قوناقتارعا مينەرالوگيا, حيميالىق تالداۋ, گيدرومەتاللۋرگيا زەرتحانالارى, سونداي-اق شاعىن بايىتۋ فابريكاسى تانىستىرىلدى. ورتالىق كەن مەن وندىرىستىك قالدىقتىڭ فيزيكو-حيميالىق قاسيەتىن تەرەڭ زەرتتەۋگە مۇمكىندىك بەرەتىن, ەلىمىزدە سيرەك كەزدەسەتىن قۇرالدارمەن جابدىقتالعان. ونەركاسىپ مينيسترلىگىنىڭ وكىلدەرى ورتالىقتىڭ قىزمەتىن كەڭەيتۋ باستاماسىن كوتەرىپ, پوليمەتالل مەن سيرەك كەزدەسەتىن جەر ەلەمەنتتەرىن زەرتتەۋدى ۇسىندى. «قازاقمىس» الاڭدى جاڭا باستامالاردى دامىتۋعا ارنالعان سالاارالىق عىلىمي-تەحنولوگيالىق حاب رەتىندە جەتىلدىرۋگە دايىن ەكەنىن مالىمدەدى.
يدەيا قالاي تۋدى؟
R&D-حاب «قازاقمىس» كومپانياسى مەن عىلىم مينيسترلىگى بىرلەسىپ وتكىزگەن حاكاتون سەرياسىنىڭ جالعاسى رەتىندە قۇرىلدى. العاشقى حاكاتون جەزقازعاندا ۇيىمداستىرىلدى, ال 2024 جىلى قاراشادا ورتالىق تۇجىرىمداماسى پرەمەر-ءمينيستردىڭ قاتىسۋىمەن وتكەن جوعارى عىلىمي-تەحنيكالىق كوميسسيانىڭ وتىرىسىندا تانىستىرىلىپ, ماقۇلداندى.
2025 جىلعى اقپاندا قاراعاندىدا وتكەن ەكىنشى حاكاتوندا مىس كەنىن سىلتىسىزدەندىرۋ تەحنولوگياسى تالقىلاندى. ناۋرىز ايىندا «كازگيدرومەد» الاڭىندا بولاشاق ورتالىقتىڭ تەحنيكالىق تانىستىرىلىمى وتكىزىلدى.
ورتالىق نەمەن اينالىسادى؟
باسىمدىق بەرىلگەن باعىتتار: جەر استىندا جانە جەر ۇستىندە سىلتىسىزدەندىرۋ تەحنولوگياسى, ءوندىرۋ مەن وڭدەۋدى وڭتايلاندىرۋ, كەنەۋسىز كەن مەن قالدىقتان مەتالل الۋ, ەكولوگيالىق شەشىمدەر جانە تسيفرلاندىرۋ. ورتالىق حاكاتوندا ىرىكتەلگەن يدەيالاردى قولدانبالى زەرتتەۋگە, سىناقتان وتكىزۋگە جانە جاڭا وندىرىستىك شەشىم ەنگىزۋگە ارنالعان الاڭعا اينالادى. نەگىزگى باعىتتاردىڭ ءبىرى رەتىندە مەتالل الۋ تيىمدىلىگىن ارتتىرۋعا جانە حالىقارالىق سەرىكتەس تارتۋعا باسىمدىق بەرىلەدى.
«قازاقمىس» ەلىمىزدىڭ تاۋ-كەن ءوندىرۋشى كومپانيالارى مەن عىلىمي زەرتتەۋ ۇيىمدارىن جوباعا قوسىلۋعا شاقىرادى. ورتالىق بىرلەسىپ جۇمىس ىستەۋگە دايىن. ول كەندى سىلتىسىزدەندىرۋ مەن وڭدەۋ سالاسىنا تەحنولوگيا ازىرلەۋ مەن ەنگىزۋ شاراسىندا باستى پلاتفورماعا اينالۋى مۇمكىن.
