ارناۋلى مەملەكەتتىك قوردان اقمولا وبلىسىنا 21,5 ملرد تەڭگە ءبولىندى. بۇل قارجى وڭىردەگى سۋمەن جابدىقتاۋ ماسەلەسىن شەشۋگە, ناقتىراق ايتساق, 28 جوباعا جۇمسالىپ جاتىر. اتاپ ايتقاندا, زەرەندى اۋدانىندا اقادىر, جىلىمدى, قاناي بي, كوكتەرەك, سادوۆوە, ترويتسك, ۆاسيلكوۆسكوە, وركەن, وزەن جانە باراتاي اۋىلدارىندا جاڭا سۋ جەلىلەرى تارتىلىپ, بۇرىنعىلارى جاڭارتىلىپ جاتىر. جوبالارعا 6 ملرد 564 ملن تەڭگە قاراستىرىلعان.
ال وركەن كەنتىندە 1000-نان استام تۇرعىندى قامتيتىن 6 شاقىرىمدىق سۋ جۇيەسىن جوندەۋ باستالماق. ونىڭ قۇنى – 583 ملن تەڭگە. بۇدان بولەك, وبلىستىڭ 9 اۋدانىندا جاڭا سۋ كوزدەرىن اشۋ مەن ەسكى جۇيەلەردى جوندەۋگە 2 ملرد 287 ملن تەڭگەدەن استام قارجى ءبولىندى. نىساندار جىل سوڭىنا دەيىن پايدالانۋعا بەرىلمەك.
ساندىقتاۋ اۋدانىندا 22,3 شاقىرىمعا سوزىلاتىن توپتىق سۋ قۇبىرىنىڭ قۇرىلىسى ءجۇرىپ جاتىر. بۇل جوباعا 200 ملن تەڭگە بولىنگەن. سونىمەن قاتار, نۇرا توپتىق سۋ قۇبىرى قايتا جاڭعىرتىلىپ, پوكروۆسكوە اۋىلىنان تالاپكەر مەن قاجىمۇقان اۋىلدارىنا دەيىن جاڭا جەلى تارتىلىپ جاتىر. قوس جوبانىڭ جالپى قۇنى – 9,5 ملرد تەڭگە.
قازىرگى تاڭدا اقمولا وبلىسىنداعى قالالاردا سۋمەن جابدىقتاۋ كورسەتكىشى 99 پايىزعا, ال اۋىلدىق جەرلەردە 96,6 پايىزعا جەتتى. ەلگە قايتارىلعان اكتيۆتەر ەسەبىنەن ەندى تەك سۋ جۇيەلەرى عانا ەمەس, دەنساۋلىق ساقتاۋ, سپورت جانە ينجەنەرلىك ينفراقۇرىلىم نىساندارى دا جاڭارتىلىپ جاتىر.
