فوتو: ءماجىلىستىڭ ءباسپاسوز قىزمەتى
شاعىناۋدانعا العاشقى بولىپ باسپانا كەزەگىندە تۇرعان ازاماتتار قونىستاندى. 2023 جىلعى قىركۇيەكتە 60 پاتەرلى بەسقاباتتى ۇيگە تۇرعىندار قونىستانسا, 2025 جىلعى اقپاندا تاعى 120 وتباسىعا جاڭا پاتەردىڭ كىلتى تابىستالدى. جوبانىڭ العاشقى كەزەڭى اياسىندا 25 تۇرعىن ءۇي سالۋ كوزدەلگەن. بۇگىندە شاعىناۋداندا 150 ورىندىق مەديتسينالىق وڭالتۋ ورتالىعى پايدالانۋعا بەرىلىپ, سۋ ايداۋ ستانتسيالارى سالىندى, ماگيسترالدى ينجەنەرلىك جەلىلەر, جىلۋ تراسسالارى جانە ىشكى جول ينفراقۇرىلىمى جۇرگىزىلدى.
«اقجايىق – حالىق سانىنىڭ ءوسۋى, قالالىق ينفراقۇرىلىمدى دامىتۋ جانە ءومىر ساپاسىن جاقسارتۋ ماقساتىمەن بوي كوتەرىپ جاتقان ستراتەگيالىق تۇرعىن ايماق. ءبىز تەك ۇيلەر سالىپ قانا قويماي, جاس وتباسىلار مەن ماماندار, ءۇي كەزەگىندە تۇرعان ازاماتتار ءۇشىن تولىققاندى ءومىر ءسۇرۋ ورتاسىن قالىپتاستىرۋىمىز كەرەك. ول ءۇشىن قۇرىلىس جۇمىستارى تۇراقتى جوسپارلاۋ قاعيداتتارىنا نەگىزدەلىپ, ساياباقتار, مەكتەپتەر, ەمحانالار جانە قولجەتىمدى كولىكپەن قامتاماسىز ەتىلۋى ءتيىس», دەدى ب.ىزمۇحامبەتوۆ.
دەپۋتاتتىڭ ايتۋىنشا, قازىرگى ۋاقىتتا ماجىلىستە جاڭا قۇرىلىس كودەكسى قارالىپ جاتىر. قۇجات قۇرىلىس ساپاسىن باقىلاۋدى كۇشەيتۋدى, زاڭ بۇزۋشىلىقتار انىقتالعان جاعدايدا جەدەل ارەكەت ەتۋدى جانە قۇرىلىس ماتەريالدارىنىڭ ساپاسىنا قويىلاتىن تالاپتاردى قاتاڭداتۋدى كوزدەيدى.
كەزدەسۋ بارىسىندا 2024 جىلعى سۋ تاسقىنىنان زارداپ شەككەن تۇرعىن ۇيلەردى قالپىنا كەلتىرۋ ماسەلەلەرى دە كوتەرىلدى. ماجىلىسمەن ورال قالاسى مەن وبلىس اۋداندارىندا 2 مىڭنان استام ءۇي قالپىنا كەلتىرىلىپ, قارعىن سۋدان جاپا شەككەن وتباسىلارعا جاڭا باسپانا نەمەسە قارجىلاي وتەماقى بەرىلگەنىن اتاپ ءوتتى. باقتىقوجا ىزمۇحامبەتوۆ بۇل جۇمىس «AMANAT» پارتياسى فراكتسياسى مۇشەلەرىنىڭ تۇراقتى باقىلاۋىندا بولاتىنىنا نازار اۋداردى.
بىلتىر پارتيانىڭ «حالىقپەن بىرگە!» سايلاۋالدى باعدارلاماسى اياسىندا باتىس قازاقستان وبلىسىندا 637,4 مىڭ شارشى مەتر جاڭا تۇرعىن ءۇي سالىندى. جالپى 2028 جىلعا دەيىن 3,2 ملن شارشى مەتر تۇرعىن ءۇيدى پايدالانۋعا بەرۋ, 100-دەن استام كوپقاباتتى ۇيگە كۇردەلى جوندەۋ جۇمىستارىن جۇرگىزۋ, سونداي-اق شامامەن 600 كم ينجەنەرلىك-كوممۋنالدىق جەلى تارتۋ جوسپارلانعان. بۇل قادامدار 20 مىڭعا جۋىق وتباسىنى باسپانامەن قامتاماسىز ەتۋگە مۇمكىندىك بەرەدى.
