«تۇلەكتەرىمىز ءتاڭىرتاۋ ەتەگىندە دۇنيەگە كەلگەن ءبىرتۋار جازۋشى بەردىبەك سوقپاقباەۆ اتىنداعى مۋزەيدى جابدىقتاپ بەردى. ءىس-شاراعا مەكتەپتە 40 جىلدان استام ەڭبەك ەتكەن ارداگەر ۇستازدار شاقىرىلدى. بۇل مۋزەي – مەكتەپ قانا ەمەس, اۋدان وقۋشىلارىنا جاسالعان ۇلكەن سىي. اۋدانعا كەلگەن قوناقتار جازۋشى اتىنداعى مەكتەپىشىلىك مۋزەيدەن بەردىبەك اتامىزدىڭ كىتاپتارى ءھام تۇتىنعان زاتتارىمەن تانىسا الادى», دەيدى بەردىبەك سوقپاقباەۆ اتىنداعى ورتا مەكتەپ-گيمنازيانىڭ ديرەكتورى گۇلميرا تولەگەنوۆا.
مەكتەپ ماقتانىشتارىنىڭ كوشباسىندا 2023–2024 جىلعى تۇلەگى, التىن بەلگى يەگەرى, ازيانىڭ ءۇش دۇركىن چەمپيونى تولعاناي قاسىمحاننىڭ تۇرارى انىق. بوكستان جاسوسپىرىمدەر اراسىنداعى الەم چەمپيوناتىندا التىن مەدال جەڭىپ العان تولعاناي قاسىمحاننىڭ قۇرمەتىنە مۋزەيدەن ارنايى بۇرىش اشىلعان.
«اۋدانىمىزدىڭ عانا ەمەس, ەلىمىزدىڭ اتىن ايگىلەگەن بىلعارى قولعاپ شەبەرى, جاس بوكسشى قىزىمىز تولعاناي دا وسى اۋىلدا تۋىپ-وسكەن. مەكتەپتى التىن بەلگىگە ءبىتىرىپ, بۇگىندە الماتىداعى سپورت جانە تۋريزم اكادەمياسىندا ءبىلىم الۋدا. تولعانايدىڭ جەتىستىگىن ماقتان ەتۋمەن قاتار, وقۋشىلاردىڭ ىنتا-ىقىلاسى ارتسىن دەپ مۋزەيدىڭ ءبىر بۇرىشىن ارناپ قويدىق. كەزىندە بەردىبەك اتامىزدىڭ «جەكپە-جەك» كىتابىن وقىپ, قاناتتانعان قىزىمىزدىڭ سپورتتاعى ءار قادامى وسكەلەڭ ۇرپاققا ۇلگى-ونەگە», دەيدى مەكتەپ باسشىسى.
ەكى جىل بۇرىن «اۋىل مەكتەپتەرىنىڭ الەۋەتىن ارتتىرۋ» جوباسىنا قاتىسقان بۇل مەكتەپكە «قازاقستان حالقىنا قورىنان» 250 ملن تەڭگە ءبولىنىپ, مەكتەپتىڭ ماتەريالدىق-تەحنيكالىق بازاسى تولىعىمەن جابدىقتالعان. ونىڭ ىشىندە حيميا, بيولوگيا, فيزيكا, گەوگرافيا كابينەتتەرى جاساقتالىپ, لابوراتوريامەن قامتىلعان. ءاربىر كابينەتكە ينتەراكتيۆتى پانەلدەر, زاماناۋي كومپيۋتەرلەر قويىلعان. بۇل وقۋشىلاردىڭ ءبىلىمىن ارتتىرىپ, وقۋ ساپاسىن كوتەرۋگە ايرىقشا ىقپال ەتەرى انىق.
الماتى وبلىسى
