سۋرەت: youtube.com
ۆەلوشەرۋدىڭ اشىلۋ سالتاناتىندا گيمنازيا وقۋشىلارى ءال-فارابي ءىلياش, ايبوتا سيا اقىن ولەڭدەرىن وقىپ, قاتىسۋشىلارعا جىگەر مەن شابىت سىيلادى. قالالىق ءبىلىم ءبولىمىنىڭ باسشىسى ەسەنتاي ءاشىم ۆەلوشەرۋدىڭ اشىلۋىمەن قۇتتىقتاپ, ۆەلومارافوننىڭ ماڭىزىنا توقتالدى.
– ۇلى ابايدىڭ 180 جىلدىق مەرەيتويىندا وراي ۇيىمداستىرىلىپ وتىرعان يگى ءىستىڭ اباي ەسىمىن يەلەنگەن مەكتەپتەن باستاۋ الىپ جاتقانى قۋانىشتى. ۇلتىمىز ءۇشىن, ەل بولاشاعى ءۇشىن ابايدىڭ قىلعان قىزمەتى, ايتقان وي-تولعامدارى ارقاشان ماڭىزدى. حاكىم ابايدىڭ «تولىق ادام» ءىلىمىن قالىپتاستىرۋدا مەكتەپ ۇجىمى مەن اتا-انالار قاۋىمىنىڭ اتقارىپ جاتقان ەڭبەگى زور, – دەدى ەسەنتاي ءاشىم.
بەلگىلى ۆەلوشاباندوز, «تولىق ادام جانە ءتورت دامۋ», «اباي ارقىلى اعىلشىنشا ۇيرەن» جوبالارىنىڭ اۆتورى ەرنات راحمەتوللا ۆەلوسپورتتىڭ ادامعا تيگىزەر پايداسىمەن ءبولىستى.
– ۆەلوبەكەتتەرى بار, ينفراقۇرىلىمى دامىعان الماتى, استانا قالالارىن تولىقتاي ۆەلوقالا دەپ اتاۋعا بولادى. ءبىزدىڭ باستى ماقساتىمىز – قازىنالى قاراعاندى قالاسىن دا سول دەڭگەيگە جەتكىزىپ, جاڭا مۇمكىندىكتەرگە يە بولۋ. وسى ۋاقىتقا دەيىن ءبىراز ۆەلوشەرۋ ۇيىمداستىردىق. اباي اتامىزعا ارنالعان ۆەلوشەرۋدى الداعى ۋاقىتتا بۇدان دا اۋقىمدى تۇردە, شىعىس ەلىندە, اقىننىڭ تۋعان جەرىندە دۇبىرلەتىپ وتكىزۋدى كوزدەپ وتىرمىز, – دەيدى ەرنات مەلس ۇلى.
مەكتەپ اۋلاسىنان باستاۋ العان ۆەلوشەرۋ اباي ەسكەرتكىشى جانىندا جالعاسىن تاپتى. ابايدىڭ ولەڭدەرى مەن قارا سوزدەرى جونىندە ءسوز قوزعاعان عالىم, فيلولوگيا عىلىمدارىنىڭ دوكتورى جاندوس سماعۇلوۆ مۇنداي سالاماتتى ءومىر سالتىن ناسيحاتتايتىن ءىس-شارا داستۇرگە اينالسا دەگەن تىلەگىن ءبىلدىردى.
ۆەلوشەرۋگە قاتىسۋشىلاردىڭ كەلەسى مەجەسى ورتالىق ساياباق بولدى. ولار باستاپقى ورىننان مارە سىزىعىنا دەيىن ساياباق اۋماعىنداعى ءۇش نەگىزگى ايالدامانى باسىپ ءوتتى. العاشقى «اقيقات ءسوزى» ايالداماسىندا ۆەلوشاباندوزدار ابايدىڭ ولەڭدەرىن وقىدى. كەلەسى «حاكىم جۇرەگى» بەكەتىندە اقىننىڭ اندەرى شىرقالسا, سوڭعى «قارا ءسوز كەڭەس» ايالداماسىندا اباي اتامىزدىڭ قارا سوزدەرى تالقىلانىپ, قاتىسۋشىلار ءوزارا پىكىر الماستى.
سپورتتىق ءىس-شارانىڭ مارەسىنە جەتكەن بارلىق ۆەلوشاباندوز ارنايى مەدالدارمەن, قالالىق ىشكى ساياسات ءبولىمىنىڭ العىسحاتىمەن ماراپاتتالدى. ءىس-شارانىڭ وتۋىنە ۇيىتقى بولعان اباي اتىنداعى مەكتەپ-گيمنازياسىنىڭ ديرەكتورى جادىرا سابىرقىزى قاتىسۋشىلارعا ەرەكشە العىسىن ءبىلدىردى. الداعى ۋاقىتتا ۆەلوجۇيرىكتەر اباي ەلىنە بارۋدى كوزدەپ وتىر.
قاراعاندى وبلىسى
