«توعىزبۇلاق ۋچاسكەسىندەگى وبالاردىڭ ءبىرازى تونالعان, كەيبىرى اپاتتى جاعدايدا تۇر. سوعان قاراماستان زەرتتەۋشىلەر توعىزبۇلاق-1 جانە توعىزبۇلاق-2 قورىمىنداعى 6 وبانى اشىپ, ساراپتاما جاسادى. توعىزبۇلاق-1 قورىمىندا 20-دان استام وبا انىقتالسا, ونىڭ 10-ى الىستان تىزبەكتەلىپ مەن مۇندالايدى. سولاردىڭ اراسىنان ايرىقشا كوزگە تۇسكەن ءتورت وبا اشىلدى. بىرىنشىسىنەن جاس بالانىڭ سۇيەگى تابىلسا, ەكىنشىسىنەن شاشىلعان سۇيەك قالدىقتارى ءىلىندى. ال ءۇشىنشى جانە ءتورتىنشى وبادا عالىمدار كۇتپەگەن ولجاعا كەنەلدى. ءدال وسى وبالاردان قىش ىدىستار مەن كيىمگە, بەلدىككە ارنايى جاسالعان التىن قاپسىرمالار مەن التىن جۇزىك تابىلدى. بۇل جادىگەرلەر ءبىزدىڭ زامانىمىزدان بۇرىنعى ءىV-ءىىى عاسىرلاردا ءومىر سۇرگەن ساق تايپالارىنا تيەسىلى. جانە سول زامانداعى جەرگىلىكتى حالىقتىڭ وركەنيەتىنەن حاباردار ەتەدى, جادىگەرلەردىڭ كوپشىلىگى اڭ ستيلىندە جاسالعان. التىن قاپسىرمالار قازاقتىڭ قوشقار ءمۇيىزى, تامشى ءتارىزدى فورمادا جاسالعان», دەيدى ءال-فارابي اتىنداعى قازۇۋ تاريح فاكۋلتەتىنىڭ دەكانى, تاريح عىلىمدارىنىڭ دوكتورى, پروفەسسور دوسبول بايقوناقوۆ.
قورىمنان تابىلعان 30 شاقتى جادىگەردىڭ ەڭ قۇندىسى جانە سىزات تۇسپەي امان ساقتالعانى – التىن جۇزىك. ونىڭ سالماعى – 8 گرامم, وندا ارىستان بەينەسى بەدەرلەنگەن. پروفەسسور دوسبول سۇلەيمەن ۇلى وسىعان ۇقساس جۇزىك ەسىك قالاسىنان تابىلعان «التىن ادامدا» بولعانىن العا تارتتى. جۇزىكتەگى ارىستان بەينەسى ديناستيالىق بيلىكتى بىلدىرەتىندىكتەن, بۇل وبالاردا جاي ادامنىڭ مۇردەسى جاتپاعانىن ايتادى.
بۇل باعا جەتپەس جادىگەرلەر ولكە تاريحىن بايىتۋعا وراسان زور سەپتىگىن تيگىزەرى ءسوزسىز.
«التىن اشەكەيلەردىڭ تابىلۋى – ساق داۋىرىندەگى زەرگەرلىك ونەردىڭ بيىك دەڭگەيىن, زەرگەرلەردىڭ اسقان شەبەرلىگىن كورسەتەدى» دەيدى الماتى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ.
قازبا جۇمىسى بارىسىندا تابىلعان جادىگەرلەر الداعى ۋاقىتتا ارنايى زەرتحاناعا جىبەرىلىپ, تاريحي قۇندىلىعى انىقتالادى.
الماتى وبلىسى
