كەڭوتكەل اۋىلىنىڭ ماڭىنداعى قورىمنان ساق داۋىرىنە تيەسىلى ەكى ادامنىڭ ءمايىتى تابىلدى. عالىمداردىڭ بولجامىنشا, بىرەۋى ەر ادام, ەكىنشىسى ايەل بولۋى مۇمكىن. ال, قولا بۇيىمدار ساق داۋىرىندەگى كۇن كەشكەن ايەلدىڭ تەگىن ادام بولماعاندىعىن ايعاقتايدى.
–تەمىر داۋىرىنە ءتان جەرلەۋ ءداستۇرىنىڭ ساقتالعاندىعى انىقتالىپ وتىر. قورىمداعى سۇيەكتەر ەرتەدەگى تەمىر ءداۋىرى داستۇرلەرىنە ءتان, – دەيدى قازاقستان رەسپۋبليكاسى ۇلتتىق مۋزەيى مادەني مۇرانى عىلىمي زەرتتەۋ ينستيتۋتىنىڭ باسشىسى پەردەحان مۇسىرمانقۇل, – سول زاماننىڭ عۇرىپتىق تاس, قولا اينا, پىشاق سياقتى زاتتارىمەن بىرگە بەلبەۋ بولىكتەرى عاجاپ دۇنيە. كوكشەتاۋ وڭىرىندەگى كونە تاريحقا جاڭا كوزقاراسپەن قاراپ, عىلىمي تۇرعىدا قالىپتاستىرۋعا مۇمكىندىك بەرەتىن دەرەكتەر.
ءمايىتتىڭ سۇيەگى ءبىرشاما جاقسى ساقتالىپتى. عالىمدار الداعى ۋاقىتتا انروپولوگيالىق زەرتتەۋگە جىبەرمەك. عىلىمي قاۋىمداستىق بۇل ولجانى ەلىمىزدىڭ ارحەولوگيا سالاسىنداعى ماڭىزدى جاڭالىق دەپ باعالاپ وتىر.
–ەر ادامنىڭ بەلبەۋىندە ورنەكتەلگەن ساق ستيلىندە جاسالعان بۇيىمدار تابىلىپ وتىر, – دەيدى قازاقستان رەسپۋبليكاسى ۇلتتىق مۋزەيى مادەني مۇرانى عىلىمي زەرتتەۋ ينستيتۋتىنىڭ عىلىمي قىزمەتكەرى دانيار دۇيسەنباي, – مال سۇيەكتەرىنىڭ قالدىقتارى دا تابىلدى. وعان قوسا, وشاق قالدىقتارى دا قولىمىزعا ىلىكتى. ءبىز ءۇشىن بۇل وتە قۇندى. «قارا ارحەولوگتاردىڭ» نازارىنا ىلىنبەي, امان قالعان ولجا بىزگە بۇيىرىپ وتىر.
قازىر ارحەولوگتار كەنجەباي قورىمىندا تابىلعان مايىتتەردى وسى ءوڭىردىڭ تۇرعىندارى دەگەن ۇيعارىمعا كەلىپ وتىر. الداعى ۋاقىتتا يمانتاۋدىڭ ەتەگىندە دە ءدال وسىنداي قازبا جۇمىستارى جۇرگىزىلمەك.
اقمولا وبلىسى
