بۇعان دەيىن «زاڭ مەن ءتارتىپ» اپتالىعى اياسىندا ىشكى ىستەر مينيسترلىگىنىڭ باسقارۋ اكادەمياسىنىڭ سالتاناتتى اشىلۋى وتكەن بولاتىن.
اۋديتوريا زاماناۋي تەحنيكالىق قۇرالدارمەن جابدىقتالعان. مۇندا ناقتى جاعدايلارعا ۇقساس تاكتيكالىق ستسەناريلەردى قايتا قۇرۋعا مۇمكىندىك بەرەتىن جۇيەلەر ورناتىلعان. كۇندەلىكتى قىزمەتتە قولدانىلاتىن اۆتوماتتاندىرىلعان باسقارۋ جۇيەسى دە ەنگىزىلگەن.
«مۇنداي اۋديتوريانىڭ اشىلۋى – بولاشاق وفيتسەرلەردى دايارلاۋداعى ماڭىزدى قادام. بۇل – تاجىريبەگە نەگىزدەلگەن وقىتۋ ءتاسىلىن جۇزەگە اسىرىپ, كومانديرلىك قابىلەتتى جەتىلدىرۋگە باعىتتالعان الاڭ. ءاربىر اۆتوماتتاندىرىلعان جۇمىس ورنى تاكتيكالىق ءىس-قيمىلداردى مودەلدەۋگە ارنالعان جانە اسكەري بولىمدەردى باسقارۋعا قاجەتتى اقپاراتتىق رەسۋرستارعا قول جەتكىزۋدى قامتاماسىز ەتەدى. بۇل ءوز كەزەگىندە جاتتىعۋ كەزىندە تاكتيكالىق تاپسىرمالاردى ءتيىمدى پىسىقتاۋعا جول اشادى», دەدى گەنەرال-مايور ا.بالتابەكوۆ.
اۋديتورياعا ەنگىزىلگەن تسيفرلىق شەشىمدەرگە بىرىڭعاي اقپاراتتىق ورتا كىرەدى. ول وڭىرلەردەگى جەدەل احۋال تۋرالى مالىمەتتەردى ورتالىقتاندىرىلعان تۇردە قابىلداپ, وڭدەۋگە مۇمكىندىك بەرەدى. سونىمەن قاتار شەشىم قابىلداۋدى قولداۋ جۇيەسى مەن گەواقپاراتتىق جۇيە ەنگىزىلگەن. بۇل پلاتفورمالاردا نورماتيۆتىك قۇجاتتار مەن جەكە قۇرامنىڭ ءىس-ارەكەتتەرىنىڭ الگوريتمدەرى قامتىلعان.
سونداي-اق پاترۋلدىك باعىتتار بويىنشا اسكەري جاساقتاردىڭ قوزعالىسىن ناقتى ۋاقىت رەجىمىندە كورسەتەتىن جاۋىنگەرلىك كەزەكشىلىكتى باقىلاۋ جانە مونيتورينگ جۇيەسى دە جۇمىس ىستەيدى.
قازىرگى تاڭدا ۇلتتىق ۇلان ەلىمىزدىڭ 21 قالاسىندا قوعامدىق ءتارتىپتى قامتاماسىز ەتەدى. قوعامدىق قاۋىپسىزدىك پەن ماڭىزدى نىسانداردى كۇزەتۋ ىسىنە 7 مىڭنان استام اسكەري قىزمەتشى جۇمىلدىرىلعان. سونىمەن قاتار ءىىم-گە قاراستى 39 قىلمىستىق اتقارۋ جۇيەسى مەكەمەسىن كۇزەتۋ دە سولاردىڭ مىندەتىنە كىرەدى.
ۇلتتىق ۇلاننىڭ قىزمەتى قۇقىق قورعاۋ ورگاندارىمەن, اتاپ ايتقاندا ءىىم, ۇقك, سىبايلاس جەمقورلىققا قارسى ءىس-قيمىل جانە قارجىلىق مونيتورينگ اگەنتتىكتەرىمەن بىرلەسكەن ارنايى وپەراتسيالارعا قاتىسۋدى دا قامتيدى.
