«حيمفارم» اق زاۋىتىندا وتكەن تانىستىرىلىم ءىس-شاراسىنا قازاقستاننىڭ دەنساۋلىق ساقتاۋ ۆيتسە-ءمينيسترى تيمۋر مۇراتوۆ, Polpharma توبى باقىلاۋ كەڭەسىنىڭ توراعاسى ەجي ستاراك پەن قالا اكىمى عابيت سىزدىقبەكوۆ قاتىستى.
ماماندار ورتالىق ازياداعى تۇڭعىش ەۋروپالىق وداقتىڭ ءتيىستى وندىرىستىك پراكتيكا سەرتيفيكاتىنا (GMP) يە بولۋى ۇلكەن جەتىستىك ەكەنىن جەتكىزدى.
كەزدەسۋدە تاراپتار بولاشاق فارماتسەۆت مامانداردى دايارلاۋ ماسەلەسىنە دە ەرەكشە نازار اۋداردى. وسى ورايدا وڭتۇستىك قازاقستان مەديتسينا اكادەمياسىنىڭ ستۋدەنتتەرىنە ءبىلىم بەرۋ گرانتتارى تابىس ەتىلدى. مۇنى جاۋاپتى وكىلدەر كومپانيا تاراپىنان بولعان ادامي كاپيتال مەن سالانى ستراتەگيالىق تۇرعىدان ۇزاق مەرزىمدى دامىتۋ دەپ باعالادى.
ءوز كەزەگىندە شاھار باسشىسى وتاندىق فارماتسەۆتيكانى دامىتىپ, وزىق تەحنولوگيالار ەنگىزىپ, جۇمىس ورىندارىن قۇرعان ينۆەستورلارعا بارشا جۇرتتىڭ اتىنان العىسىن ءبىلدىردى. جيىندا جوعارى تەحنولوگيالىق ءدارى-دارمەك ءوندىرىسى دەنساۋلىق ساقتاۋ جۇيەسىن نىعايتىنى, يمپورتقا تاۋەلدىلىكتى ازايتىپ, قالانىڭ تۇراقتى, باسەكەگە قابىلەتتى ەكونوميكاسىن قالىپتاستىرۋعا ىقپال ەتەتىنى جونىندە ايتىلدى.
جالپى «حيمفارم» اق قازاقستانداعى ەڭ ءىرى دارىلىك زاتتار وندىرەتىن كاسىپورىندار قاتارىنا كىرەدى. ءوز ەلىمىزدە قولدانىلاتىن ءاربىر بەسىنشى ءدارى شىمكەنتتىڭ فارماتسەۆتيكالىق زاۋىتىندا شىعارىلادى. بۇگىنگى تاڭدا كومپانيادا 1300-دەن استام ادام تۇراقتى ەڭبەك ەتەدى. «حيمفارم» جەتكەن جەتىستىكتىڭ ءبىرى بەيىندى جوعارى وقۋ ورىندارىمەن ءوزارا ارىپتەستىك بايلانىس ورناتقان. سونىڭ ناتيجەسىندە بىلىكتى فارماتسەۆتيكالىق كادرلار دايارلاۋ ىسىندە ۇلكەن وزگەرىستەر ورىن الدى.
شىمكەنت
