تاراپتار ۇكىمەتارالىق كەڭەستىڭ 12-وتىرىسىندا قول جەتكىزىلگەن كەلىسىمدەردىڭ ورىندالۋىن, 2024–2025 جىلدارعا ارنالعان اۋىل شارۋاشىلىعى ونىمدەرىنىڭ ءوزارا جەتكىزىلىمىن ۇلعايتۋ جونىندەگى جول كارتاسىنىڭ ىسكە اسىرىلۋىن, سونداي-اق اگرارلىق سالاداعى ەكىجاقتى ىنتىماقتاستىقتىڭ وزەكتى ماسەلەلەرىن تالقىلادى.
باعلان بەكباۋوۆ اگروونەركاسىپتىك ونىمدەر بويىنشا ءوزارا تاۋار اينالىمىنىڭ تۇراقتى وڭ سەرپىنىن اتاپ ءوتتى. 2024 جىلى تاۋار اينالىمى 350,9 ملن دوللارعا جەتىپ, وتكەن جىلمەن سالىستىرعاندا 8,4%-عا ارتتى. 2025 جىلدىڭ ءى توقسانىندا ءوسىم 43,5%-دى قۇراپ, 99,9 ملن دوللار بولدى. ونىڭ ىشىندە قازاقستاننان ەكسپورت – 80,1 ملن دوللار (+44,3%), يمپورت – 19,8 ملن دوللار (+39%).
كەزدەسۋدە اۋىل شارۋاشىلىعىنا يننوۆاتسيالىق تەحنولوگيالاردى ەنگىزۋ بويىنشا تەحنيكالىق كومەك كورسەتۋ جونىندەگى ءىس-شارالار جوسپارىنىڭ جوباسىنا ەرەكشە نازار اۋدارىلدى. قۇجات سەلەكتسيا, اسىلداندىرۋ جۇمىستارى جانە اقپاراتتىق دەرەكقورلاردى دامىتۋ بويىنشا تاجىريبە الماسۋدى كوزدەيدى. قازاقستان تاراپى استىق قولحاتتارى ۇلگىسىندە قويما كۋالىكتەرىنىڭ اينالىمى بويىنشا تاجىريبەسىمەن ءبولىسىپ, بۇل باعىتتا «اقپاراتتىق-ەسەپ ورتالىعى» اق بازاسىندا پراكتيكالىق كونسۋلتاتسيالىق كەزدەسۋ وتكىزۋگە دايىن ەكەنىن ءبىلدىردى.
وتىرىس اياسىندا تاراپتار ىقتيمال جوبالار ءتىزىمىن ءوزارا الماسىپ, بىرلەسىپ جۇزەگە اسىرۋ ءۇشىن ناقتى 2-3 جوبانى ايقىنداۋعا كەلىستى. سونىمەن قاتار استانا قالاسىندا قاناتقاقتى فورماتتا اۋىل شارۋاشىلىعى جارمەڭكەسىن وتكىزۋ, كەيىن ونى ەلىمىزدىڭ باسقا وڭىرلەرىندە جالعاستىرۋ تۋرالى ۇسىنىس قولداۋ تاپتى.
شەكارا بەكەتتەرىندە جۇك اۆتوكولىكتەرىنىڭ وتكىزۋ قابىلەتىن ارتتىرۋ ماسەلەلەرى دە قارالدى.
ەكىجاقتى ساۋدانى دامىتۋ ماقساتىندا تاراپتار «كىرگىز-اگروحولدينگ» ااق پەن «QazTrade» ساۋدا ساياساتىن دامىتۋ ورتالىعى» اق اراسىندا ءونىم جەتكىزىلىمىنىڭ بولجامدى كولەمىن كورسەتە وتىرىپ, مەموراندۋمعا قول قويۋعا ۋاعدالاستى. جامبىل (قازاقستان) جانە تالاس (قىرعىزستان) وبلىستارى اراسىندا اۋىل شارۋاشىلىعى ونىمدەرىنىڭ شەكارا ماڭىنداعى ساۋداسىن جانداندىرۋ جوسپارلانىپ وتىر.
قازاقستان بيدايىن جەتكىزۋدى ارتتىرۋ ماقساتىندا تاراپتار تەمىرجول تاريفتەرى ماسەلەسىن پىسىقتاپ, مۇددەلى ۇيىمداردىڭ قاتىسۋىمەن كەلىسسوزدەر جۇرگىزەدى. وتىرىس قورىتىندىسى بويىنشا قولجەتكىزىلگەن كەلىسىمدەر مەن الداعى ىنتىماقتاستىق باعىتتارىن بەكىتەتىن حاتتاماعا قول قويىلدى.
