مەكتەپتىڭ ىشكى ينفراقۇرىلىمى قازىرگى زامان تالاپتارىنا ساي جابدىقتالعان. ءبىلىم ورداسىندا پاندىك كابينەتتەرمەن قاتار STEM جانە روبوتتەحنيكا سىنىپتارى, ينكليۋزيۆتى ءبىلىم بەرۋ ورتالىعى, كىتاپحانا, شەبەرحانا, سپورت جانە اكت زالى, كەڭ اسحانا مەن ءماجىلىس زالى قاراستىرىلعان.
ەڭسەلى ءبىلىم ورداسىنىڭ اشىلۋ سالتاناتىندا الماتى وبلىسىنىڭ اكىمىنىڭ ورىنباسارى بولات كۇرەڭبەكوۆ تۇرعىنداردى قۋانىشتارىمەن قۇتتىقتاپ, بۇل نىساننىڭ وڭىردەگى وزەكتى الەۋمەتتىك ماسەلەنىڭ شەشىمىنە اينالعانىن ايتتى.
«بۇل ءبىلىم ورداسى – پرەزيدەنت باستاماسىمەن جۇزەگە اسىپ جاتقان «كەلەشەك مەكتەپتەرى» جوباسى اياسىندا بوي كوتەرگەن العاشقى زاماناۋي مەكتەپتەردىڭ ءبىرى. مەملەكەت باسشىسىنىڭ ء«بىز قازاقستانداعى بارلىق بالانىڭ باقىتتى بولاشاعىن قامتاماسىز ەتۋىمىز كەرەك» دەگەن ءسوزى بۇگىنگى ءىستىڭ ءمان-ماڭىزىن اشا تۇسەدى», دەدى ول.
بۇگىندە حالىق سانى 15 مىڭنان اساتىن جاڭالىق اۋىلىندا 5 شاعىن اۋدان بار. وسى اۋىلدار بويىنشا 2 مىڭعا جۋىق بالا №37 ورتا مەكتەپتە ءۇش اۋىسىممەن ءبىلىم الىپ كەلگەن. ولاردىڭ جارتىسىنا جۋىعى جاڭا قۇرىلىستان تاسىمالدانىپ وقىتىلاتىن. ەندى زاماناۋي جاڭا مەكتەپتىڭ قۇرىلىسى اياقتالىپ, پايدالانۋعا بەرىلگەنىنە بالالارمەن قاتار, اتا-انالار دا شات-شادىمان بولىپ وتىر.
«اۋىلىمىزدا كوپبالالى وتباسىلار وتە كوپ. وسىعان دەيىن ءۇش اۋىسىمدا تاسىمالمەن وقىپ كەلدى. بالالارىمىز ساباققا بارىپ كەلگەنشە الاڭداپ وتىرامىز. جاڭا مەكتەپتىڭ اشىلۋىن اسىعا كۇتتىك. بارلىق ستاندارتقا ساي سالىنعانىنا, ەڭ باستىسى بالالارىمىزدىڭ ءبىلىم الۋىنا قىزىعۋشىلىعىن ارتتىراتىن ماتەريالدىق بازامەن جابدىقتالعانىنا قاتتى قۋانىپ وتىرمىز. مەنىڭ 5 بالام بار, 4-ءۋى مەكتەپتە, ۇزدىك وقيدى», دەيدى كوپبالالى انا شولپان ۇمبەتباەۆا.
وتكەن جىلى وڭىردە 9 جاڭا مەكتەپ قولدانىسقا بەرىلسە, بيىل تاعى 17 نىساننىڭ قۇرىلىسى جۇرگىزىلىپ جاتىر. بۇل باعىتتا مەملەكەت-جەكەمەنشىك ارىپتەستىك تەتىكتەرى قولدانىلىپ, جەكە ينۆەستيتسيالار دا تارتىلىپ وتىر.
ناتيجەلەرگە قول جەتكىزۋدە جەرگىلىكتى اتقارۋشى ورگاندارمەن قاتار, پارتيالىق باقىلاۋ مەن ساياسي قولداۋدىڭ دا ماڭىزى زور. «Amanat» پارتياسى وڭىرلەردەگى ينفراقۇرىلىمدىق باستامالاردىڭ جۇزەگە اسۋىنا تىكەلەي ارالاسىپ كەلەدى.
«ەكى جىل بۇرىن مەكتەپ تاپشىلىعى ماسەلەسىن شەشەمىز دەپ ۋادە بەردىك. سول كەزدە وبلىستا ءۇش اۋىسىمدى 52 مەكتەپ بولعان. قازىر بۇل سان 30-عا دەيىن قىسقاردى. جاڭالىقتاعى مەكتەپ – جول كارتاسىندا كوزدەلگەن 63 مەكتەپتىڭ قاتارىنداعى ناقتى جۇزەگە اسقان جوبا. قۇرىلىس باستالعان كۇننەن باستاپ پارتيالىق باقىلاۋدا بولدى. ۋادە بەرگەن سوڭ, سول ۇدەرىستىڭ ىشىندە بولۋ – ءبىزدىڭ مىندەت», دەدى «Amanat» پارتياسى الماتى وبلىستىق فيليالىنىڭ توراعاسى قۋات بايعوجاەۆ.
الماتى وبلىسى
