ماراپاتتاردى مادەنيەت جانە اقپارات ۆيتسە-ءمينيسترى قانات ىسقاقوۆ تابىستاپ, سالتاناتتى راسىمگە قاتىسۋشىلارعا مادەنيەت جانە اقپارات ءمينيسترى ايدا بالاەۆانىڭ اتىنان قۇتتىقتاۋ ءسوزىن جەتكىزدى.
– قازىرگى كەزەڭ – جاڭا يدەيالارعا تولى جاسامپازدىق ءداۋىرى. قوعامدا بولىپ جاتقان وزگەرىستەردىڭ بەل ورتاسىندا جۇرگەن بۇقارالىق اقپارات قۇرالدارىنىڭ ءرولى ولشەۋسىز. مەملەكەت باسشىسى اقپاراتتىق قاۋىپسىزدىكتى نىعايتۋدا جانە ەلىمىزدىڭ باسەكەگە قابىلەتتىلىگىن ارتتىرۋدا مەديا سالاسىنىڭ ماڭىزى زور ەكەنىن ءاردايىم اتاپ وتەدى, – دەدى ق.ىسقاقوۆ.
بۇگىندە ەلىمىزدە 4 871 بۇقارالىق اقپارات قۇرالى تىركەلگەن. ونىڭ ىشىندە 3 002-ءسى – مەرزىمدى باسىلىم, 236-سى – تەلەارنا, 98-ءى – راديوستانسا, 1 231-ءى – اقپارات اگەنتتىگى مەن ينتەرنەت-باسىلىم.
مەرەكەلىك ءىس-شارا بارىسىندا ەڭبەگى ەلەنىپ, قوشەمەتكە بولەنگەن جۋرناليستەر قاتارىنان «قازاق گازەتتەرى» سەرىكتەستىگىنىڭ قىزمەتكەرلەرى دە كورىندى. اتاپ ايتار بولساق, «درۋجنىە رابياتا» گازەتىنىڭ ارداگەرى ءالىمجان اكباروۆ پەن «Ana tili» گازەتىنىڭ ءتىلشىسى باعداگۇل بالاۋباي «قۇرمەت» وردەنىن يەلەنسە, «مىسل» جۋرنالى باس رەداكتورىنىڭ ورىنباسارى ساۋلە احمەتوۆا, «اقيقات» جۋرنالىنىڭ باس رەداكتورى ءداۋىرجان تولەباەۆ جانە «بالدىرعان» جۋرنالى باس رەداكتورىنىڭ ورىنباسارى باعدات ءماجيتوۆ «ەرەن ەڭبەگى ءۇشىن» مەدالىمەن ماراپاتتالدى. سونداي-اق «بالدىرعان» جۋرنالىنىڭ باس رەداكتورى ەرعالي باقاش «اقپارات سالاسىنىڭ ۇزدىگى» توسبەلگىسىنە يە بولدى.
ۆيتسە-مينيستر قولىنان ماراپات العان الماتىلىق ارىپتەستەر قاتارىندا جۋرناليستيكا ارداگەرى, ءال-فارابي اتىنداعى قازۇۋ-دىڭ جۋرناليستيكا فاكۋلتەتىنىڭ پروفەسسورى كاكەن قامزين «ەڭبەك ارداگەرى» مەدالىنە, ال «الماتى اقشامى» گازەتىنىڭ ءتىلشىسى, بەلگىلى جۋرناليست رايا ەسكەندىر «ەرەن ەڭبەگى ءۇشىن» مەدالىنە يە بولدى.
