سۋرەت: forbes.kz
سونىمەن قاتار تاراپتار كومپانيانىڭ ەل ەكونوميكاسىنىڭ باسىم سەكتورلارىنداعى قاتىسۋىن كەڭەيتۋ جونىندە پىكىر الماستى. «Air Liquide» كومپانياسى ءبىزدىڭ ەلگە 2016 جىلدان بەرى ينۆەستيتسيا سالىپ كەلەدى. كومپانيا جۇزەگە اسىرعان جوبالاردىڭ جالپى كولەمى 120 ملن ەۋرودان اسادى. قازىرگى ۋاقىتتا پاۆلودار قالاسىندا FOIK دەپ اتالاتىن بىرەگەي تەحنولوگيانى قولدانا وتىرىپ, جاڭا زاۋىتتىڭ قۇرىلىسى جۇرگىزىلىپ جاتىر. ينۆەستيتسيا كولەمى – 100 ملن ەۋرودان استام.
سونداي-اق رومان سكليار «شەلل» كومپانياسىنىڭ بارلاۋ جانە ءوندىرۋ ءبولىمىنىڭ اتقارۋشى ۆيتسە-پرەزيدەنتى ريچارد حاۋمەن كەلىسسوز وتكىزدى. كەزدەسۋ بارىسىندا تاراپتار ەكىجاقتى ىنتىماقتاستىقتىڭ قازىرگى جاي-كۇيى مەن پەرسپەكتيۆالارىن تالقىلادى. «شەلل» كومپانياسى وتاندىق مۇناي-گاز سالاسىنداعى ءىرى شەتەلدىك ينۆەستورلارىنىڭ ءبىرى بولىپ سانالاتىنى, سونداي-اق كاراشىعاناق, قاشاعان جانە كقك سياقتى ماڭىزدى جوبالارعا قاتىساتىنى اتاپ ءوتىلدى.
تاراپتار قاراشىعاناق گاز وڭدەۋ زاۋىتى جوباسىنا ەرەكشە نازار اۋداردى. اتالعان جوبا وبك بويىنشا تۇپكىلىكتى كەلىسىمشارتتارىنىڭ شەڭبەرىندە جۇزەگە اسىرىلادى. ءوز كەزەگىندە ريچارد حاۋ «قازاقستانمەن سەرىكتeستىگىمىزگە 30 جىلدان استى. بۇل ءبىز ءۇشىن ەرەكشە ماقتانىش. مەن ءۇشىن قازاقستانعا جاڭا قىزمەتتىك مارتەبەمدە قايتا ورالۋ – ۇلكەن قۇرمەت», دەدى.
رومان سكليار بۇل جوبانىڭ ستراتەگيالىق ماڭىزدىلىعىن اتاپ ءوتىپ, ونىڭ ىسكە اسۋىن جەدەلدەتۋدىڭ قاجەتتىگىن جەتكىزدى. كەزدەسۋ قورىتىندىسىندا تاراپتار ۇزاقمەرزىمدى ءارى ءوزارا ءتيىمدى ىنتىماقتاستىققا نيەتتى ەكەنىن راستادى.
