ەكسپوزيتسياعا نۇرمۇحاممات يمام ۇلىنىڭ قىرىق جىلدان استام ۋاقىت بويى «اكمولينسكايا پراۆدا» گازەتى جانە باسقا دا باسىلىمداردىڭ ءفوتوتىلشىسى بولىپ جۇمىس ىستەگەن ۋاقىتتا جاساعان 300-دەن استام ارحيۆتىك سۋرەتى كىرەدى. كورمە قالا تاريحىنداعى ماڭىزدى ساتتەردى قامتيدى. اتاپ ايتساق, العاشقى شاعىن اۋدانداردىڭ قۇرىلىسى, ونەركاسىپتىك نىسانداردىڭ اشىلۋى, تىڭ ولكەلەرىنىڭ كەڭەستىك استاناسىنىڭ كۇندەلىكتى ءومىرى, سونداي-اق ماڭىزدى الەۋمەتتىك جانە مادەني وقيعالار. نۇرمۇحاممات يماموۆ سوعىستى جانە سوعىستان كەيىنگى بۇكىل ءداۋىردى بىرگە وتكىزگەن «كيەۆ» كامەراسى ونىڭ اينىماس سەرىگى بولدى. ول ەكىنشى دۇنيەجۇزىلىك سوعىستا پە-2 شۇيىلگىش بومبالاۋشىسىندا راديواتقىش قىزمەتىن اتقارعان. تەاتر سۋرەتشىسى وتانىنا ورالعاننان كەيىن راديومەحانيك جانە رەتۋشەر بولىپ جۇمىس ىستەدى. فوتو ونەرىنە اۆتور ءوزىنىڭ جەكە داپتەرىندە جازعانداي, «تسەلينوگرادتىڭ ماڭىزدى وقيعالارىن تىركەۋ» ءۇشىن سانالى تۇردە, ەرەسەك جاستا كەلدى.
پرەزيدەنت ورتالىعىنىڭ ديرەكتورى باقىتجان تەمىربولات كورمەنىڭ اشىلۋ سالتاناتىندا مادەني وقيعانىڭ قالا تاريحى ءۇشىن وراسان ماڭىزى بار ەكەنىن اتاپ ءوتتى.
«قازىرگى استانا – تەك اكىمشىلىك ورتالىق قانا ەمەس, ول – ءبىر ۇرپاقتىڭ تاۋەلسىز, دامىعان جانە گۇلدەنگەن قازاقستان تۋرالى ارمانىن بەينەلەيتىن ءرامىز. ەلوردانىڭ ساۋلەتىندە ۇلتتىق ءداستۇر مەن زاماناۋي تەحنولوگيالار ۇندەسىپ, ونىڭ تاريحىندا – ەرلىك, ەڭبەك جانە جاسامپازدىق جاتىر. نۇرمۇحاممات يماموۆتىڭ فوتوجۇمىستارى – جاي سۋرەت ەمەس. بۇل – ءوز ءداۋىرىنىڭ تىنىسىن سەزىنە بىلگەن ادامنىڭ كوزقاراسى, وزگەرىستەردى كورىپ, تاريحتى ساقتاي العان جاننىڭ شىنايى حرونيكاسى. ونىڭ وبەكتيۆى – ءبىزدى ونجىلدىقتارمەن جەتەلەيتىن جول», دەدى ول.
كورمەنىڭ جەكە ءبولىمى 1977 جىلى 7 جەلتوقساندا تىڭ يگەرۋشىلەر سارايىندا قويىلعان جانە جاقىندا فوتوگرافتىڭ ۇلى رينات يماموۆ تسيفرلاندىرعان فوتوسۋرەتتەر مۇراعاتىنا ارنالعان. مىڭداعان مۇراعاتتى ساقتاۋ جانە جاريالاۋ جۇمىستارى جالعاسىپ كەلەدى, وسى ماتەريالداردىڭ ءبىر بولىگى اۆتورلىق سايتتا دا ۇسىنىلعان.
ءيا, اۆتوردىڭ فوتوسۋرەتتەرى جاي عانا دەرەكتى شەجىرە ەمەس, ۋاقىتتىڭ جاندى تىنىسى, ءداۋىردىڭ مادەني كودىنا اينالدى. ولار وتكەنگە دەگەن ساعىنىشتى وياتىپ, قازىرگى فوتوگرافتاردى شابىتتاندىرادى, ودان بولەك تاريحشى-ولكەتانۋشىلار جانە قالا مەن ەلدىڭ وتكەنىنە قىزىعۋشىلىق تانىتاتىن جاندار ءۇشىن قۇندى رەسۋرس ەكەنى دە راس.
فوتوحرونيكاشىنىڭ ۇلى رينات يماموۆ اتالعان كورمە اكەنىڭ رۋحىنا دەگەن قۇرمەتتىڭ بەلگىسى عانا ەمەس, سونداي-اق قالانىڭ مادەني مۇراسىنا قوسىلعان ۇلەس بولدى دەيدى.
ء«ار فوتوسۋرەت تۇتاس ءبىر ءداۋىردى قامتيدى. مۇندا ونىڭ ەڭ جاقسى تۋىندىلارى عانا ەمەس, سونداي-اق بۇكىل تاريح – قۇرىلىس الاڭدارى, مەرەكەلەر, كوشەلەر, قالا تۇرعىندارىنىڭ بەت-بەينەسى بار. 1962 جىلدان باستاپ سۋرەتتەر تسەلينوگرادتىڭ كورنەكى كۇندەلىگى. سۋرەتتەردى كورگەن ادامدار وزدەرىن, جاقىندارىن, كوشەلەرىن تانىپ جاتىر. بۇل كورمە استانا كۇنىنە وراي جانە اكەمىزدىڭ تۋعان كۇنى قارساڭىندا اشىلىپ وتىر. پرەزيدەنت ورتالىعىنىڭ باسشىلىعىنا ەرەكشە العىس ايتامىن», دەيدى رينات يماموۆ.
سونداي-اق ول ءفوتوتىلشىنىڭ ءارحيۆى وتە اۋقىمدى ەكەنىن ايتتى. الداعى جىلى ن.يماموۆتىڭ ءجۇز جىلدىعى قارساڭىندا تاعى دا كورمە اشىلىپ, قورداعى باسقا سۋرەتتەر دە ۇسىنىلماق.
ايتا كەتەيىك, پرەزيدەنت ورتالىعىنداعى كورمە 10 تامىزعا دەيىن جالعاسادى.
