتىمدىلىگى», دەدى ە.ەسىمحانوۆ.
ەرەسەكتەر اراسىنداعى «Inspiration» ساناتىنداعى 2 شاقىرىمدىق قاشىقتىقتا ەلىمىزدىڭ العاشقى پاراليمپيادا چەمپيونى, ۇلتتىق قۇرامانىڭ كاپيتانى ءزۇلفيا عابيدۋللينا جۇلدەگەر اتاندى.
«بيىل 59 جاسقا تولدىم. بىراق سپورتتان كەتۋدى ويلاپ جۇرگەن جوقپىن. قىركۇيەكتە سينگاپۋردە وتەتىن الەم چەمپيوناتىنا قىزۋ دايىندالىپ جاتىرمىن. جاس سپورتشىلارعا ايتارىم – ەشقاشان توقتاماڭدار, العا ۇمتىلىڭدار. باپكەرلەرىڭدى ەستەن شىعارماڭدار, ولاردىڭ ەڭبەگىن باعالاڭدار», دەيدى قۇراما كاپيتانى.
5 شاقىرىمدىق «Half oceanman» جارىسىنىڭ 20–29 جاس ساناتىندا ستانيسلاۆ رەدكو جەڭىسكە جەتتى. سۋدا ءجۇزۋ شەبەرى استانادا جاتتىقتىرۋشى بولىپ قىزمەت ەتەدى, بۇرىنىراقتا اشىق سۋدا جۇزۋدەن ەل چەمپيونى اتانعان.
«شەبەر» ساناتىندا تاجىريبەلى سپورتشىلارىمىز ءتورت التىن مەدالدىڭ ۇشەۋىن يەلەندى. ايەلدەر اراسىندا اشىق سۋدا جۇزۋدەن سپورت شەبەرى, ورتا ازيا ويىندارىنىڭ كۇمىس جۇلدەگەرى, سۋاستى باعدارلاۋدان الەم كۋبوگىنىڭ قولا جۇلدەگەرى يرينا لازارەۆا ءابسوليۋتتى جەڭىمپاز بولىپ تانىلدى. الماتىلىق سپورتشى قوناەۆتاعى جارىسقا ءۇشىنشى جىل قاتىسىپ وتىر. ءۇش رەتتە دە جەڭىمپازدار قاتارىنان كورىندى.
10, 5 شاقىرىمدىق قاشىقتىقتا جەرلەستەرىمىز لەۆ چەرەپانوۆ پەن عازيزا قۇماقباەۆا ءابسوليۋتتى چەمپيون اتاندى. 2 شاقىرىم قاشىقتىقتاعى «Sprint» ساناتىندا بىرىككەن اراب امىرلىكتەرىنەن كەلگەن رودريگو مالان مەن وتانداسىمىز تايسيا كوروتكوۆا جەڭىسكە جەتتى.
«Oceanman» – الەمنىڭ ءارتۇرلى ەلىندە وتەتىن بىرنەشە كەزەڭنەن تۇراتىن حالىقارالىق جارىس. ماۋسىم سوڭىندا فينالدىق جارىس ۇيىمداستىرىلادى. ءار كەزەڭدە ۇزدىك شىققان 10 ەر, 10 ايەل سپورتشى فينالعا جولداما الادى. بيىلعى فينالدىق سىن جەلتوقسان ايىندا دۋبايدا وتەدى.
الماتى وبلىسى
