سۋرەتتى تۇسىرگەن – داۋرەن ەرمەكباي
بيىل دا ءجىبىن ۇزبەي جالعاسقان قىمىزمۇرىندىق – كەرەگە تاۋلى كەگەن اۋدانىنىڭ برەندىنە اينالعانى اقيقات. تاڭدايعا تاتىمدى قىمىزدىڭ الۋان تۇرىنەن ءشول قاندىرىپ, ءوڭىردىڭ ساف اۋاسىن جۇتۋعا ارىسى اتىراۋ مەن التايدان باستاپ, ەلىمىزدىڭ ءار وڭىرىنەن 10 مىڭعا تارتا حالىق جيىلسا, 10 مەملەكەتتەن ارنايى دەلەگاتسيا وكىلدەرى كەلدى. ۇلتىمىزدىڭ ۇلى قۇندىلىقتارى سالتانات قۇرعان مادەني-تانىمدىق ءمانى زور شاراعا الماتى وبلىسىنىڭ اكىمى مارات سۇلتانعازيەۆ ايرىقشا قولداۋ ءبىلدىرىپ كەلەدى.
«قىمىزمۇرىندىق – حالقىمىزدىڭ تۇرمىس-سالتى مەن رۋحاني مادەنيەتىنەن سىر شەرتەتىن ۇلى مۇرا. مەملەكەت باسشىسى قاسىم-جومارت توقاەۆ ۇلتتىق قۇرىلتايدا: «حالقىمىزدىڭ اتا-بابادان ميراس بولعان مول مۇراسى بار, ونى زامان تالابىنا ساي جاڭعىرتىپ, بارىنشا ناسيحاتتاۋىمىز كەرەك», دەگەن بولاتىن. بۇگىنگى ءىس-شاراعا شەت مەملەكەتتەردىڭ وكىلدەرى, ەلىمىزدىڭ ايتۋلى مەملەكەت جانە قوعام قايراتكەرلەرى, حالقىمىزعا بەلگىلى ادەبيەت جانە مادەنيەت مايتالماندارى, رەسپۋبليكالىق قوعامدىق ۇيىمدار مەن ەتنومادەني بىرلەستىك مۇشەلەرى قاتىسىپ وتىر. وسىنىڭ ءوزى قازاق حالقى مەن ونىڭ ۇلتتىق مادەنيەتىنە دەگەن قۇرمەتتى كورسەتەدى.
قىمىزمۇرىندىق – ەلىمىزدى تانىتاتىن, رۋحاني قۇندىلىعىمىزدى جاڭعىرتاتىن مازمۇندى باستاما. قىمىز دايىنداۋ – تەك شەبەرلىك ەمەس, ءومىر ءپالساپاسى. بيە بايلاپ, قىمىز اشىتىپ, ونى قوناققا ۇسىنۋ – حالقىمىزدىڭ عاسىرلار بويى جالعاسىپ كەلە جاتقان ەرەكشە ءداستۇرى. ءبىز بۇگىن – بابا اماناتىن ورىنداۋ ماقساتىندا زاماناۋي تەحنولوگيالاردى پايدالانىپ, قىمىز ءوندىرىسىنىڭ كولەمىن ارتتىرىپ, ونى ساقتاۋ, تاسىمالداۋ جانە ساۋدا جەلىلەرىنە جەتكىزۋ جولىندا ەڭبەك ەتۋدەمىز. سونىڭ ناتيجەسىندە حالىقتىڭ ۇلتتىق ونىمگە دەگەن سۇرانىسى جىلدان-جىلعا ارتىپ كەلەدى. قىمىز ءوندىرىسى جىلقى شارۋاشىلىعىمەن تىكەلەي بايلانىستى. بۇگىندە وبلىسىمىزدا جىلقى سانى 268 مىڭعا جەتىپ, وتكەن جىلمەن سالىستىرعاندا 6 پايىزعا ءوسىپ وتىر», دەگەن وبلىس اكىمىنىڭ ءبىرىنشى ورىنباسارى نۇرلان ءابدىراحىم جيىلعان قاۋىمدى ۇلتتىق مەرەكەمەن قۇتتىقتادى.
