استانا قالاسى بويىنشا قارجىلىق مونيتورينگ اگەنتتىگى دەپارتامەنتى مەكتەپتىڭ لاۋازىمدى تۇلعالارىنا قاتىستى سوتقا دەيىنگى تەرگەپ-تەكسەرۋ جۇرگىزىپ جاتىر. تەرگەۋ دەرەكتەرىنە قاراعاندا, قما مەن ۇقك قىزمەتكەرلەرى بىرلەسىپ جۇرگىزگەن جۇمىستار ناتيجەسىندە 900 ميلليون تەڭگەدەن استام قارجىنىڭ ۇرلانعانى انىقتالعان.
كۇدىكتىلەر قاتارىندا مەكتەپتىڭ بۇرىنعى ديرەكتورى مەن باس ەسەپشى بار. انىقتالعانداي, اتا-انالار ءنولىنشى سىنىپتاعى بالالارىن وقىتۋ جانە جازعى لاگەرگە قاتىستىرۋ ءۇشىن قولما-قول تۇردە تولەگەن اقشالار مەكتەپ شوتىنا تۇسپەگەن. بۇل قارجى مەكتەپتىڭ رەسمي كىرىسىندە كورسەتىلمەي, جەكە ماقساتتارعا پايدالانىلعان كورىنەدى.
تەرگەۋ بارىسىندا تاعى شامامەن 16 ميلليون تەڭگە مەكتەپتە ءىس جۇزىندە جۇمىس ىستەمەگەن اتى بار, زاتى جوق تۇلعالارعا اۋدارىلعانى بەلگىلى بولدى. ولاردىڭ قاتارىندا كۇدىكتىلەردىڭ تۋىستارى دا بولعان, الايدا ولار مەكتەپ قىزمەتكەرلەرى رەتىندە تىركەلىپ, جالاقى الىپ كەلگەن.
«قىلمىستىق جولمەن الىنعان قاراجاتقا جالپى قۇنى 382 ميلليون تەڭگە تۇراتىن م ۇلىك – ەلوردادان ەكى پاتەر, كوتتەدج جانە اۆتوكولىك ساتىپ الىنعان. قازىرگى تاڭدا سوت سانكتسياسىمەن بۇل م ۇلىككە تىيىم سالىندى. كۇدىكتىلەر ۋاقىتشا ۇستاۋ يزولياتورىنا قامالدى», دەلىنگەن رەسمي حابارلامادا.
قىلمىستىق ءىس ماتەريالدارى قىلمىستىق-پروتسەستىك كودەكستىڭ 201-بابىنا سايكەس جاريا ەتىلمەيدى.
ايتا كەتەيىك, بۇعان دەيىن وقۋ-اعارتۋ ءمينيسترى عاني بەيسەمباەۆقا ەلىمىزدەگى مەكتەپتەر مەن بالاباقشالاردا بۋحگالتەرلەر قاتىسقان جەمقورلىق فاكتىلەرى جيىلەپ كەتكەنى جونىندە سۇراق قويىلعان ەدى. ءمينيستردىڭ ايتۋىنشا, بىرنەشە جىل بۇرىن مينيسترلىك پەن سىبايلاس جەمقورلىققا قارسى قىزمەت بىرلەسىپ, مەكتەپتەردى, بالاباقشالاردى جانە مينيسترلىكتىڭ ءوزىن جان-جاقتى تەكسەرۋگە كىرىسكەن. سول ۋاقىتتان بەرى ءبىلىم بەرۋ سالاسىنداعى ۇرلىق-قارلىقتىڭ جالپى سوماسى 18 ميلليارد تەڭگەگە جەتكەنى انىقتالعان. بۇل دەرەكتەر سوڭعى 5–6 جىل ىشىندەگى جاعدايدى كورسەتەدى.
