تازا جاعالاۋ

«بۇلاق كورسەڭ كوزىن اش» دەيتىن بابا ءتامسىلىن بەرىك ۇستاناتىن اباي جاستارى وزەن كولدەردىڭ جاعاسىن تازالاۋدى قولعا الدى.

– ءىس-شارا ماقساتى – سۋ ايدىندارىنىڭ جاعالاۋىن جانە ەل كوپ جينالاتىن دەمالىس ورىندارىن تۇرمىستىق قالدىقتان تازارتۋ, حالىق اراسىندا ەكولوگيالىق مادەنيەتتى قالىپتاستىرۋ. بۇل باستاما تۇرعىنداردى ەكولوگيالىق جاۋاپكەرشىلىككە شاقىرىپ, تابيعاتقا جاناشىرلىق تانىتۋعا سەپتىگىن تيگىزەدى. اكتسياعا جاستار ۇيىمدارى, ستۋدەنتتەر, ەرىكتىلەر مەن بەلسەندى تۇرعىندار قاتىستى. ولار وزەن-كول جاعالاۋلارىنان تۇرمىستىق قالدىقتار مەن پلاستيكتەردى سۇرىپتاپ جيناپ, قوقىستى ارنايى ورىندارعا شىعاردى. بۇعان قوسا تابيعاتتى قورعاۋعا ۇگىتتەيتىن ارنايى پاراقشالار تاراتىلدى, – دەيدى ۇيىمداستىرۋشىلار.

اكىمدىكتىڭ مالىمەتىنە سەنسەك, بيىل كوكتەمدە اباي وبلىسىندا 35,5 مىڭ توننا قاتتى تۇرمىستىق قالدىقتار پوليگونعا شىعارىلعان. 2 072 سۋ ايدىنى تازارىپ, 88 706 مەتر ارىق پەن 144 سۋبۇرقاق رەتكە كەلتىرىلدى. ەلدى مەكەندەردىڭ اۋماعىنا 46 348 اعاش پەن شىبىق وتىرعىزىلدى. سونىمەن قاتار «بۇكىل قازاقستاندىق اعاش وتىرعىزۋ كۇنى» اكتسياسى اياسىندا 26 ساۋىردە اباي وبلىسىندا قوسىمشا 23,1 مىڭ ءتۇپ كوشەت ەگىلگەن.

جاستار رەسۋرستىق ورتالىعىنىڭ مامانى ەرسىنبەك ورلەۋبەك تازالىق اكتسياسىنىڭ ءمان-ماڭىزىن ءتۇسىندىرىپ ءوتتى.

– بۇل تەك ءبىر رەتتىك تازالىق جۇمىسى ەمەس. «تازا قازاقستان» باعدارلاماسى – تۇرعىنداردىڭ ەكولوگيالىق جاۋاپكەرشىلىگىن ارتتىرىپ, قورشاعان ورتاعا دەگەن كوزقاراستى وزگەرتۋدى كوزدەيدى. ءبىز تابيعاتتى تۇتىنۋشى رەتىندە ەمەس, ونىڭ ءبىر بولشەگى رەتىندە قابىلداۋىمىز كەرەك. ءار ازاماتتىڭ ۇلەسى – ورتاق يگىلىككە باعىتتالعان ناقتى ارەكەت. جاستاردىڭ بەلسەندىلىگى مەن تۇرعىنداردىڭ قولداۋى ءبىزدى قۋانتادى. بۇل – ەلىمىزدىڭ ەرتەڭى ءۇشىن جاسالعان جارقىن قادام, – دەيدى ول.

«تازا قازاقستان» اكتسياسى اياسىندا ەكولوگيالىق ءىس-شارالار ءوڭىردىڭ بارلىق ەلدى مەكەنىندە, ءتىپتى شالعايداعى اۋىلدارعا دەيىن جالعاسىن تاپپاق.

اباي وبلىسى