قىلمىستىق وقيعا بيىلعى جىلدىڭ قاڭتارىندا اقتوبە قالاسىنىڭ ەسكى بولىگىندەگى جەكە تۇرعىن ۇيلەردىڭ بىرىندە ورىن الدى. جەكە باس ارازدىعىن سەبەپ قىلىپ, كەك الۋ ماقساتىمەن قىلمىسكەر بۇرىنعى سۇيىكتىسىنىڭ اتا-اناسىنىڭ ۇيىنە كەلىپ, جازعى اس ۇيدە جاسىرىنادى. ول اۋەلى جازعى ۇيگە كىرگەن قارت ايەلگە بىرنەشە پىشاق جاراقاتىن سالعان. اناسىنىڭ سىرتتا ءبىراز ۋاقىت ايالداپ, ۇيگە كىرمەگەنىن بايقاعان قىزى ارتىنان ىزدەپ بارعاندا, قىلمىسكەر ۇستاپ الادى دا, قول-اياعىن بايلاپ, كەپىلدىككە العان. ولاردى ىزدەپ كەلگەن كەلىنشەكتىڭ وگەي اكەسىن دە قىلمىسكەر اۋىر جاراقاتتايدى. قارت سول جەردە قايتىس بولادى. كەشقۇرىم ۋاقىتتا ۇيىنە كەلگەن ءجاسوسپىرىم اناسى مەن اتا-اجەسىنىڭ ۇيدە جوقتىعىن كورىپ, ءارى ءۇيدىڭ اشىق-اشىق جاتقانىنان سەزىكتەنىر, جاقىن جەردە تۇراتىن تۋىس اپايىنىڭ ۇيىنە بارىپ, وسى جەردەن پوليتسياعا قوڭىراۋ سوعادى.
وقيعا ورنىنا كەلگەن پوليتسيا قىزمەتكەرلەرىنە جازعى ۇيدە بەكىنىپ العان قىلمىسكەر ەسىك اشپاي, كەپىلگە الىنعانداردىڭ ومىرىنە قاۋىپ توندىرەتىنىن ايتىپ قورقىتقان. وسى جەردە كەپىلگە العان كەلىنشەك وزىنە 5 ميلليون تەڭگە قارىز دەپ تالاپ قويادى.
پوليتسيا قىلمىسكەردى ۇستاپ, كەپىلگە العان ايەلدى بوساتىپ, اۋىر جارالانعاندار اۋرۋحاناعا جەتكىزىلگەنىمەن, ەكى قارتتىڭ ءومىرىن قۇتقارۋ مۇمكىن بولمادى. سوت بارىسىندا ايىپتالۋشى كىناسىن ءىشىنارا مويىنداسا دا, پروكۋرور وعان ءومىر بويى باس بوستاندىعىنان ايىرۋ جازاسىن تاعايىنداۋدى سۇرادى.
اقتوبە وبلىسى.
