بالالار مەن جاسوسپىرىمدەر سپورتىن دامىتۋعا باعىتتالعان جوبانى جۇزەگە اسىرۋعا 8 ملن ەۋرو ينۆەستيتسيا سالىنادى. مۇندا ەلىمىزدىڭ بارلىق وڭىرىنەن الا دوپ قۋعا قۇمار بالالار قابىلدانىپ, الاڭسىز دايىندالۋىنا تولىققاندى جاعداي جاسالادى.
سالتاناتتى شارانى «TAV Airports Holding» باس ديرەكتورى سەركان كاپتان قۇتتىقتاۋ سوزبەن اشتى. ول كومپانيانىڭ بۇل جوباعا قاتىسۋى الەۋمەتتىك جاۋاپكەرشىلىكپەن عانا شەكتەلمەيتىنىن اتاپ ايتتى. ونىڭ سوزىنشە, فۋتبول اكادەمياسى كومپانيانىڭ ورنىقتى دامۋىندا ستراتەگيالىق ماڭىزعا يە.
«TAV Airports Holding» ءۇشىن تۇراقتى دامۋ باعىتتارى ورتاق جاۋاپكەرشىلىككە, قوعاممەن تىعىز بايلانىس ورناتۋعا, بيزنەستەن بولەك ماقساتقا ۇمتىلۋعا نەگىزدەلگەن. كورپوراتيۆتىك الەۋمەتتىك جاۋاپكەرشىلىك – بارشا قىزمەتىمىزدىڭ ۇستىنى. جاستاردىڭ دامۋىنا, قوعامنىڭ يگىلىگىنە باعىتتالعان باستامالاردى قولداۋ – ستراتەگيامىز بەن ءىس-ارەكەتىمىزدى ايقىندايتىن قۇندىلىق. جالپى, سپورت ادامداردى جاقىنداستىرىپ, ءار بالانىڭ بويىنداعى قابىلەت-قارىمىن اشادى. سوندىقتان قازاقستان فۋتبولىنىڭ دامۋىنا ۇلەس قوساتىنىمىزدى ماقتان ەتەمىز. وسكەلەڭ جاستاردى قولداۋ, ولاردى شيراتىپ, بيىك شىڭعا شىعارۋ – ۇلكەن مارتەبە», دەدى سەركان كاپتان.
اكادەميانىڭ قۇرىلىسى – ادام كاپيتالىنا, بالالاردىڭ بولاشاعى مەن سپورت الەۋەتىن ارتتىرۋعا باعىتتالعان ۇزاقمەرزىمدى ينۆەستيتسيا. مۇندا جاس تالانتتاردى انىقتاپ, ولاردى دامىتۋعا جۇيەلى نەگىز قالىپتاستىرىپ, كاسىبي دايىندىقپەن قاتار, وندا تۇرۋعا, ءبىلىم الۋعا, فۋتبول قاۋىمداستىعىنا بەيىمدەلۋگە قاجەتتى جاعداي جاسالادى.
فۋتبول فەدەراتسياسىنىڭ پرەزيدەنتى مارات وماروۆ اكادەميادا جاس فۋتبولشىلارعا جۇيەلى تۇردە زاماناۋي فۋتبول تالاپتارىنا ساي دايارلانۋعا بارلىق جاعداي جاسالاتىندىعىن ءمالىم ەتتى.
«بۇگىن ىرگەتاسى قالانعان فۋتبول اكادەمياسى – فۋتبول فەدەراتسياسىنىڭ اسا اۋقىمدى, ستراتەگيالىق ماڭىزى زور العاشقى جوباسى. ول ەلىمىزدەگى جاس فۋتبولشىلاردى دايارلاۋ جۇيەسىن وزگەرتىپ, جاڭا كوزقاراسپەن قاراۋعا مۇمكىندىك بەرەدى. اكادەمياعا قابىلدانعان بالالار وسىندا تۇرىپ, تالعاردىڭ مەكتەپتەرىندە وقيدى. تۇستەن كەيىن فۋتبولعا دايارلانادى. وسى جەردە تاماقتانىپ, تىنىعادى. دەمالىس كۇندەرى ۇيلەرىنە بارادى. باعدارلاما 2-3 جىلعا ارنالعان», دەدى م.وماروۆ.
قوناقتاردىڭ سوزىنەن سوڭ, اكادەميانىڭ ىرگەتاسىن قالاۋ ءراسىمى سالتاناتتى تۇردە جاريالاندى. ءىس-شارادا جوبا باسشىلىعى فۋتبول دوبىنا قولتاڭبالارىن قويىپ, ونى جاس سپورتشىلارعا تابىستادى.
