بىلتىر ەلىمىزدە ويىن بيزنەسى جانە لوتەرەيا قىزمەتى ماسەلەلەرى بويىنشا زاڭناماعا تۇزەتۋلەر كۇشىنە ەندى. ەندى قىلمىستىق كودەكستىڭ 307-بابىنا سايكەس زاڭسىز ويىن بيزنەسىن ۇيىمداستىرعانى ءۇشىن باس بوستاندىعىنان ايىرۋ جازاسى بەلگىلەنگەن. ماسەلەن, «زاڭسىز ويىن بيزنەسىن ۇيىمداستىرۋ» بويىنشا قك 307-بابىنىڭ 3-بولىگىندە ويىن مەكەمەسiن زاڭسىز اشۋ نە ۇستاۋ نەمەسە ويىن بيزنەسi سالاسىنداعى قىزمەتتi زاڭسىز ۇيىمداستىرۋ, سول سياقتى زاڭسىز ويىن بيزنەسى ءۇشىن ءۇي-جايلار بەرۋ نە قازاقستان رەسپۋبليكاسىنىڭ ويىن بيزنەسى تۋرالى زاڭناماسىندا بەلگىلەنگەن ورىنداردان تىس قۇمار ويىندارىن ۇيىمداستىرۋ جانە وتكىزۋ, ەلەكتروندىق كازينو جانە ينتەرنەت-كازينو قىزمەتىن ۇيىمداستىرۋ نە ويىن بيزنەسى سالاسىنداعى قىزمەتتى ليتسەنزياسىز جۇزەگە اسىرۋ – اۋىرلاتاتىن جاعدايلاردا مۇلكى تاركىلەنىپ, ءتورت جىلدان جەتى جىلعا دەيىنگى مەرزىمگە باس بوستاندىعىنان ايىرۋعا جازالانادى.
الايدا, وسىنداي قاتاڭ شارالارعا قاراماستان, اۋىردىڭ ءۇستى, جەڭىلدىڭ استىمەن ءجۇرىپ, وڭاي ولجانىڭ سوڭىندا زاڭدى اتتاپ وتەتىندەر ءالى دە بار. جىل باسىنان بەرى جۇرگىزىلگەن اۋقىمدى رەيدتەر مەن تەكسەرۋلەردىڭ ناتيجەسىندە ويىن اۆتوماتتارى مەن كازينولاردىڭ 47 جاسىرىن زالى جويىلدى. بۇل رەتتە 215 بىرلىك ستاتسيونارلىق اۆتومات, قۇمار ويىندارعا ارنالعان ءموبيلدى تەرمينال تاركىلەندى. سونىمەن قاتار زاڭسىز ونلاين-كازينولار مەن ستاۆكالاردى ۇسىناتىن سايتتارعا 11 300-دەن استام سىلتەمەلەر بۇعاتتالدى. بۇعاتتالعان الاڭداردىڭ قاتارىندا .kz دومەندىك ايماقتارى بار رەسۋرستار, سونداي-اق قازاقستاندىق زاڭنامانى اينالىپ وتۋدە بەلسەندى جۇمىس ىستەيتىن پلاتفورمالار بار.
قما زاڭسىز ويىن بيزنەسىمەن كۇرەس تەك سالىق تۇسىمدەرىن قورعاۋعا عانا ەمەس, سونىمەن قاتار الەۋمەتتىك تاۋەكەلدەردى ازايتۋعا دا باعىتتالعانىن اتاپ كورسەتەدى. اگەنتتىك قازاقستاندىقتاردى شەت قالماۋعا جانە ويىن قىزمەتىنىڭ فاكتىلەرى تۋرالى حابارلاۋعا شاقىرادى.
«لۋدومانيا حالىقتىڭ ايتارلىقتاي قارجىلىق شىعىندارىن تۋدىرادى, قىلمىس دەڭگەيىنىڭ وسۋىنە جانە وتباسىلىق شيەلەنىستەرگە اكەلەدى. زاڭسىز ويىنداردىڭ ءاربىر قاتىسۋشىسى نەمەسە ۇيىمداستىرۋشى قىلمىستىق سحەمانىڭ ءبىر بولىگىنە اينالىپ, اينالاسىنداعىلاردىڭ ءومىرىن بۇزادى, ەكونوميكاعا زالال كەلتىرەدى. قاۋىپسىزدىك اركىمنىڭ جاۋاپكەرشىلىگىنەن باستالاتىنىن ەستەن شىعارماڭىز», دەپ جازادى اگەنتتىك.
ءىىم ىشكى قاۋىپسىزدىك قىزمەتتەرى مەن قارجىلىق مونيتورينگ بىرلەسكەن وپەراتسيالاردى جالعاستىرۋدى, سونداي-اق قاراجاتتى جىلىستاتۋدى توقتاتۋ ءۇشىن ويىن بيزنەسىمەن بايلانىستى ۆاليۋتالىق وپەراتسيالاردى باقىلاۋدى كۇشەيتۋدى جوسپارلاپ وتىر.
