وبلىستىق پوليتسيا دەپارتامەنتىنىڭ مالىمەتىنشە, 6 شىلدە كۇنى تسەلينوگراد اۋدانىنا قاراستى قاراوتكەل اۋىلىندا سۋ قۇبىرى جەلىسىندە مونتاجداۋ جۇمىسى جۇرگىزىلىپ جاتقان كەزدە قۇدىق ىشىندە قايعىلى وقيعا بولدى. ەكى جۇمىسشى قازا تاۋىپ, تاعى ەكى ادام اۋرۋحاناعا جەتكىزىلگەن.
اتالعان فاكتى بويىنشا قىلمىستىق كودەكستىڭ 156-بابى 4-بولىگى («ەڭبەكتى قورعاۋ قاعيدالارىن بۇزۋ») بويىنشا سوتقا دەيىنگى تەرگەۋ باستالدى. سوت-مەديتسينالىق ساراپتامالار تاعايىندالدى. سونىمەن قاتار, مەملەكەتتىك ەڭبەك ينسپەكتورى تەكسەرۋ جۇرگىزىپ جاتىر.
«پوليتسيا دەپارتامەنتى جۇمىس بەرۋشىلەرگە ەڭبەك قاۋىپسىزدىگى بويىنشا تۇراقتى نۇسقاما وتكىزىپ, قىزمەتكەرلەردىڭ جەكە قورعانىس قۇرالدارىن قولدانۋىن باقىلاۋدى, سونداي-اق جۇمىس بارىسىنداعى انىقتالعان زاڭبۇزۋشىلىقتاردى ۋاقتىلى جويۋدى ۇسىنادى», – دەلىنگەن ۆەدومستۆو حابارلاماسىندا.
ايتا كەتەيىك, قىلمىستىق كودەكستىڭ 156-بابى 4-بولىگىنە سايكەس, ەڭبەكتى قورعاۋ, ونەركاسىپتىك سانيتاريا جانە قاۋىپسىزدىك تەحنيكاسى تالاپتارىن ساقتاۋدى قامتاماسىز ەتۋگە مىندەتتى ادام اتالعان تالاپتاردى بۇزىپ, ابايسىزدا ەكى نەمەسە ودان دا كوپ ادامنىڭ قازا بولۋىنا سەبەپكەر بولسا, ول 7 جىلعا دەيىن باس بوستاندىعىنان ايىرىلادى نەمەسە ءدال سونداي مەرزىمگە باس بوستاندىعى شەكتەلەدى. سونداي-اق بەلگىلى ءبىر لاۋازىمدى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءۇش جىلعا دەيىن نەمەسە مۇلدە ايىرۋ جازاسى تاعايىندالۋى مۇمكىن.