جالپى اۋماعى 5 520 شارشى مەتر بولاتىن اكادەميا عيماراتى ءۇش نەگىزگى بلوكتان تۇرادى: سپورتتىق, اكىمشىلىك-تۇرمىستىق جانە جاتاقحانا. سپورتتىق بلوكتا جابىق فۋتبول زالى, جالپى دەنە دايارلىعى زالى, قالپىنا كەلۋ باسسەينى, كيىم اۋىستىراتىن, قىزمەتتىك بولمەلەر بولادى. اكىمشىلىك-تۇرمىستىق بلوكقا جاتتىقتىرۋشى كابينەتتەرى, مەديتسينالىق, وڭالتۋ بولمەلەرى, ءماجىلىس زالى, اسحانا, تەحنيكالىق بولمەلەر ورنالاسادى. تورتقاباتتى جاتاقحانادا وقۋشىلار مەن قىزمەتكەرلەرگە ارنالعان بولمەلەر, دەمالىس, جەكە دايىندىق ايماقتارى بار.
«KFF Academy by Almaty International Airport» – بالالار مەن جاسوسپىرىمدەر فۋتبولىن دامىتۋ جۇيەسىن نىعايتۋ جولىنداعى ماڭىزدى قادام. بۇل جاڭا بۋىن سپورتشىلارىن دايارلاۋعا ارنالعان تۇراقتى ينفراقۇرىلىمدى قالىپتاستىرۋ جۇمىسىنىڭ باستاماسى. اكادەميا ارىپتەستىك قارىم-قاتىناس پەن تاجىريبەنى ۇشتاستىرعان ەل سپورتىن جەتىلدىرۋدەگى ساپالى ءارى جۇيەلى كوزقاراستىڭ ۇلگىسىنە اينالماق.
سالتاناتتى ءىس-شاراعا قاتىسقان تالعار اۋدانىنىڭ اكىمى تاڭات ايداربەكوۆ سپورت ءماندى دە ماعىنالى ۇزاق ءومىر ءسۇرۋدىڭ بىردەن-ءبىر جولى ەكەنىن ايرىقشا اتاي كەلە, وڭىردە سالاماتتى ءومىر سالتىن قالىپتاستىرۋعا ىقپال ەتەتىن 243 سپورتتىق نىسان حالىققا قىزمەت كورسەتەتىنىن, ونىڭ ىشىندە 69 سپورت زال, 59 سپورت الاڭى, 13 سوڭعى ۇلگىدەگى شاعىن فۋتبول الاڭى, تەننيس كورتى, تاۋ شاڭعىسى, باسقا دا 17 سپورت نىسانى بۇگىندە تۇراقتى جۇمىس جاساپ جاتقانىن اتاپ ايتتى. ەندى سولاردىڭ قاتارىن تولىقتىراتىن فۋتبول اكادەمياسىندا ەلىمىزدىڭ ابىرويىن اسقاقتاتاتىن ءجاسوسپىرىم فۋتبولشىلار جاتتىعىپ, دىتتەگەن ماقساتقا جەتۋلەرىنە تىلەكتەستىگىن ءبىلدىردى.
فۋتبول اكادەمياسى دەمەكشى, 2009 جىلدان باستاپ 2018 جىلعا دەيىن ەلىمىزدەن ءبىر توپ بالا برازيلياداعى ايگىلى «ولە برازيل» اكادەمياسىنا فۋتبولدىڭ قىر-سىرىن مەڭگەرۋگە اتتانعان ەدى. دەگەنمەن, 80-گە جۋىق بالانىڭ اراسىنان تەك ماگومەد پاراگۋلگوۆ قانا ۇلتتىق قۇراما ساپىندا نەبارى ەكى ويىن وتكىزە الدى.
جوبا باستاپقىدا زور سەنىم تۋدىرعانىمەن, ناتيجە كوڭىل كونشىتپەدى. بۇل ساتسىزدىككە نە سەبەپ بولدى؟ برازيليالىق باپكەرلەردىڭ دەڭگەيى تومەن بە, الدە ءبىزدىڭ بالالاردىڭ الەۋەتى جەتكىلىكسىز بە؟ قالاي بولعاندا دا, جوبادان ەل كۇتكەندەي بىردە-ءبىر تولىققاندى فۋتبولشى شىقپادى. ءار جىلى بولىنگەن 83 ميلليون تەڭگەدەن استام قارجى بوسقا ءراسۋا بولدى.
ەندى سول سۇراق تاعى دا كۇن تارتىبىندە تۇر. تالعار فۋتبول اكادەمياسىنىڭ بولاشاعى قانداي بولماق؟ تاعى دا اكادەميا بالالارى جانكۇيەرلەرىن جەرگە قاراتىپ جۇرمەي مە؟
الماتى وبلىسى
