قۇقىق قورعاۋ قىزمەتكەرلەرىنىڭ جۇمىسىنا كەرى اسەرىن تيگىزەتىن وزەكتى ماسەلە الماتى وبلىستىق ماسليحاتىنداعى «Amanat» پارتياسى دەپۋتاتتىق فراكتسيا جينالىسىندا كوتەرىلدى. وبلىستىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى نۇرجان بايقۇلوۆتىڭ مالىمدەۋىنشە, قاراجاتتىڭ جوقتىعىنان اتالعان اۋدانداردا ۋچاسكەلىك ينسپەكتورلار ءالى كۇنگە دەيىن بەيىمدەلمەگەن نەمەسە جالعا الىنعان عيماراتتاردا جۇمىس ىستەۋگە ءماجبۇر.
– ۋچاسكەلىك ينسپەكتور – تۇرعىندارعا ەڭ جاقىن قۇقىق قورعاۋ وكىلى. حالىققا قولجەتىمدى بولۋ ءۇشىن ءار اۋىلدا ءتيىستى پۋنكت بولۋى كەرەك. بيىل ەڭبەكشىقازاقتا – 3, ىلە اۋدانىندا – 3, تالعاردا 4 پۋنكت سالۋ جوسپارلانعان ەدى. الايدا بۇل نىسانداردىڭ ەشقايسىسىنا قارجى قارالماعان. بۇل تەك پوليتسيا جۇمىسىنا ەمەس, تۇتاستاي العاندا قوعامدىق قاۋىپسىزدىككە اسەر ەتەدى, – دەدى ن.بايقۇلوۆ.
فراكتسيا توراعاسى لاززات تۇرلاشوۆ بۇل ماسەلەنى كەيىنگە قالدىرۋعا بولمايتىنىن اتاپ ءوتتى. ونىڭ ايتۋىنشا, ۋچاسكەلىك پۋنكتتەردىڭ بولۋى تۇرعىنداردىڭ قاۋىپسىزدىككە دەگەن سەنىمىن ارتتىرادى.
– بۇل – ءبىزدىڭ سايلاۋالدى جول كارتاسىندا كورسەتىلگەن ناقتى مىندەتتەردىڭ ءبىرى. ۋچاسكەلىك پۋنكت – جاي عانا عيمارات ەمەس, حالىق پەن بيلىك اراسىنداعى تىكەلەي بايلانىس ورنى. سوندىقتان بۇل ماسەلەنى نازاردان شىعارماي, شەشىم قابىلداۋدى تالاپ ەتەمىز, – دەدى فراكتسيا توراعاسى.
فراكتسيا وتىرىسىنىڭ قورىتىندىسى بويىنشا, دەپۋتاتتار وبلىستىق بيۋدجەتكە وزگەرىس ەنگىزىپ, 10 پوليتسيا پۋنكتىنىڭ قۇرىلىسىن قارجىلاندىرۋدى ۇسىندى. پارتيا بۇل ماسەلەنى باقىلاۋدا ۇستايتىنىن جەتكىزدى.
«Amanat» پارتياسىنىڭ 2023–2027 جىلدارعا ارنالعان سايلاۋالدى باعدارلاماسى اياسىندا وتكەن جىلى دا قوعامدىق قاۋىپسىزدىكتى كۇشەيتۋ باعىتىندا بىرقاتار ناقتى ءىس-شارا جۇزەگە استى.
بىلتىر الماتى وبلىسىندا مەملەكەت-جەكەشەلىك ارىپتەستىك ارقىلى 9 100 بەينەباقىلاۋ كامەراسى مەن 325 ينتەللەكتۋالدى باقىلاۋ جۇيەسى ورناتۋ جوباسى باستالدى. قوناەۆ قالاسىندا سۋقويماسى ماڭىندا قوسىمشا 51 كامەرا ىسكە قوسىلدى.
سونىمەن قاتار جەرگىلىكتى بيۋدجەت ەسەبىنەن ۋچاسكەلىك ينسپەكتورلارعا ارنالعان 8, ال پاترۋلدىك پوليتسياعا 26 قىزمەتتىك اۆتوكولىك ساتىپ الىنىپ, تولىق پايدالانۋعا بەرىلگەن.
الماتى وبلىسى
