بۇل قۇرلىقتىق اۋقىمداعى جىل سايىنعى ءداستۇرلى ءىس-شارانى احقو-نىڭ حالىقارالىق تورەلىك ورتالىعى (حتو) Herbert Smith Freehills Kramer LLP زاڭ فيرماسىمەن بىرلەسىپ ۇيىمداستىردى.
اپتالىقتىڭ اشىلۋ سالتاناتىندا احقو سوتىنىڭ توراعاسى مەلدون لوردى بەرنەتت, حالىقارالىق تورەلىك ورتالىعىنىڭ توراعاسى توماس كريۋممەل جانە پرەزيدەنت اكىمشىلىگىنىڭ مەملەكەتتىك قۇقىق ءبولىمى باسشىسىنىڭ ورىنباسارى الما مۇقانوۆا, احقو باسقارۋشىسى رەنات بەكتۇروۆ ءسوز سويلەپ, حالىقارالىق اربيتراجدى دامىتۋعا, قولدانىلاتىن زاماناۋي تاجىريبە مەن مۇمكىندىكتەردى, سىن-قاتەرلەر مەن شەشىمدەردى تالقىلاۋعا مۇمكىندىك بەرەتىن اپتالىقتىڭ ءمان-ماڭىزىنا توقتالدى.
جالپى, بۇل اپتالىققا ەلىمىزدەن جانە سىرت ەلدەردەن 400-گە جۋىق دەلەگات تىركەلگەن. بۇل ءىس-شارادا حالىقارالىق جەكەشە قۇقىقتى بىرىزدەندىرۋ ينستيتۋتىنىڭ (UNIDROIT) پرەزيدەنتى, حالىقارالىق اربيتراج سالاسىنداعى الەمگە ايگىلى ساراپشى, پروفەسسور ماريا كيارا مالاگۋتيمەن وتەتىن سەسسيا كۇننىڭ ماڭىزدى ساتتەرىنىڭ ءبىرى بولدى.
ول يتاليانىڭ سىرتقى ىستەر مينيسترلىگىنە ساۋدا ماسەلەلەرى بويىنشا كەڭەس بەرىپ, دۇنيەجۇزىلىك بانك, ەۋروپالىق ورتالىق بانك جانە ەۋروپالىق وداق سوتى سەكىلدى ۇلكەن ۇيىمدارعا زاڭگەرلىك قولداۋ كورسەتەتىن بىلىكتى ساراپشى.
ۇيىمداستىرۋشىلاردىڭ ايتۋىنشا, بيىلعى ءىس-شارا باعدارلاماسىندا التى سەسسيا قاراستىرىلعان. قوناقتار اربيتراج جانە داۋلاردى بالاما شەشۋ جولدارىنداعى سوڭعى ۇردىستەرمەن, سونداي-اق ترانسشەكارالىق داۋ-جانجالداردا تاراپتار اراسىنداعى ءوزارا تاجىريبەسىمەن تانىسادى. باعدارلاما اياسىندا قازاقستانداعى ينۆەستيتسيالىق احۋال مەن ينۆەستورلاردىڭ قۇقىقتىق قورعالۋ ماسەلەلەرى قاراستىرىلادى.
بۇدان بولەك, كونفەرەنتسيا اياسىندا داۋلاردى شەشۋ سالاسىنداعى حالىقارالىق ىنتىماقتاستىقتى دامىتۋعا باعىتتالعان بىرقاتار ەكىجاقتى كەلىسىمدەرگە قول قويىلدى.
