فوتو: egemen.kz
«Qazaq sut» رەسپۋبليكالىق ءسۇت جانە ءىرى قارا مالدىڭ ءسۇت جانە ارالاس تۇقىمدارى پالاتاسىنىڭ اتقارۋشى ديرەكتورى ازامات ساعىنباەۆ قازاقستان ءسۇت شارۋاشىلىعىندا بۇرىن-سوڭدى بولماعان ءوسۋ قارقىنىنا جەتكەنىن ايتتى.
2023 جىلدان باستاپ ەلىمىزدە جيىنتىق قۋاتى جىلىنا 300 مىڭ توننادان استام ءسۇتتى قۇرايتىن 48 جاڭا ءسۇت-تاۋار فەرماسى ىسكە قوسىلعان. جوبالارعا سالىنعان ينۆەستيتسيالاردىڭ جالپى كولەمى 150 ملرد تەڭگەدەن اسقان. ال 2020 جىلعا دەيىن رەسپۋبليكا بويىنشا جىل سايىن ورتا ەسەپپەن وسىنداي ەكى فەرما عانا سالىنعان ەكەن.
ازامات ساعىنباەۆتىڭ ايتۋىنشا, ءسۇت ترانسفورماتسياسىنىڭ كوشباسشىسى - سولتۇستىك قازاقستان وبلىسى. وندا 2021-2022 جىلدارى 21 كاسىپورىن ىسكە قوسىلعان. سونىڭ ارقاسىندا ايماق 2025 جىلى ەلىمىزدىڭ اگروقۇرىلىمدارى اراسىندا ءسۇت ءوندىرۋ كولەمى بويىنشا ءبىرىنشى ورىنعا شىققان.
«جاڭادان ىسكە قوسىلعان ءسۇت-تاۋار فەرمالارىندا ءبىر جاي سيىرعا ورتاشا جىلدىق ءسۇت كولەمى 8,2 مىڭ ليتردەن كەلەدى, ال ءسۇتتى سيىرلاردا 11 مىڭ ليترگە جەتەدى. بۇل ەۋروپانىڭ ءسۇتتى مول وندىرەتىن ەلدەرىنىڭ دەڭگەيىمەن سايكەس. ءسۇت شارۋاشىلىقتارى وڭىردەگى ءوندىرىس سالاسىن وسىمگە باستاپ قانا قويماي, اۋىلداردا جۇمىس ورىندارى مەن ينفراقۇرىلىم قالىپتاستىرا الاتىن قۇزىرەت ورتالىقتارىنا اينالىپ جاتىر», دەدى ول.
سالاداعى وسىمگە سۋبسيديا, قولايلى كەپىل شارتتارى بار 2,5-دىق نەسيەلەر, «كەڭ دالا» باعدارلاماسى ارقىلى تۇقىمدار مەن تىڭايتقىشتاردىڭ قولجەتىمدى بولعانى, مال ازىعى بازاسىنىڭ دامۋى اسەر ەتكەن.
پالاتانىڭ اتقارۋشى ديرەكتورى ءسۇت شارۋاشىلىعى سالاسىندا ەلەۋلى تابىسقا جەتكەن سقو تاجىريبەسىن بۇكىل ەلگە كەڭىرەك تاراتۋدى ۇسىندى. ول ءۇشىن مينيسترلىكتەر مەن اكىمدىكتەر تاراپىنان ۇلگىلىك جوباداعى شەشىمدەر مەن ينستيتۋتسيونالدىق قولداۋ كەرەك.
