– ۆالەري ەركەش ۇلى, ءسىز رەسەيدە دۇنيەگە كەلدىڭىز, ۋكراينا مەن ەستونيادا ءومىر ءسۇردىڭىز. الايدا بۇگىندە قازاقستان ازاماتىسىز جانە وسى ەلدىڭ تۋى استىندا جارىستارعا قاتىساسىز. مۇنداي شەشىمگە نە سەبەپ بولدى؟
– مەن رەسەيدىڭ ءبىر اۋىلىندا, شىعىس قازاقستاننان شىققان قازاق وتباسىندا دۇنيەگە كەلدىم. بالالىق شاعىمنان باستاپ ءتۇرلى تىلدەر مەن مادەنيەتتەر ورتاسىندا ءوستىم. كەيىن ۋكراينادا ءبىلىم الىپ, اسكەري فلوتتا قىزمەت ەتتىم, ال ەستونيادا تۇرىپ جاتقانىما قىرىق جىلدان استى. بىراق جۇرەگىمدە قازاقى بولمىسپەن بايلانىس ەشقاشان ۇزىلگەن ەمەس.
60 جاسقا كەلگەندە ءوز شەشىمىمدى شىعاردىم. ەندى مەن ءوز تاريحي وتانىم – قازاقستاننىڭ اتىنان جارىسقا قاتىسامىن دەپ ءتۇيدىم. بۇل – سانالى, جۇرەكتەن شىققان جانە پاتريوتتىق شەشىم بولدى. بۇل مەن ءۇشىن قازاقستان حالقى اسسامبلەياسىنىڭ يدەياسىنا ساي ارەكەت – ءوز تەگىڭە قۇرمەتپەن قاراۋ, باسقا ۇلت وكىلدەرىمەن ءوزارا تۇسىنىستىك پەن سىيلاستىقتا ءومىر ءسۇرۋ.
– سپورتتاعى جولىڭىز قالاي باستالدى؟
– 50 جاسىمدا, تەك دەنساۋلىقتى جاقسارتۋ ماقساتىندا جۇگىرۋدى باستادىم. بىراق سپورتقا بىردەن عاشىق بولدىم. سول كەزدە-اق جاسقا قاراماي دامۋ مەن جەڭىسكە جەتۋگە بولاتىنىن ءتۇسىندىم. قازىر جەتى ەلدىڭ چەمپيونىمىن, ەۋروپا ۆيتسە-چەمپيونىمىن جانە جاس ساناتىم بويىنشا الەمدىك ۇزدىك وندىققا كىرەمىن. بۇل – مەن ءۇشىن ۇلكەن ماقتانىش. ويتكەنى بۇل تەك سپورت ەمەس, سونىمەن قاتار ادامدار اراسىنداعى دوستىقتى نىعايتاتىن الەۋمەتتىك قوزعالىس. بۇل – قازاقستان حالقى اسسامبلەياسىنىڭ نەگىزگى يدەيالارىنىڭ ءبىرى.
– Masters Athletics Kazakhstan فەدەراتسياسىنىڭ قۇرىلۋى تۋرالى ايتىپ بەرىڭىزشى. ءبارى قالاي باستالىپ ەدى؟
– 2021 جىلى ءبىز بار بولعانى 12 ادامنان باستادىق. قازىر ۇيىمداستىرىپ جاتقان جارىستارىمىزعا 300-400 ادامعا دەيىن قاتىسادى. بۇل ەندى جاي سپورتتىق ۇيىم ەمەس, ناعىز قوزعالىسقا اينالدى. بىزگە ارداگەر سپورتشىلار دا, جاستار دا كەلەدى. باستىسى كەز كەلگەن جاستا باستاپ, جەتىستىككە جەتۋگە بولاتىنىن دالەلدەپ ءجۇرمىز.
بۇل قوزعالىس تەك سپورت تۋرالى ەمەس, بۇل ادام رۋحى, جەڭىسكە دەگەن جىگەر, ءومىردى سۇيە ءبىلۋ تۋرالى. قازاقستان حالقى اسسامبلەياسى مۇنداي باستامالاردى قولدايتىنىنا سەنەمىن. ويتكەنى بۇل – ۇرپاقتاردى, ايماقتاردى, ۇلتتاردى بىرىكتىرەتىن كۇش.
– ALATAU 2025 تۋرنيرىنە قاتىسۋ ءسىز ءۇشىن نەنى بىلدىرەدى؟
– بۇل مەن ءۇشىن ۇلكەن قۇرمەت. الماتىدا وتەتىن بۇل تۋرنير ورتالىق ازيا ءۇشىن العاشقى ءارى ەڭ اۋقىمدى دودا بولماق. مۇندا كاسىبي سپورتشىلار دا, اۋەسقويلار دا, ءتۇرلى ۇلت پەن ەلدىڭ وكىلدەرى جينالادى. ەلىمىزدىڭ تۋىن كوتەرىپ, وسى دودادا بولۋ مەن ءۇشىن ماقتانىش.
ايتپاقشى, ءتۋرنيردىڭ سەرىكتەسى – قازاقستان حالقى اسسامبلەياسى ارنايى «ەتنوسارالىق تاتۋلىقتى نىعايتۋعا قوسقان ۇلەسى ءۇشىن» اتتى ماراپات تاعايىندادى. بۇل وتە ماڭىزدى قادام. ويتكەنى سپورت حالىقتار دوستىعى مەن ءوزارا قۇرمەتتىڭ ەڭ كۇشتى قۇرالدارىنىڭ ءبىرى.
– سوڭعى سۇراق. قازاقستان حالقىنا نە ايتقىڭىز كەلەدى؟
– بارشاڭىزدى ALATAU 2025 تۋرنيرىنە شاقىرامىن! 6-8 شىلدە كۇندەرى الماتى قالاسىنداعى وليمپيادالىق دايارلىق ورتالىعىنا كەلىپ, سپورتشىلاردى قولدايىق! ويتكەنى سپورت – تەك جارىس ەمەس, ۇلتتار دوستىعىنىڭ كوپىرى. بۇل بىرلىك پەن بولاشاققا دەگەن سەنىمنىڭ مانيفەسى. راسىندا بۇل – قازاقستان حالقى اسسامبلەياسىنىڭ رۋحىن ناقتى ىسپەن كورسەتۋ الاڭى.
-اڭگىمەڭىزگە, راحمەت!
