مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, بۇل قاراجات بۇكىل ەل بويىنشا الەۋمەتتىك ماڭىزى بار ينفراقۇرىلىم جوبالارىن دامىتۋعا باعىتتالۋدا.
قاراعاندى وبلىسىندا قايتارىلعان اكتيۆتەردىڭ ەسەبىنەن اۋىلدىق دەنساۋلىق ساقتاۋ سالاسى مەن تۇرعىن ءۇي-كوممۋنالدىق شارۋاشىلىق (تكش) جۇيەسىن جاڭعىرتۋعا باسىمدىق بەرىلگەن. بۇگىندە ءوڭىردىڭ جەتى اۋدانىندا 51 نىساننىڭ قۇرىلىسى جۇرگىزىلۋدە. ولاردىڭ قاتارىندا جاڭا دارىگەرلىك امبۋلاتوريالار, فەلدشەرلىك-اكۋشەرلىك پۋنكتتەر جانە مەديتسينالىق بەكەتتەر بار. بۇل جوبالار اۋىل تۇرعىندارىنا مەديتسينالىق كومەكتىڭ قولجەتىمدىلىگىن ارتتىرىپ, ساپالى قىزمەت الۋعا مۇمكىندىك بەرەدى. ەندى اۋداندىق نەمەسە وبلىستىق ورتالىقتارعا بارىپ, دارىگەر قابىلداۋىنا جازىلۋدىڭ قاجەتتىلىگى ازايادى. اتالعان جوبالاردى جۇزەگە اسىرۋ ءۇشىن ارنايى مەملەكەتتىك قورعا قايتارىلعان قاراجات ەسەبىنەن قاراعاندى وبلىسىنا 5,9 ملرد تەڭگە ءبولىندى. بۇل سوما مەديتسينالىق نىسانداردىڭ قۇرىلىسىن اياقتاۋعا باعىتتالدى. سونىمەن قاتار, تكش سالاسىندا دا ماڭىزدى جوبالار قولعا الىنعان. اتالعان قور قارجىسى ەسەبىنەن وبلىس اۋماعىندا 11 ينفراقۇرىلىمدىق جوبا — سۋ قۇبىرى مەن سۋ جۇيەلەرى جەلىلەرىنىڭ قۇرىلىسى جۇرگىزىلۋدە. بۇل جوبالار بيىلعى جىلى تولىق اياقتالادى دەپ جوسپارلانۋدا.
قاراعاندى وبلىسى
