سالتاناتتى شارانى اۋدان اكىمى جاسۇلان ەستەنوۆ اشىپ, جينالعانداردى عاجايىپ عيماراتتارىمەن, ەرەكشە كەلبەتىمەن كوز تارتاتىن استانا قالاسىنىڭ مەرەكەسىمەن قۇتتىقتاپ, اۋداننىڭ الەۋمەتتىك-ەكونوميكالىق دامۋىنا از-كەم توقتالىپ ءوتتى. ودان كەيىن كوپتەن كۇتكەن قۋانىش يەلەرىنە تۇرعىن ۇيلەردىڭ كىلتىن سالتاناتتى تۇردە تابىستادى. قولىنا پاتەر كىلتىن الىپ, جۇرەكجاردى قۋانىشقا كەنەلگەن 37 وتباسى تۇرعىن ءۇي كەزەگىندە تۇرعان حالىقتىڭ الەۋمەتتىك وسال توبىنا جاتادى. ولاردىڭ قاتارىندا جەتىم, اتا-اناسىنىڭ قامقورلىعىنسىز قالعان بالالار, مۇمكىندىگى شەكتەۋلى بالانى ءوسىرىپ وتىرعاندار, كوپبالالى جانە تولىق ەمەس وتباسىلار بولدى. جاڭا باسپانا تۇرعىندارعا «ارناۋ» تۇرعىن ءۇي كەشەنى جانە «ساۋكەلە» ىقشام اۋداندارىنان بەرىلدى.
ايتا كەتۋ كەرەك, وتكەن جىلى اۋداندا «حالىقتىڭ الەۋمەتتىك جاعىنان وسال توپتارىنا جاتاتىن وتباسىلارعا» ساتىپ الۋ قۇقىعىنسىز مەملەكەتتىك تۇرعىن ءۇي قورىنان باسپاناعا مۇقتاج 85 وتباسىعا جاڭا پاتەر كىلتى تابىستالدى. بۇل – تۇرعىن ۇيمەن قامتاماسىز ەتۋ باعىتىندا اتقارىلعان جۇيەلى جۇمىستىڭ ناقتى ناتيجەسى.
بيىلعى جىلدىڭ باسىنان بەرى تاعى 36 وتباسى باسپانالى بولدى. بۇگىنگى تاڭدا ولاردىڭ قاتارىن 37 وتباسى تولىقتىرىپ, كوپتەن كۇتكەن قونىستويىن اتاپ وتۋدە. وسىلايشا سوڭعى ءبىر جارىم جىل ىشىندە 158 وتباسى ءوز شاڭىراعىنا يە بولدى.
مۇنىڭ ءبارى – حالىقتىڭ ءال-اۋقاتىن ارتتىرۋعا, الەۋمەتتىك قولداۋدى كۇشەيتۋگە باعىتتالعان مەملەكەتتىك ساياساتتىڭ ناقتى كورىنىسى.
«باسپانا – تۇراقتىلىق پەن سەنىمدىلىكتىڭ كەپىلى», – دەگەن اۋدان اكىمى الداعى ۋاقىتتا دا بۇل باعىتتاعى جۇمىستار جالعاسىن تاباتىنىن اتاپ ايتتى.
الماتى وبلىسى.