سالتاناتتى ءىس-شارادا پارلامەنت ءماجىلىسىنىڭ دەپۋتاتى جاناربەك ءاشىمجان قىمىزمۇرىندىق – حان جايلاۋ اتانعان قارقاراعا عانا ەمەس, ەلىمىزگە, الىس-جاقىن شەتەلگە ءمالىم ۇلى جارمەڭكەگە اينالىپ كەلە جاتقانىن اتادى.
ال جازۋشىلار وداعىنىڭ باسقارما توراعاسى مەرەكە قۇلكەنوۆ: «قىمىزمۇرىندىق – كوپتەن ۇمىت بولعان ۇلتتىق ءىس-شارا. وسى ارقىلى – ۇلتتىق قۇندىلىقتارىمىزدى, ارتىقشىلىقتارىمىزدى, دانالىعىمىزدى, جىرىمىزدى, باسقا دا مادەني مۇرالارىمىزدى جاڭعىرتا بەرۋىمىز كەرەك. بۇل تەك الماتى وبلىسىندا عانا ەمەس, ەلىمىزدىڭ تۇكپىر-تۇكپىرىندە تويلانۋعا ءتيىس. سوندا حالقىمىزدىڭ رۋحاني مادەنيەتىنە تىڭ سەرپىن بەرەدى», دەدى.
اسپاناستى ساحنادا ۇلى كوش ساپ تۇزەسە, قازاقستاننىڭ حالىق ارتىستەرى التىنبەك قورازباەۆ, رامازان ستامعازيەۆ باستاعان ەسترادا جۇلدىزدارى اۋەلەتە ءان شىرقاپ, حالىقتىڭ قۇلاق قۇرىشىن قاندىردى.
اتقا مىنسە ارقالانىپ كەتەتىن بابالارىمىزدىڭ بۇگىنگى ۇرپاعى دا قالىسپاي قىز قۋ, تەڭگە ءىلۋ سىندى ۇلتتىق ويىنداردى پاش ەتتى. تولاعايلار ءزىلتاس, قوشقار كوتەرىپ, اربا سۇيرەپ, ارقان تارتىسىپ, بەلدەسىپ, بىلەك كۇشىن سىناسىپ, ۇلتتىق سپورتتىڭ الۋان تۇرىنەن باق سىناستى. جەڭىمپازدار باعالى سىيلىقتار الدى.
اتادان ميراس بولعان قولونەر كورمەلەرىندە اۋىلدىق وكرۋگتەردەن كەلگەن اقسامايلى اتالار مەن انالار ۇلتتىق تاعامدار ازىرلەۋمەن قاتار, سىرماق سىرۋ, ءجۇن ءتۇتۋ, ۇرشىق ءيىرۋ, قامشى ءورۋ, ات ابزەلدەرىن جاساۋ سىندى شەبەرلىكتەرىن كورسەتتى. بۇل كۇنى اۋىلشارۋاشىلىق كورمەسى دە ءوز دارەجەسىندە ۇيىمداستىرىلدى.
دالا ءتوسىن دۇبىرلەتكەن قىمىزمۇرىندىقتى قوعام قايراتكەرى جولان وماروۆتىڭ قۇرمەتىنە وتكەن «جولان جۇيرىگى» اتتى ات بايگەسى تۇيىندەدى. جال-قۇيرىعى سۇزىلگەن سايگ ۇلىكتەر جارىسىنا جۇزدەن اسا ات قاتىسىپ, الامان مەن توپ بايگەدە توپ جارعان تۇلپار يەلەرى اۆتوكولىك كىلتتەرىن يەمدەنسە, قۇنان بايگە جەڭىمپازى 2 ملن تەڭگەنى قانجىعاسىنا بايلادى.
الماتى وبلىسى
