ەلدەگى قۇرىلىس جۇمىستارىنىڭ نەگىزگى ۇلەسى, ياعني بارلىق جۇمىستاردىڭ 91,2%-ى – جەكە قۇرىلىس مەكەمەلەرىنىڭ ەسەبىندە. جۇمىس قارقىنىنا قاراي ينجەنەرلىك قۇرىلىستاردى سالۋ مەن جوندەۋ كولەمى 20,7%-عا, تۇرعىن ەمەس ءۇي-جايلاردى سالۋ – 11,6%-عا ارتقان. جالپى كولەمدە ەڭ ۇلكەن ۇلەس تۇرعىن ەمەس عيماراتتارعا (25%), كولىك ينفراقۇرىلىمى نىساندارىنا (19,7%), سونداي-اق تۇرعىن ۇيلەرگە (13,3%) تيەسىلى.
ماڭعىستاۋ وبلىسىندا 1,96 ەسە ءوسىم (ەلدەگى ەڭ جوعارى كورسەتكىش), قىزىلوردا وبلىسىندا +64,5%, تۇركىستان وبلىسىندا +46,6%, استانا قالاسىندا +51,8%, اقمولا وبلىسىندا +39,8%, پاۆلودار وبلىسىندا +37,4%, الماتى قالاسىندا +24% قۇرىلىس جۇمىستارى كولەمىنىڭ وسكەنى بايقالدى. مۇنداي ديناميكا تەك ءىرى قالالاردىڭ عانا ەمەس, سونىمەن قاتار ايماقتاردىڭ دا بەلسەندىلىگىن كورسەتەدى.
ۇسب دەرەگىنشە, اعىمداعى جىلدىڭ قاڭتار-مامىر ايلارىندا ەلىمىزدە 6,02 ملن شارشى مەتر تۇرعىن ءۇي پايدالانۋعا بەرىلدى, بۇل وتكەن جىلدىڭ سايكەس كەزەڭىمەن سالىستىرعاندا 5,7%-عا ارتىق. وسى كولەمنىڭ 3,85 ملن شارشى مەتر كوپپاتەرلى ۇيلەرگە تيەسىلى, 2,13 ملن شارشى مەتر – جەكە تۇرعىن ۇيلەردىڭ ەنشىسىندە. تۇرعىن ءۇيدىڭ جالپى كولەمىنىڭ 94,1%-ىن جەكە قۇرىلىس سالۋشىلار پايدالانۋعا بەردى. ياعني قۇرىلىسقا ازاماتتار مەن شاعىن بيزنەستىڭ قاتىسۋى جوعارى دەڭگەيدە.
تۇرعىن ءۇي جانە ونەركاسىپتىك نىساندارمەن قاتار پايدالانۋعا بەرىلگەن الەۋمەتتىك ينفراقۇرىلىم عيماراتتارىنىڭ دا سانى ارتتى. بيىلدىڭ العاشقى بەس ايىندا 99 379 وقۋشىعا ارنالعان 85 جالپى ءبىلىم بەرەتىن مەكتەپ, 2 134 ورىنعا ارنالعان 12 بالاباقشا, ءبىر اۋىسىمدا 665 ادام قابىلدايتىن 21 امبۋلاتوريالىق-ەمحانالىق ۇيىم بوي كوتەردى. بۇل اسىرەسە حالىقتىڭ دەموگرافيالىق ءوسۋى مەن ۋرباندالۋ جاعدايىندا قولجەتىمدى ءبىلىم بەرۋ جانە مەديتسينالىق مەكەمەلەرگە دەگەن قاجەتتىلىك ارتقان كەزدە وتە ماڭىزدى. سونىمەن قاتار كولىك وبەكتىلەرىنىڭ – اۆتوموبيل جانە تەمىرجول, مەترو قۇرىلىسى جالعاستى. ەل ىشىندەگى لوگيستيكا مەن ۇتقىرلىقتى جاقسارتۋعا جۇيەلى ينۆەستيتسيالار تارتۋدىڭ ارقاسىندا ولار قۇرىلىس جۇمىستارىنىڭ جالپى كولەمىندە شامامەن 20%-دىق ۇلەستى قامتىدى.
ينجەنەرلىك ينفراقۇرىلىم وبەكتىلەرىن قايتا قۇرۋ جانە كۇردەلى جوندەۋ اۋقىمى دا ايتارلىقتاي ۇلعايدى. وسىلايشا, قۇرىلىس سالاسىنداعى جالپى كورىنىس جىلجىمايتىن م ۇلىككە ينۆەستيتسيالارعا دەگەن سەنىمنىڭ جوعارى دەڭگەيىندە ۇدەمەلى دامۋدى ايعاقتايدى. ايماقتىق باعدارلامالار كوپتەگەن سالالاردا العا جىلجۋدى ىنتالاندىرادى. كوممەرتسيالىق عيماراتتارمەن قاتار الەۋمەتتىك ماڭىزدى نىسانداردىڭ كوپتەپ ەنگىزىلۋى – ەلدەگى ەكونوميكالىق بەلسەندىلىكتىڭ جاقسى كورسەتكىشى. بۇل جۇمىسپەن قامتۋ, حالىقتىڭ ءومىر ءسۇرۋ ساپاسىن جاقسارتۋ, ينفراقۇرىلىمدى جاڭعىرتۋ سياقتى ماڭىزدى مىندەتتەردىڭ شەشىلۋىنە مۇرىندىق بولادى.
