رەسمي دەرەككە سەنسەك, بايزاق اۋدانىندا بۇگىندە 40-قا جۋىق مادەنيەت وشاعى بار. الداعى ۋاقىتتا اقجار, اقشولاق جانە بازارباي اۋىلدارىندا دا مادەنيەت نىساندارى سالىنادى دەپ جوسپارلانعان.
«بىرلىگى مەن ىنتىماعى جاراسقان مىرزاتاي اۋىلىنان ەلىمىزگە تانىمال, قايتالانباس ونەر يەلەرى شىققان. سول ونەر جولىن جاڭا اۋىلدىق كلۋبتا ءتالىم الىپ جاتقان جاس ۇرپاق لايىقتى جالعاستىرادى دەپ سەنەمىن. مەملەكەت تاراپىنان دا, جەرگىلىكتى بيلىك تاراپىنان دا مادەنيەت سالاسىنا قولداۋ تولاستامايدى», دەدى ءوڭىر باسشىسى قۇتتىقتاۋ سوزىندە.
جاڭا كلۋبتىڭ قۇرىلىسى «اۋىل – ەل بەسىگى» باعدارلاماسى اياسىندا جۇزەگە اسىرىلىپ, ونى «نيك تاراز» جشس سالعان. جوبا قۇنى – 256 ملن تەڭگە. نىساندا 6 قىزمەتكەر جۇمىس ىستەيدى. مۇندا ءان, بي, مانەرلەپ وقۋ ۇيىرمەلەرىمەن قاتار, «اسىل اجەلەر» توبى دا جۇمىسىن باستادى.
بۇعان دەيىن مىرزاتايلىقتار مادەني-تانىمدىق ءىس-شارالاردى اۋىل اكىمدىگىنە جاپسارلاس ەسكى عيماراتتا وتكىزىپ كەلگەن. ەندى تۇرعىندار زامان تالابىنا ساي جاڭا كلۋبتىڭ اشىلعانىنا ءدان ريزا.
«اۋىلىمىزدا حالىقتىڭ تۇرمىسىن جاقسارتۋعا باعىتتالعان ۇلكەن جۇمىستار اتقارىلىپ جاتىر. كوشەلەرىمىز جارىقتاندىرىلىپ, جول جوندەلدى. مەديتسينالىق پۋنكت سالىنىپ, پايدالانۋعا بەرىلدى. ەندى, مىنە, مادەنيەت ءۇيى دە بوي كوتەرىپ وتىر. بۇعان دەيىن اۋىلدا جەكە مادەنيەت وشاعى بولماعان ەدى. بۇل – تۇرعىندار ءۇشىن ۇلكەن قۋانىش», دەيدى اۋىل تۇرعىنى ورازباي دالىباەۆ.
جامبىل وبلىسى,
بايزاق اۋدانى,
مىرزاتاي اۋىلى.
