قازاقستاندا اۋىر اتلەتيكادان حالىقارالىق جارىستار ۇزاق ۋاقىتتان بەرى ۇيىمداستىرىلماعان ەدى. سوڭعى رەت اۋقىمدى تۋرنير 2014 جىلى الماتىدا وتكەن بولاتىن. ول كەزدە 76 ەلدەن كەلگەن 700-گە جۋىق اتلەت الەم چەمپيوناتىندا باق سىنادى. سول جولى ءبىزدىڭ قۇراما كوماندالىق ەسەپتە ءتورتىنشى ورىندى يەلەنىپ, ءۇش التىن, ءبىر كۇمىس جانە ءبىر قولا مەدالعا قول جەتكىزگەن ەدى.
ارادا ون جىل وتكەن سوڭ, شەتەلدىك اتلەتتەر قازاقستاندىق تۇعىرعا قايتا ورالدى. استانادا وتكەن ازيا چەمپيوناتىندا 27 قۇراما مەدالدار ءۇشىن تالاستى. زىلتەمىرشىلەردىڭ جالپى سانى 450-دەن استى. بۇل قۇرلىقتىق بىرىنشىلىكتىڭ اۋقىمىن ارتتىرىپ, جارىستىڭ دەڭگەيىن جوعارى ءارى تارتىستى ەتتى. وسى ورايدا, جارىس قوجايىنى رەتىندە قازاقستان قۇراماسى دا ەڭ كوپ سپورتشىمەن ونەر كورسەتتى.
- ازيا چەمپيوناتىنا دايىندىق جوعارى دەڭگەيدە ءوتتى. ناۋرىز ايىنان بەرى التى وقۋ-جاتتىعۋ جيىنىن وتكىزدىك. سوڭعىسى الماتى وبلىسىندا ۇيىمداستىرىلدى. ءبىز تەك ناتيجەگە جۇمىس ىستەدىك. سپورتشىلارىمىز بار كۇشىن سالىپ دايىندالدى. اۋىر اتلەتتەردىڭ 100 پايىز دايىن ەكەنىنە سەنىمدى بولدىق, – دەدى باس باپكەر البەرت حاكيمۋلين.
ناتيجەسىندە باپكەرلىك قۇرامنىڭ بولجامى تولىقتاي اقتالدى. ءبىزدىڭ قۇراما مەدالدىق ەسەپتە جەڭىمپاز اتاندى. جەتى رەت سپورتشىلارىمىز التىننان القا تاعىپ, ءتورت رەت كۇمىسكە, التى رەت قولاعا قول جەتكىزدى. ازيا چەمپيوناتىنىڭ جەڭىمپازدارى: كسەنيا پروزوروۆا (58 كەلىگە دەيىن), ءاليحان اسكەرباي (71 كەلىگە دەيىن), نۇرجان جۇماباي (79 كەلىگە دەيىن), ەدىگە ەمبەردى (79 كەلىگە دەيىن), كيرا دانيلوۆا (69 كەلىگە دەيىن), ەراسىل ساۋلەبەكوۆ (88 كەلىگە دەيىن), دەنيس پولۋبويارينوۆ (94 كەلىگە دەيىن).
ايتا كەتۋ كەرەك, جالپى ناتيجەگە كىشى مەدالدار دا ەسەپكە الىندى. بۇل كىشى مەدالدار جۇلقا كوتەرۋ مەن سەرپە كوتەرۋدەن ۇزدىك اتانعان سپورتشىلارعا تابىستالدى. وسى ەسەپ بويىنشا دا قازاقستان باسقا مەملەكەتتەردەن باسىم ءتۇستى.
- جالپى العاندا قۇرامانىڭ ونەرىن "وتە جاقسى" دەپ باعالاۋعا بولادى. جالپى مەدالدىق ەسەپتە ءجاسوسپىرىم ۇلدار مەن قىزدار ءبىرىنشى ورىندى يەلەندى, جاستار دا كەرەمەت ونەر كورسەتتى. باستى ماقساتىمىز كوماندالىق ەسەپتە جەڭۋ بولاتىن. دەمەك, جوسپارىمىز تولىق ورىندالدى, – دەپ اتاپ ءوتتى حاكيمۋلين.
مامان كوماندانىڭ ايتارلىقتاي جاڭارعانىن, بىراق باستى ءۇمىت ارتقان سپورتشىلاردىڭ ءوز مىندەتىن تولىق اتقارعانىن دا ايتتى.
- ءبىزدىڭ الەۋەتىمىز وتە جوعارى. كوپتەگەن سپورتشى ءۇشىن بۇل العاشقى حالىقارالىق جارىس بولدى. كوپتەگەن جاس اتلەت وزدەرىن جاقسى قىرىنان كورسەتتى. كسەنيا پروزوروۆا, كيرا دانيلوۆا, ءاليحان اسكەرباي, ەدىگە ەمبەردى, ەراسىل ساۋلەبەكوۆ, دەنيس پولۋبويارينوۆ, اقجول قۇرمانبەك… ولار ءبىزدى تاڭعالدىردى دەپ ايتا المايمىن – ءبىز ولاردان ءدال وسىنداي ناتيجەنى كۇتتىك, ولار سەنىمدى اقتاپ, تاماشا ناتيجە كورسەتتى.
سونداي-اق بىرقاتار سپورتشىمىز تەك ازيا چەمپيوناتىندا ەل نامىسىن ءساتتى قورعاپ قانا قويماي, قۇرلىق پەن الەم رەكوردتارىن جاڭارتقانىن دا ايرىقشا اتاپ وتكەن ءجون. اسىرەسە, ءاليحان اسكەرباي ەرەكشە كوزگە ءتۇستى. ول ءۇش الەمدىك جانە ءۇش ازيا رەكوردىن جاڭارتتى.
قوسالقى قۇرام بۇل سىننان سۇرىنبەي وتكەنى - قۋانتارلىق جاعداي. ەڭ باستىسى - ەرەسەكتەر اراسىندا دا وسى دەڭگەيدە ونەر كورسەتۋ. قازىر قۇراما دەمالىستا. الدا باحرەيندە وتەتىن جاسوسپىرىمدەر اراسىنداعى ازيا ويىندارى بار. باپكەرلىك شتاب تامىز-قىركۇيەكتە قايتا قارقىندى دايىندىقتى باستاۋدى جوسپارلاپ وتىر. دەمەك, تاعى دا تاڭعالارلىق ناتيجە كورسەتۋ قاجەت.
