فوتو: ءماجىلىستىڭ ءباسپاسوز قىزمەتى
ءماجىلىس دەپۋتاتى مۇرات ابەنوۆ مەملەكەت باسشىسى بۋرابايدا وتكەن «ۇلتتىق قۇرىلتايدا» فۋتبولعا قاتىستى بىرقاتار ناقتى تاپسىرما بەرگەنىن اتاپ ءوتتى.
«قىزىلوردا وبلىسى سول تاپسىرمالاردىڭ نەگىزىندە العاش بولىپ UEFA كلاسسيفيكاتسياسى بويىنشا ءىىى ساناتتاعى, حالىقارالىق ستاندارتتارعا تولىق سايكەس كەلەتىن جاڭا ستاديون قۇرىلىسىن باستاپ وتىر. قىركۇيەك ايىندا وسى ستاديوندا ۇلكەن ويىن وتپەك. سونداي-اق وبلىس اكىمدىگىنىڭ ۇستانىمى بويىنشا «قايسار» فۋتبول كومانداسى العاش رەت لەگيونەرلەرسىز ويناپ, وتاندىق سپورتشىلارعا قولداۋ كورسەتىپ كەلەدى. فۋتبول – كوپشىلىككە ارنالعان سپورت. سوندىقتان ونى ناسيحاتتاۋعا كۇش سالۋىمىز قاجەت. سوندا عانا جاستاردىڭ سپورتقا دەگەن قىزىعۋشىلىعى ارتادى», دەدى م.ابەنوۆ.
وبلىستىق دەنە شىنىقتىرۋ, سپورت جانە تۋريزم باسقارماسىنىڭ باسشىسى باقتيار ارتاەۆ ستاديوندا كاسىبي فۋتبولشىلار عانا ەمەس قالا تۇرعىندارى, جاستار مەن بالالاردىڭ سپورتپەن شۇعىلدانۋىنا دا تولىق مۇمكىندىك قاراستىرىلعانىن ايتتى. ستاديوندا بوكس, كۇرەس, سپورتتىق گيمناستيكا, اۋىر اتلەتيكا, تاەكۆوندو جانە فيتنەس زالدارى دا بولادى.
جەرگىلىكتى بيۋدجەت ەسەبىنەن قارجىلاندىرىلعان جاڭا ستاديون – ايماق تاريحىنداعى ەڭ اۋقىمدى سپورتتىق نىسانداردىڭ ءبىرى. 11 مىڭ ورىنعا ارنالعان. قازىر تريبۋنالاردىڭ مەتالل كونسترۋكتسيالارى ورناتىلىپ, قابىرعالار, ىشكى بولمەلەر مەن سىرتقى ۆيتراجدار قالانعان. سونىمەن قاتار فۋتبول الاڭىن جابدىقتاۋ, ىشكى ارلەۋ جانە اۋماقتى اباتتاندىرۋ جۇمىستارى جۇرگىزىلىپ جاتىر. ستاديون ماڭىندا 238 ورىندىق اۆتوتۇراق, 40 ورىندىق VIP اۆتوتۇراق جانە اۆتوبۋسقا ارنالعان 4 تۇراق قاراستىرىلعان.
كەزدەسۋ بارىسىندا فۋتبولشىلار دەپۋتاتتارعا وزەكتى ماسەلەلەردى جەتكىزدى. سونىڭ ءبىرى – لەگيونەرلەرسىز ويناۋ كەزىندە تۋىندايتىن ۇيىمداستىرۋ جۇمىستارىنا قاتىستى قيىندىقتار. بۇل ماسەلەلەردى ءماجىلىس دەپۋتاتتارى ءوز باقىلاۋىنا الىپ, پارلامەنتتە كوتەرەتىنىن ايتتى.
