فوتو: ەرلان ومار
«2024 جىلعى كوكتەمگى سۋ تاسقىنى سالدارىنان قاراسۋ اۋدانىندا بەس كول: ءتىمتۋىر, قويباعار, الابوتا, بيەسويعان جانە جانشورا كولدەرى قوسىلىپ, جالپى اۋدانى 621 كم2 بولاتىن سۋ باسۋ ايماعىنىڭ قالىپتاسۋىنا اكەلدى. ۇزىندىعى 38 شاقىرىمدى قۇرايتىن ەلەكتر جەلىلەرىنىڭ 234 تىرەگى سۋ استىندا قالدى, بۇل اۋداننىڭ ەبج جالپى ۇزىندىعىنىڭ 15,5%-ىن قۇرايدى. تىرەكتەر قۇلاعان جاعدايدا 2 426 ابونەنت (10 مىڭعا جۋىق تۇرعىن) جانە 114 اۋىل شارۋاشىلىعى قۇرىلىمى ەلەكتر قۋاتىنسىز قالۋى مۇمكىن», دەپ حابارلادى ۇكىمەتتىڭ ءباسپاسوز قىزمەتى.
سۋ باسۋ ايماعىندا ماڭىزدى ينفراقۇرىلىمدىق نىساندار – وبلىستىق جانە اۋداندىق جولدار, بايلانىس جەلىلەرى, ەگىس القاپتارى مەن جايىلىمدار ورنالاسقان. وسىعان بايلانىستى قوستاناي وبلىسى اكىمدىگى سۋ تاسقىنى قاۋپىن ازايتۋ ءۇشىن ۇزىندىعى 14,2 شاقىرىم بولاتىن سۋ بۇرۋ ارناسىن سالۋ جوباسىن ازىرلەگەن.
جوبانىڭ جالپى قۇنى 1,9 ملرد تەڭگەنى قۇرايدى. ونىڭ ءبىر بولىگى وبلىستىق بيۋدجەت ەسەبىنەن قارجىلاندىرىلىپ وتىر. ال ۇكىمەت رەزەرۆىنەن بولىنگەن قارجى قۇرىلىس جۇمىستارىن ۋاقىتىلى اياقتاۋعا مۇمكىندىك بەرەدى.
