كوللاجدى جاساعان – قونىسباي شەجىمباي, «EQ»
بۇل تۋرالى ەنەرگەتيكا ۆيتسە-ءمينيسترى سۇڭعات ەسىمحانوۆ ايتتى. ونىڭ سوزىنشە, مينيسترلىك ەكولوگيالىق تۇراقتى بولاشاققا باعىتتالعان جۇيەلى جۇمىستى جالعاستىرادى. 2024 جىل قورىتىندىسىندا ەلىمىزدە جالپى قۋاتى 3 032 مۆت بولاتىن 153 جاڭارتىلاتىن ەنەرگيا نىسانى جۇمىس ىستەپ تۇرسا, قازىر قۋاتى 3 122 مۆت-عا تەڭ 156 نىسان ەل يگىلىگىندە. بۇل ەلدەگى جالپى ەلەكتر ەنەرگياسى ءوندىرىسىنىڭ 6,43%-ىن قامتاماسىز ەتتى.
«بىلتىر جاڭارتىلاتىن ەنەرگيا كوزى نىساندارىنىڭ جالپى ەلەكتر ەنەرگياسىن ءوندىرۋ كولەمى ساعاتىنا 7,581 ملرد كۆت بولعان: جەل ەنەرگەتيكاسى – ساعاتىنا 4 513 ملرد كۆت; كۇن ەنەرگەتيكاسى – 1 889,6 ملرد كۆت; گيدروەنەرگەتيكا – 1 177 ملرد كۆت; بيوەنەرگەتيكا – 1,58 ملرد كۆت. ودان بولەك, قازىر قۋاتى 2 258 مۆت بولاتىن 91 جوبا ىسكە اسۋ ساتىسىندا تۇر. ولار – 20 جەل ەلەكتر ستانساسى (1 364,5 مۆت), 9 كۇن ەلەكتر ستانساسى (282,6 مۆت), 58 شاعىن سۋ ەلەكتر ستانساسى (591,81 مۆت) جانە 4 بيو-ەنەرگەتيكالىق جوبا (19,25 مۆت)», دەدى.
سالادا اۋكتسيوندىق ساۋدا تەتىگى ەنگىزىلگەننەن كەيىن قىتاي, گەرمانيا, تۇركيا, فرانتسيا, ءباا, وڭتۇستىك كورەيا ەلدەرىنەن سەكتورعا 260-تان استام كومپانيا كەلگەن.
«2027 جىلعا دەيىن جاڭارتىلاتىن ەنەرگيا جوبالارى بويىنشا 4,6 گۆت كولەمىندە اۋكتسيوندىق ساۋدا وتكىزۋ جوسپارلانعان. ونداعى نەگىزگى باسىم باعىتتار – ەنەرگيانى جيناقتاۋ جۇيەلەرىن دامىتۋ, B2B-كەلىسىمشارتتار تەتىگىن جەتىلدىرۋ, جەك نىساندارىن تەڭگەرىمدەۋشى نارىققا تولىق ەنگىزۋ, جاڭا جەك نىساندارى ءۇشىن ديسپەتچەرلىك ارتىقشىلىقتى الىپ تاستاۋ ماسەلەسىن قاراستىرۋ مەن شاعىن كولەمدى جەك جوبالارىن دامىتۋ», دەدى ۆيتسە-مينيستر.
ايتۋىنشا, ەل ازاماتتارى ءۇي شاتىرىندا كۇن ەنەرگياسىن ءوندىرىپ, پايدا تابۋىنا دا بولادى.
«بىلتىر زاڭنامانى جاڭارتتىق. قاراپايىم تىلمەن ايتقاندا, ەندى جەكە ءۇي تۇرعىنى شاتىرعا 200 كيلوۆاتتىق كۇن پانەلدەرىن ورناتىپ, ونىڭ 100 كيلوۆاتىن ءوزى تۇتىنىپ, قالعان 100 كيلوۆاتتى ساتا الادى. سول سياقتى ەنەرگيا تاراتۋشى كومپانيا ول ەنەرگيانى وڭىردەگى ورتاشا تاريفپەن ساتىپ الۋعا مىندەتتى. بۇل شارانى وتە ءتيىمدى تەتىك دەپ سانايمىز», دەدى س.ەسىمحانوۆ.
ۆيتسە-ءمينيستردىڭ سوزىنشە, شاعىن بيزنەس بۇل مۇمكىندىكتى بەلسەندى تۇردە پايدالانا باستاعان. بىلتىردىڭ وزىندە جالپى قۋاتتىلىق ەكى ەسە ارتىپتى.
