– الەنا, كوپشىلىك ءسىزدى جەڭىل اتلەت رەتىندە عانا ەمەس, قازاق تىلىندە ەركىن سويلەيتىن تەلەجۇرگىزۋشى دەپ تە جاقسى تانيدى. سپورتتى تاڭداۋعا نە سەبەپ بولدى؟
– سپورتقا دەگەن ماحابباتىم بالا كەزىمنەن وياندى. اۋىل بالاسى بولعان سوڭ, تابيعاتپەن ەتەنە جاقىن ءومىر سۇردىك, جۇگىرىپ, سەكىرىپ وستىك. بىراق جەڭىل اتلەتيكاعا كاسىبي تۇردە بەت بۇرۋىم ءۇش جىل بۇرىن باستالدى. وسى از عانا ۋاقىت ىشىندە ەلىمىزدىڭ تۇكپىر-تۇكپىرىندەگى جارىستارعا قاتىستىم. اسىرەسە «Masters Kazakhstan» فەدەراتسياسى ۇيىمداستىراتىن تۋرنيرلەر ومىرىمدە ەرەكشە ورىن الادى. ءتىپتى بەرلين مارافونىنا دا قاتىسۋ باقىتى بۇيىردى. بۇل تەك سپورت ەمەس, شىنايى ەرىك-جىگەردىڭ, ماقساتكەرلىكتىڭ مەكتەبى دەر ەدىم.
– ءسىز قاراعاندى وبلىسىنداعى اعادىر كەنتىنىڭ تۋماسىسىز. قازاق ءتىلىن جەتىك مەڭگەرۋىڭىز دە كوپشىلىكتى تاڭعالدىرادى. مەملەكەتتىك ءتىلدى مەڭگەرۋ سپورتتاعى جولىڭىزعا قالاي اسەر ەتتى؟
– ءيا, مەن قازاق مەكتەبىندە وقىدىم. قازاق ءتىلى – جانىمنىڭ, بولمىسىمنىڭ اجىراماس بولىگى. قازىر الماتىدا تۇرامىن. ءارتۇرلى سپورتتىق ءىس-شارالاردى, مارافونداردى قازاق تىلىندە جۇرگىزۋ مەن ءۇشىن ۇلكەن مارتەبە ءارى جاۋاپكەرشىلىك. قازاق ءتىلى ارقىلى كورەرمەنمەن, سپورتشىلارمەن تەرەڭىرەك بايلانىس ورناتا الامىن. بۇل – ۇلتتىق بولمىس پەن زاماناۋي سپورتتى ۇشتاستىرۋدىڭ تاماشا ۇلگىسى.
– الداعى جوسپارلارىڭىزبەن بولىسسەڭىز.
– قازىرگى تاڭدا Naiza مما-پروموۋشەن جوباسىندا جۇرگىزۋشى بولىپ ەڭبەك ەتەمىن. سونىمەن قاتار جەڭىل اتلەتيكا بويىنشا ءتۇرلى مارافونداردى تىكەلەي ەفيردە قازاق جانە ورىس تىلدەرىندە جۇرگىزەمىن. بۇل مەن ءۇشىن تەك جۇمىس ەمەس, ۇلكەن ميسسيا. سەبەبى سپورت – ادامداردى بىرىكتىرەتىن كۇش. ءار ەفيردە حالىقتار اراسىنداعى دوستىقتى, ءوزارا تۇسىنىستىكتى دارىپتەيمىن. بۇل – قازاقستان حالقى اسسامبلەياسىنىڭ دا باستى ماقساتتارىنىڭ ءبىرى.
– سپورتتا شەكارا, ۇلتقا ءبولىنۋ بولمايدى. ءسىزدىڭ دە وسى سالادان تاپقان قۇربىلارىڭىز كوپ ەكەنىن بىلەمىز.
– دۇرىس ايتاسىز, ءار جارىس – ءوز الدىنا ءبىر تاريح. جاڭا ادامدارمەن تانىسۋ, ءتۇرلى ۇلتتاردىڭ مادەنيەتىن سەزىنۋ – ناعىز شابىت كوزى. بىزدە سپورت ءاردايىم دوستىقتىڭ, ىنتىماقتاستىقتىڭ ءرامىزى. مىنە, وسى تۇرعىدان العاندا, «Alatau 2025» حالىقارالىق ءتۋرنيرى بىرەگەي الاڭ. مۇندا تەك سپورتشىلار عانا ەمەس, ءارتۇرلى ەتنوستاردىڭ وكىلدەرى دە ءبىر ماقساتپەن بىرلىك پەن دامۋ جولىندا بىرىگەدى. بۇل – اسسامبلەيانىڭ ۇستانىمدارىن سپورت الاڭىندا جۇزەگە اسىرۋدىڭ ناقتى كورىنىسى.
– «Alatau 2025» تۋرنيرىنە قاتىسا-تىن سپورتشىلار مەن جانكۇيەرلەرگە قانداي تىلەگىڭىز بار؟
– بۇل جاي تۋرنير ەمەس, سپورت ارقىلى جۇرەكتەردى بىرىكتىرەتىن ۇلكەن مەرەكە. سوندىقتان بارلىق قاتىسۋشىعا ساتتىلىك تىلەيمىن. ءوز مۇمكىندىكتەرىڭىزدى تولىق اشىپ, ءار ساتتەن ءلاززات الۋعا تىرىسىڭىزدار. ال كورەرمەندەرگە ايتارىم: 6–8 شىلدە كۇندەرى الماتىداعى وليمپيادالىق دايارلىق ورتالىعىنا كەلىڭىزدەر. قاتىسۋشىلاردى قولداپ, سپورت رۋحىن بىرگە سەزىنەيىك. بۇل ءبىزدىڭ بىرلىگىمىزدىڭ, مادەنيەتىمىزدىڭ جانە سپورتقا دەگەن ماحابباتىمىزدىڭ جارقىن كورىنىسى.
– اڭگىمەڭىزگە العىس بىلدىرەمىز. سپورتتاعى جانە قوعامدىق جۇمىسىڭىزعا تەك ساتتىلىك تىلەيمىز!
اڭگىمەلەسكەن –
قۋانىش نۇردانبەك ۇلى,
«Egemen Qazaqstan»
