بەلگىلەنگەن كۇنى باردىق. 28 داستارقان. ءبىر ۇستەلدە 12 ادامنان وتىرعاندا 336 ادام. كوكشەتاۋ ءۇشىن اۋقىمدى توي. جۇمىس كۇنى, ساعات تورتكە شاقىرعان. اقساقالدان ۇيات بولار دەپ ۋاقتىلى باردىق. بارعانىمىزدى قايتەيىن, سەگىزگە دەيىن كۇتتىك. جاي وتىرمايىنشى دەپ تەككە كەتكەن ءتورت ساعاتتى 336 ادامعا كوبەيتتىم. زايا كەتكەن 1 344 ساعات – ادام عۇمىرى.
«وسى ۋاقىتتا قىتايلار قانشا زات ىستەپ شىعارار ەدى, – دەدى بىزدەن سوڭ كەلگەن ەسكى قۇدا قالقامان, – ۋاقىتتى قادىرلەۋدى قاشان ۇيرەنەر ەكەنبىز».
قاس قارايا توي باستالعان. جار-جارىمەن, بەتاشارى ءبىر ساعات ۋاقىت الدى. اسابا ءبىرىنشى ۇستەلگە جەكە ءسوز بەرگەن, سودان سوڭ ءتورت ۇستەلدى قوسىپ. ءار ۇستەلدە 12 ادامنان وتىرعاندا تىلەك ايتۋعا 48 كىسى ءبىر-اق شىعادى. 48 كىسى ءبىر مينۋتتان سويلەگەندە, 48 مينۋت ءبىرىن-ءبىرى قايتالايتىن جاتتاندى لەپەس. شىعۋى بار, سۋرەتكە ءتۇسۋى بار, قايتىپ ورنىنا وتىرۋى بار. قانشاما ۋاقىت؟
الدەن سوڭ ويىن باستالدى. اسابا ورتاعا جاستارى جەر ورتاسىنان اسقان ون جىگىتتى شىعاردى. مەيرامحانانىڭ قابىرعاسىنا ىلىنگەن, جارتى الەمدى الىپ جاتقان ەكراننان بيشىلەردىڭ بەينەسى كورىندى. ويىنعا قاتىسۋشىلار وسى بيشىلەردىڭ ءبيىن قايتالاۋى كەرەك. ەكرانداعى بيشىلەر جەرگە جاتىپ بيلەدى. ءبىزدىڭ اعايىن دا. قوزى قارىن «بايلاعاندارعا» قيىن ەكەن. شالشىقتىڭ شەتىندەگى باقا ىسپەتتى, تاربيىپ جاتىر.
– قاپ, – دەدى جانىمدا وتىرعان قوناقتىڭ ءبىرى, – مىنا ەدەندە مىڭ سان ادام مانادان ءارلى-بەرلى ءجۇردى ەمەس پە؟ كۇلگە اۋناعان تاۋىقتاي قىلعان مۇنىسى نەسى؟ تويعا ادام بارىن كيىپ, بايلاۋىن تاعىپ دەگەندەي, ساندەنىپ كەلەدى ەمەس پە؟ مىنا جىگىتتەردە دە ەس جوق ەكەن.
اسابا دا جالىعار ەمەس, ايتقانىنا كونىپ, ايداعانىنا جۇرگەن توپ جىگىتتى الدىنا سالىپ مىڭ قوي ايداعان باقتاشىداي وراعىتىپ ءجۇر. الدەن سوڭ قۇرمەت كورسەتەيىك دەدى. ەسەبى وداعاي كورىنىستى كورىپ وتىرعان حالىق دۋىلداتىپ قول سوعىپ, قولداۋى قاجەت ەكەن. وڭ جاق دەپ ايعاي سالدى. وڭ جاق قاتارداعى 14 داستارقاندا وشارىلىپ وتىرعان ءتامام جۇرت قىردان جىلقى قايىرعانداي قيقۋلاسىن كەپ. سول جاق دەپ بۇيىردى اسابا. سول جاق قاتاردا ءيىن تىرەسىپ وتىرعان, ىشكەن ماس, جەگەن توق مەيماندار مەيرامحانانىڭ قابىرعاسىن قاقىراتا ايعايلاسىن كەلىپ.
وسى اسابالار حالىقتى, اسىرەسە جاستاردى تاربيەلەۋگە ءتيىستى ەمەس پە ەدى. ۇلتتىق ۇعىمنىڭ ۇڭعىسىنا ەنبەيتىن جات كورىنىستەردى بويىنا قايدان ءسىڭىرىپ العان؟ تويعا بارامىن دەپ قاجىپ قايتتىق. سويتسەك, بۇل سوڭعى كەزدە ەتەك العان, كوپتىڭ كوزى ۇيرەنگەن كورىنىس ەكەن. ايتپاقشى, ءسىز تويعا بارىپ ءجۇرسىز بە؟
